Ni iki cyihishe inyuma y’abategura amarushanwa yo kuzamura impano mu bakiri bato?

0
89

uko imyaka ishira n’indi igataha niko uruganda rw’umuziki mu Rwanda rurushaho gutera intambwe ijya imbere, hirya no hino abashoramari bakagenda biga uburyo bashora imari muri uru ruganda gusa hakaba hakomejwe kwibazwa abatsinda mu mishinga yo guteza imbere impano zitaramenyekana aho bazimirira.

Amarushanwa y'abahanzi bakizamuka

Ni imishinga ukubise ijisho mu nyigo zayo izana ingufu zihambaye zo ku rwego rwo hejuru kuburyo utatinya no kwemeza udashidikanya ko mu gahe gato bitewe n’ibyo abayitegura bakayishyira mu bikorwa urukundo baba bagaragaza ko bafitiye umuziki Nyarwanda ntakabuza abatsinda babageza ku rwego rushimishije ndetse byanashoboka bakagura imbibi no hanze y’u Rwanda.

Talent Detection yatangijwe mu mwaka wa 2008 ku izina rya Talent zone itangizwa binyuze mu kiganiro Skizzy yakoraga kuri imwe mu maradiyo yumvikana hano mu Rwanda n’imwe kwikubitiro yabimburiye izindi mu gutangiza aya marushanwa, Irushanwa nka Abbey Star Project ryaje rifite imbaraga ndetse rikajya rica kuri televiziyo y’igihugu, irushanwa nka Let it shine ryatangijwe na KNC nyiri TV1 rishakisha abanyempano mu ngeri zitandukanye, Special Vacance yategurwaga na radiyo Isango Star, n’andi marushanwa agenda ategurwa n’ibitangazamakuru bitandukanye. Mbese abatsinze muri aya marushanwa yose tuvuze haruguru uretse kuba baratangajwe ndetse bakizezwa ibitangaza ku munsi w’intsinzi ibikorwa bagiye bizezwa byashiriye he?

Ingero ni nyinshi zirahari, Irushanwa nka ID ryari ryateguwe n’umuhanzi King James ubwo yari agitsindira Guma Guma mu bintu bihambaye yabashije gushyira ahagaragara mu batsinze mu marushanwa ye ni ugushyira hanze indirimbo ‘Uragiye’ y’umuhanzi Yvery nta kindi gikorwa cyayikurikiye gusa nabwo kuyikurikirana ntabyakozwe.

Talent Detection niyo yagaragaje impano y’umuhanzi  Aimé Blueston gusa nta bikorwa na kimwe bamufashije ngo abashe kwagura umuziki we uretse kwirya akimara ku bw’amahirwe akaza guhura n’umuhanzi Nizzo ariwe washyizeho itafari rigaragara ngo impano y’uyu muhanzi ijye ahagaragara.

Hari umwe mu bahanzi uherutse kugirana ikiganiro na Touchrwanda wari watsinze rimwe muri aya marushanwa twavuze haruguru tutifuje gutangaza amazina ye, yagize ati: “Twaratsinze twizezwa ibitangaza bihambaye, batwumvisha uburyo tugiye gukorerwa ibintu bihambaye gusa byashiriye mu magambo bagahora batwizeza ngo duhumure hari ibikiri gutunganwa.”

Bamwe muri bo hari abatangiza aya marushanwa bagamije kwishakira indonye kubatera nkunga bamara kubonamo akaryo bakabikubita ishoti bakigira mu yindi mishinga, abandi nabo bakaba babikora hari indi mishinga yabo bashaka kwamamaza bakabinyuza mu mpuhwe bafitiye umuziki Nyarwanda nk’imwe mu myidagaduro ikunzwe ndetse inakurikiranwa cyane mu Rwanda ndetse no kuri ino Si dutuye.

Mu byukuri bamwe mu bategura aya marushanwa nimba atari ukwiga umushinga nabi no kutabyitaho ngo babakurikirane abo bana baba batsinze, baba bakora ibi atari urukundo ahubwo ari indi nyungu runaka babikurikiyemo.

Gusa nubwo hari aho bimeze gutyo ntitwabura kuvuga ko hari naho byagaragaye ko mu gihe waba wize uyu mushinga neza ntakabuza wabyara inyungu, urugero rwa hafi ni urw’umuhanzi Christopher impano ye yagaragariye mu marushanwa yari yateguwe n’inzu itunganya umuziki ya Kina Music gusa aho we yavuye ntakabuza hari n’abandi nkawe benshi impano zabo zigipfukiranye.

Leave a Reply