Abazimagatanya ihohoterwa rikorerwa abana bikarangirizwa mu miryango bagiye guhagurukirwa

0
268

Ubwo hagaragazwaga ushusho rusange y’uko umwiherero w’abayobozi bakuru b’igihugu ku nshuro ya 14 uko wagenze, hagarutswe ku myanzuro itarashyizwe mu bikorwa uko byifuzwa yafatiwe mu mwiherero wabanjirije uyu ushize, harimo n’umwanzuro wo gukurikirana abantu bareba bagahishira abahohotera abana.

Bimwe mu bikibangamiye uyu mwanzuro ngo harimo kuba hari abana bahohoterwa, ariko ugasanga imiryango yabo ntibishyize ku ka rubanda ngo abantu bakurikiranwe banga kwiteranye, ubundi ngo ni ababyara bagomba kubirangirizwa mu miryango.

Venancie Tugireyezu
Venancie Tugireyezu

Minisitiri Tugireyezu Venancie, yavuze ko hari aho usanga umwana ahohoterwa imiryango ye ikabiceceka ntibijye ahagaragara.

Yagize ati:”Uyu mwanzuro wo gukurikirana abantu bahohotera abana wagiye ugira imbogamizi zitandukanye, hari aho ugera ugasanga nk’umwana yahohotewe ariko imiyango irabicecetse ngo batishyira ku ka rubanda, ngo uriya wamuhohoteye ni mubyara we, ugasanga ibibazo nk’ibyo byagiye bidindiza uyu mwanzuro”

Tugireyezu akomeza avuga ko nubwo hari imbogamizi zagiye zigaragara ku mwanzuro wo guhohotera abana ariko ngo hari ibyakozwe.

Ati:”Kuri uyu mwanzuro hari ibyakozwe kubera ko hari abantu bagize uruhare mu gufata abana ku ngufu cyangwa guhohotera abana, kugurisha abantu n’ibindi ubucuruzi bw’abantu n’abana, hariho abashoboye gukurikiranwa  barafatwa ndetse barabihanirwa. Hariho n’abakiri gukurikiranwa mu nkiko ariko kandi hakaba hari byinshi bitarakorwa ari na yo mpamvu twongeye kwiyemeza ko uzakomeza(umwanzuro) gushyirwamo imbaraga, abantu bose bagira uruhare mu guhohotera abana bagakomeza gukurikiranwa”.

Biteganyijwe ko imyanzuro itarashyizwe mu bikorwa uko byifuzwaga yafashwe mu mwiherero wabaye umwaka ushize ku nshuro ya 13, izagendera hamwe  n’iyafashwe muri uyu mwiherero uherutse kuba ku nshuro yawo ya 14.

Yakozwe na Nkurunziza Pacifique/touchrwanda.com

Leave a Reply