Ibinyoma, ubujura bw’amajwi, kwica umuco nibyo byaranze igikorwa cya Miss Rwanda 2017

0
513

Miss Rwanda ni kimwe mu bikorwa bivugwa cyane hirya no hino mu itangazamakuru ndetse no mu baturage bagaragaza uburyo habamo uburiganya bukabije, ndetse n’ubujura bw’amajwi.

Amakosa akomeye yaranze igikorwa cya Miss Rwanda 2017.

Iki gikorwa gitegurwa na Rwanda Inspiration Backup ari nayo ishinjwa amakosa yose yagaragaye muri iki gikorwa cy’uyu mwaka.



Amakosa yavuzwe harimo Uburiganya, Kubera, Ubujura bw’amajwi, Kutagaragaza ukuri, kwica umuco, no kutubahiriza ibintu bo ubwabo bishyiriyeho bituma abantu benshi bababazwa n’iki gikorwa.

Uretse gukora amakosa yavuzwe haruguru, abantu benshi banahamya ko Miss Rwanda nta kamaro ifitiye abanyarwanda, kuko iyo urebye amafaranga ahatakarira yakora ibikorwa remezo byinshi ikindi kandi abakobwa bagiye bambikwa ikamba bamwe ntibakiri no mu Rwanda, ibi bigatuma hibazwa ngo “Ese ibikorwa bahigira kuzakora bizakorerwa hanze y’igihugu?

Uyu mwaka wa 2017 wo wari wuzuyemo amakosa adasanzwe ugereranyije n’indi myaka, ibi bigatuma abantu benshi bibaza bati ese abategura iki gikorwa niba badashoboye ntibagakwiye kukireka burundu kikavaho cyangwa se Leta ikagihagarika nkuko yabigenje mu mashuri yisumbuye.

Aya ni amwe mu makosa yaranze Miss Rwanda 2017.

Ese nyir’ubwite akwiriye gutegereza itangazamakuru cyangwa ni ryo ryagakwiye kumutegereza?

Ibi bintu byababaje abantu abatari bake aho igikorwa cya nyuma nyirizina cyatangiye ku isaha ya Saa tatu, nyamara batangaje ko kizatangira saa kumi n’imwe, impamvu yabiteye nta yindi nuko bari bategereje Televiziyo y’Igihugu, ibi bigatuma abantu bicaye mu cyumba cyari kuberamo ibi birori barambirwa ndetse bamwe batangira no kwitahira amasaha atageze, bitewe nuko bari batinze gutangira.Ibi ntibyagakwiye kuko bari kumenyesha abantu ko bizatangira bitinze mu gihe bari bategereje televiziyo y’Igihugu.

Kwica Umuco

Mu muco wa Kinyarwanda ntibimenyerewe guterura igisabo wambaye imyambaro itari iya Kinyarwanda, gusa ibi byabayeho ubwo abakobwa bajyaga i Nyanza ku Ngoro y’u Mwami maze bakajya guterura ibikoresho bya Kinyarwanda bambaye amapantaro abafashe yenda kwerekana ubwambure bwabo, ibi bigaragaza ko batahaye agaciro umwanya bari barimo.

Ese kuki abafana bahejwe?

Ubundi tuzi ko umufana yishyura amafaranga ye kugira ngo abashe gushyigikira umuntu ashaka, gusa birababaje kubona abafana barabujijwe kwinjirana vuvuzela kandi bishyuye amafaranga yabo kugira ngo bafane umukobwa bashaka.

Uburiganya budasanzwe

Mu matora ya nyuma habayeho uburiganya bukabije, ubwo hatorwaga umukobwa uri bwiyongere ku bakobwa bane batowe n’abagize akanama nkemurampaka akaba yaratowe kuri telefoni mu gihe uyu muhango wabaga.

Ubwo umushyushyarugamba yari agiye kumutangaza, umwe mu bagize akanama nkemurampaka yaramubujije ngo nabe yitonze, byahise bigaragaza ko bashobora kuba bafite uwo bari bageneye uwo mwanya.

Ubushobozi buke?

Muri aya marushanwa hagaragayemo ubushobozi buke ku munsi wa nyuma, aho bagiye gutanga imodoka bakabura imfunguzo, bitewe nuko batari bakarangiza kwishyura amafaranga yose, ibi byatumye nyampinga atayitahana, maze nyuma bajya kuyimushyira iwabo bishyuye amafaranga yose.

Ese kubera iki bavuga ko bibujijwe kwambara ubusa kuri ba nyampinga ariko ntibahanwe?

Iyo bari gutora nyampinga w’u Rwanda bamusaba kutazica umuco, akagumana ishema n’icyubahiro aba afite, gusa biratangaje kubona ba Nyampinga bajya ku kar ubanda bambaye imyambaro igaragaza ubwambure bwabo bwose, ntihagire ikintu gikorwa n’abategura Miss Rwanda kijyanye no kuba bahana abo bakobwa, ibi na byo bigaragaza imbaraga nkeya za Rwanda Inspiration Back Up.

Ibi ni bimwe touchrwanda.com yabashije gukusanya mu baturage  kuva igikorwa cyo gutora Miss Rwanda 2017 cyatangira kugeza gisojwe.



IZINDI NKURU WASOMA ZIJYANYE NA MISS RWANDA 2017

Nyampinga w’u Rwanda 2017 yagaragaje ubwambure bwe mu mwambaro wa Bikini-AMAFOTO 

Iradukunda Elsa, nyampinga w’u Rwanda 2017 yatuburiwe imodoka 

Iradukunda Elsa abaye Miss Rwanda 2017



Leave a Reply