Gicumbi: Amatsinda y’ibiganiro yatangiye kwera imbuto ku miyoborere

0
212

Umuryango Never Again uravuga ko amatsinda y’ibiganiro yashyizeho mu turere icumi agamije gutinyura abaturage kuvuga uruhare rwabo mu bibakorerwa, agenda atanga umusaruro w’icyo yashyiriweho.

amatsinda y'ibiganiro ngo yatangiye kwera imbuto
amatsinda y’ibiganiro ngo yatangiye kwera imbuto

Mu kiganiro nyunguranabitekerezo ku ruhare rw’umuturage mu ishyirwamubikorwa ry’imihigo cyabereye mu karere ka Gicumbi, cyateguwe n’umuryango Never Again ku bufatanye n’Umuryango utanga amahugurwa ku banyamakuru (Institut Panos Grands Lacs)  ndetse n’ihuriro ry’amaradiyo y’abaturage mu Rwanda, abaturage bagaragaje akabari ku mutima ku bijyanye n’itegurwa n’ishyirwa mu bikorwa  ry’imihigo.

Mahoro Eric uhagarariye Never Again
Mahoro Eric uhagarariye Never Again

Mahoro Eric uhagarariye Never Again avuga ko bajya gutekereza gushyiraho amatsinda y’ibiganiro, hari hagamijwe kuvana intera nini yagaragara hagati y’umuturage n’umuyobozi aho umuturage atabashaga kwisanzura ku bayobozi ngo avuga akamuri ku mutima.

yagize ati:”Ikintu cya mbere nabonye afasha(amatsinda), afasha  gutinyura abaturage kwegera abayobozi bakababwiza ukuri ku bintu bitagenda, kuko buriya nubwo igihugu cyacu gifite politiki nziza ya decentralization, inafasha abaturage kuko ubuyobozi buba bubegereye,  ariko ubushakashatsi bugaragaza ko hakiriho abayobozi bake  batinyitse bikabije ku baturage, rimwe na rimwe n’umwanya babahaye ntibatinyuke ngo bawubazemo ibibazo  kuko baba babona bishobora kubagiraho ingaruka mbi, ariko aya matsinda yahinduye ibintu hano mwabibonye ko abaturage bo muri Rutare  barisanzuye baravuga n’ibyo babona  bigenda neza ariko bagatinyuka  no kunenga kandi ku mugaragaro bisanzuye…”

Benihirwe Charlotte umuyobozi wungirije w’akarere ka Gicumbi ushinzwe imibereho myiza y’abaturage
Benihirwe Charlotte umuyobozi wungirije w’akarere ka Gicumbi ushinzwe imibereho myiza y’abaturage

ubuyobozi bw’akarere ka Gicumbi buvuga hari inyungu nyinshi buvana mu biganiro nyunguranabitekerezo ku buryo  bamenya icyo abaturage babifuzaho, nkuko bisobanurwa na Benihirwe Charlotte umuyobozi wungirije w’akarere ka Gicumbi ushinzwe imibereho myiza y’abaturage.

Yagize ati:”Inyungu rero tubonamo, tubonamo inyungu ku mpande zombi tubona inyungu ku baturage tukabona ko hari ibintu byinshi abaturage batwifuzaho tutari twabasha kubakorera, ariko na bo bakabona amakuru mu byo tubasaba, iyo rero ikiganiro nk’iki gitambutse natwe biba biduhaye isomo kuko uba wagiye wumva amajwi menshi y’abaturage ese koko biriya bintu birahari…”

Kugeza ubu Never Again ifite amatsinda y’ibiganiro mu turere icumi tw’u Rwanda, uretse Never Again umuryango Institut Panos Grands Lacs n’ihuriro ry’amaradiyo y’abaturage mu Rwanda, bagenda bakora gahunda zitandukanye zigamije kuzamura ibitekerezo by’abaturage, binyuze mu kubahuza n’abayobozi.

Nkurunziza Pacifique/touchrwanda.com

Leave a Reply