Amadini y’inzaduka mu Rwanda akomeje gutera urujijo abatari bake

0
334

Mu Rwanda hakomeje kuvuka amadini y’inzaduka uko bwije n’uko bukeye, ariko imyigishirize y’ijambo ry’Imana usanga abayagana bayikemanga.

Mu Rwanda hakomeje kuvuka amadini y’inzaduka
Mu Rwanda hakomeje kuvuka amadini y’inzaduka

Kubera ubwiyongere bw’amadini adasiba kuvuka hirya no hino mu gihugu, ababikurikiranira hafi bemeza ko ubu bwiyongere ari ubundi bwoko bwa Busnessi, ibi bituma hari abavuga ko ibi bitandukanye  n’intego ikwiriye abakozi b’Imana.

HAKIZIMANA Jean Claude umwe mu baganiriye na touchrwanda.com yagize ati”Aho ntuye ndabizi neza hari itorero ryaje muri iyi minsi ntabwo ari iminsi miremire cyane, ni nk’umwaka umwe ushize ariko wasangaga bajya gutura bagaturira mu mufuka wa pasiteri diregite(direct) atari ukuvuga ngo ni ibintu byavuzwe, bakaza bagashyira mu mufuka yambaye ikote, byabayeho si inkuru mbarirano njye ni ibintu niboneye” .

Uwamahoro Aline na we aganira na touchrwanda.com yagize ati”Mu by’ukuri na njye biriya bintu ndabigaya, Ibyo kuvuga ngo ntuture igiceri cy’ijana ngo ugomba gutura ibihumbi bitanu cyangwa arenzeho ndabinenga cyane. N’iyo ngeze mu rusengero nkasanga bari kubikora gutyo ndabinenga cyane. Bitewe n’uko buri muntu ntabwo aba afite ubwo bushobozi,ikindi umuntu atura uko umutima we wamwemeje.”

Aba baturage badatinya kuvuga ko bene aya madini ari inzaduka, barasaba inzego zitandukanye kugira icyo zikora, ngo ibyo bita ubutekamutwe bidakomeza kugira ingaruka, nk’uko hamwe na hamwe ngo byagiye bigaragara.

Uyu ni NSABIMANA Felix aganira na touchrwanda.com yagize ati”Ni amaronko, ni ukurya amafaranga y’abantu. Ngo noneho naguhanurira ngo uzamuha amafaranga,yarangiza kuguhanurira ngo noneho zana ituro ryo gushima Imana, kuko umwungeri mwiza ntaragirira ibihembo kuko uragirira ibihembo uwo ni umunyazi(kunyaga). kuko ari uw’ibihembo, ibihembo bidahari yaragira? Nkurikije uko aya madini y’inzaduka akomeza kwiyongera kandi ugasanga aho kwimakaza gusenga by’ukuri ahubwo bashyira imbere inyungu ziva mu bayoboke, numva ibyiza ari uko inzengo zitandukanye za leta zakurikiranira hafi aya madini bakamenya imikorere yayo kugira ngo ejo ubutekamutwe nk’ubwo budakomeza kwiyongera, abantu bazi ngo barasenga kandi atari byo. “

umuvugizi wa AEBR ishyirahamwe ry’amatorero y’ababatisita mu Rwanda, Dr. MUNYAMASOKO Gato Corneille,avuga ko atemeranya n’abigisha abayoboke babo ko Imana izajya ibafasha ku bw’amafaranga batanga, akavuga uko ubutumwa bukwiriye gutangwa.

Dr. MUNYAMASOKO aganira na touchrwanda yagize, ati”Abapasiteri ikintu cya mbere ntabwo ari amafaranga, ikintu cya mbere ntabwo ari ubukire umuntu ahita ajyamo. Icya mbere misiyo(mission) ya Yesu yari iyo gufasha abantu kwinjira mu bwami bw’Imana ariko icya kabiri anabafasha kugira imibereho myiza. Rero iyo ni yo misiyo, ubutumwa bwiza ndetse no gufasha abakirisitu kumenya amahirwe abegereye kuko amahirwe arahari. Aho kubashyiramo icyo kintu cyo kwisabira imigisha cyangwa ngo muzane mbasengere. Izo ni inyigisho z’ubuyobe. “

Ikigo cy’igihugu cy’imiyoborere mu Rwanda RGB, kinafite  aya madini mu nshingano ,Imibare giherutse gushyira ahagaragara yerekana ko  mu mwaka wa 2012 ari bwo hatangiye kwandikwa amadini ,kugeza ubu asaga 1500, ngo niyo yaba amaze kwandikwa. Iyi mibare ishobora kurenga kuko ngo amenshi  yaba akora atanditse.

Yanditswe na Janvier Hakizimana   

Leave a Reply