umuyobozi wemerera umuturage kuzamura inzu mu kajagari akwiye guhanwa nk’umucengezi

0
116

General Major Mubaraka Muganga umuyobozi w’ingabo mu mujyi wa Kigali n’Intara y’Uburasirazuba, we abona ko umuyobozi wemerera umuturage kuzamura inzu mu buryo bw’akajagari yagakwiye kujya ahanwa nk’umucengezi.

Ibi yabitangaje mu nteko rusange y’akarere ka Kicukiro yateranye mu cyumweru gishize, aho yavuze ko umuyobozi wemera akarya amafaranga y’umuturage yarangiza akamwemerera kubaka mu kajagari ko ntaho aba ataniye n’umucengezi.

Yagize ati:”…Nashimiye ko bahamagaye abantu ibyiciro byose biri aha, bakakubwira ngo iriya nzu yubatswe amasaha abiri gusa cyangwa mu masaha atanu, rimwe na rimwe bakakubwira ngo amafaranga bayahaye umuyobozi w’icyiciro runaka kugira ngo yemerere iyo nzu ngo yubakwe, twe turavuga rero tuti iyo inzu yubatswe, bakanavuga ngo kanaka bamuhaye ibihumbi ijana cyangwa 200 iyo nzu ikatwicira umuturage, uwo muntu wariye ibyo bihumbi 200 yagahanwe gute? Njye umubajije nk’ingabo igisubizo cyacu kirihuta navuga ngo uwo muntu akwiye guhanwa nk’umucengezi siko bimeze se? umuturage wacu aradupfanye umwishe ni uwamwemereye kubaka mu kajagari”.

U Rwanda ijambo urupfu ryavuyeho

General Mubaraka Muganga yakomeje avuga ko kumva byibura umuturage umwe wiyahuye, ari igihombo gikomeye kandi tubibazwa n’ubuyobozi bukuru bw’igihugu, yakomeje avuga ko mu Rwanda ijambo urupfu ryavuyeho.

Yagize ati:”Ubundi rero nk’abantu bashinzwe kubungabunga umutekano w’umuturage, umwe iyo yiyahuye umukuru w’igihugu aratubaza tuti haburaga iki?  Kuki icyo cyizere atari agifite cyo kubaho, noneho reba dutanza raporo ngo haguye inzu 20 haguyemo abaturage 300, mu Rwanda ijambo urupfu ryavuyeho ntago ushobora kubisobanurira umukuru w’igihugu ngo abyumve cyane abonamo amafuti cyangwa ibyo tutashoboye kubahiriza, mu gihe hari umuyobozi wemereye inzu kuzamuka noneho ikagenda mutwemereye twajya tumuhana nk’umucengezi…”

Akajagari n’iterambere ni ibintu bibiri bihabanye

Aya ni amagambo yagarutsweho na Minisitiri w’Ubutegetsi bw’Igihugu Bwana Francis Kaboneka ubwo yavugaga ku kibazo cy’abantu bubaka mu kajagari, Francis  Kaboneka avuga ko akajagari ari umwanda kandi ko ntacyo kageza ku muntu.

Ati «Iyo uriye ruswa y’umuturage  ukamwemerera akubaka mu kajagari uba uteranyije Reta n’Umuturage, kuko ejo Reta izaza imusenyere…ndagira ngo rero dufatanye aka akajagari, open ni akajagari akajagari n’iterambere ni ibintu bibiri binyuranye, ahari akajagari nta terambere rihari ntabwo ushobora gupromotinga akajagari n’iterambere ntabwo bishoboka…»

Mu mvura iherutse kugwa mu mujyi wa Kigali yasize isenye amazu agera kuri 74 mu karere ka Kicukiro, mu gihe mu guhugu hose haguye amazu agera kuri 700.

Nkurunziza Pacifique/touchrwanda.com

Leave a Reply