Ikibazo cy’abigize aba komisiyoneri mu manza kigiye kuvugutirwa umuti

1
102

Hari abigize aba komisiyoneri mu manza bakabeshya abaturage ko babakurikiranira imanza bakabasaba amafaranga bababwira ko bazayabahera abacamanza cyangwa abandi bakozi b’inkiko kugirango babakize imanza zabo ikibazo cyabo aho bukera kiragera kwiherezo.

 

Perezida w’Urukiko rw’Ikirenga Prof. Sam Rugege

Mu muhango wo gusoza icyumweru ngaruka mwaka cyahariwe guca Ruswa mu nkiko kuri uyu wa Gatanu tariki 10 Gashyantare hagarutswe ku kibazo cy’abigize aba komisiyoneri mu nkiko bagamije kurya no kuyobya rubanda.

Perezida w’Urukiko rw’Ikirenga Prof Sam Rugege akaba yagaragaje igitera inzitizi ngo abo bantu bagezwe imbere y’ubutabera, yagize ati: “Ikibabaje kurushaho ni uko abakwa ayo mafaranga babivuga imanza zimaze gucibwa bitagishobotse kubona ibimenyetso bituma batahurwa ngo bakurikiranwe.”

Sam Rugege yatanze ingero za hamwe cyagiye kigaragara, “Iki kibazo cy’ubwambuzi bushukana kirahari dore ko hari n’abagiye babivuga, hari n’abagannye inkiko za Gasabo na Muhanga.”

Ikindi kibazo nuko ababikora bakunda gukoresha amazina atari ayabo na numero za telephone zitari izabo, iz’abakecuru batagishoboye, iz’abantu bapfuye bigatuma udashobora kubakurikirana ngo utahure iyo migambi. Yakanguriye abagana inkiko kwirinda abo bateka mutwe b’aba komisiyoneri.

Kugirango ibi bigere kwiherezo Perezida w’Urukiko rw’Ikirenga Prof. Sam Rugege akaba yasabye abaturage bagana inkiko gutanga amakuru mu rwego rwo guhashya burundu iki kibazo ndetse avuga ko hagiye gushyirwaho ingamba zirimo kuzamura ikoreshwa ry’ikoranabunga muri serivise zinyuranye abantu basaba mu nkiko.

1 COMMENT

  1. Abakomisiyoneri bo babaye benshi, si mu manza gusa, byagaragaye ko no muri ruswa abazaka bifashisha abakomisiyoneri. Ni ikibazo gikomeye kandi kizwi nubwo indirimbo zo kurwanya ruswa zimaze kurambirana.

Leave a Reply