EAC: Umuhanda mpuzamahanga ugiye gutangira kubakwa

0
87

Umuhanda mpuzamahanga uzifashishwa mu bucuruzi bw’umuryango w’ Afurika y’Uburasirazuba uzahuza Kenya na Tanzaniya uturutse Mombasa werekeza Bagamoyo, kuri ubu wamaze kwigwaho.

Umuhanda mpuzamahanga ugiye gutangira kubakwa
Umuhanda mpuzamahanga ugiye gutangira kubakwa

Uyu muhanda ugiye kubakwa n’umuryango w’Afurika y’Uburasirazuba (EAC) biteganyijwe ko uzaba ufite ibirometero 450, ukaba ugomba kuzatwara akayabo k’amadorali ya Amerika angana na milioni 600.

Uyu muhanda uturuka Malindi winjira i Mombasa na Lunga Lunga ku ruhande rwa Kenya, mbere yuko wambukiranya muri Tanzania (Tanga), ubanza guca  Pangani na  Saadani ari na ko werekeza Bagamoyo.

Daily News yo muri Tanzania iratangaza ko uyu mushinga wizweho n’umunyamabanga mukuru w’umuryango w’Afurika y’Uburasirazuba, Ambasaderi  Liberat Mfumukeko hamwe n’abanyamabanga nshingwabikorwa ba banki y’Afurika itsura amajyambere (AFDB) mu mpera z’icyumweru gishize.

Ubwo bari ku cyicaro gikuru cya EAC, aba bakozi ba AFDB,  baganiriye ku bufatanye bwa banki ndetse n’imishinga y’akarere kuva ubwo basinyanye amasezerano y’ubufatanye muri 1998.

Aya masezerano yasinywe, umusaruro yaje gutanga ni ugutera inkunga imishinga myinshi itandukanye y’aka karere cyane cyane mu bigendanye n’imihanda hamwe n’ingufu z’umuriro.

Iyi banki y’Afurika AFDB yamaze kwemeza gutera inkunga uyu muhanda  uzaturuka Malindi-Mombasa- Tanga werekeza  Bagamoyo, ikaba igiye guhita itanga amafaranga ya mbere yo gutangira kubaka guhera isaha iyo ari yo yose ubu ukazarangira nyuma y’imyaka 3.

Uyu muhanda witezweho guteza imbere ubucuruzi bw’akarere ndetse n’ imbibi zako, ubukerarugendo, ibikorwa bitandukanye by’amajyambere ndetse ni urwego rwo kuvugurura ibikorwa remezo ku ruhande rwa Kenya ndetse na Tanzania by’umwihariko hagati ya  Mombasa na Bagamoyo.

Usibye uyu muhanda wa Malindi-Bagamoyo ,AFDB  kandi yateye inkunga iyubakwa ry’umuhanda wa  Arusha-Namanga- Athi River warangiye mu mwaka wa 2012 kimwe n’umuhanda ucyubakwa uturuka  Arusha – Holili na Taveta.uyu muhanda ukaba waramaze kuzura ku ruhande rwa  Kenya iyubakwa ry’uyu muhanda rikaba rikomeje ku ruhande rwa Tanzania.

Yanditswe na Schadrack Mukeshimana

Leave a Reply