Green Party yiteguye kubaka urukuta rutandukanya u Rwanda n’abarushotora

0
506

Mu gihe mu kwezi kwa Kanama hategerejwe igikorwa cy’amatora y’umukuru w’igihugu, umukandida uhagarariye Ishyaka riharanira Demukarasi n’Ibidukikije Dr Frank Habineza, avuga ko mu rwego rw’umutekano bazihutira kubaka urukuta ku mipaka y’u Rwanda  ikunda guhura n’ikibazo cy’umutekano muke.

Dr Frank Habineza uwakabiri uhereye iburyo
Dr Frank Habineza uwakabiri uhereye iburyo

Dr Frank Habineza umukandida ugiye guhagararira Ishyaka Riharanira Demukarasi n’Ibidukikije, avuga ko we n’ishyaka ahagarariye barebye uduce tumwe na tumwe nka Musanze, Rubavu na Burera aho abaturage baho bakunda guhura n’ababahungabanya ndetse bamwe bakahasiga ubuzima, ngo igisubizo ari ukubaka inkuta zitandukanya u rwanda n’ibindi bihugu bikora kuri utwo turere noneho ngo abasirikare bakajya ku mipaka izwi.

Yagize ati:”Hagaragajwe ibibazo by’umutekano cyane cyane mu turere twa Musanze, twa Burera mu Ruhengeri duturiye n’ibirunga ndetse na za Rubavu ku Gisenyi, ahantu hahora haba ibitero biza bikica abaturage ndetse n’amabombe agaterwa mu gihugu ibyo bijya biba kenshi, so mu bisubizo twatekerejwe ni byinshi ariko kimwe muri ibyo nuko hazubakwa urukuta nkuko habaye igeragezwa ryo kubaka urukuta rutangira inyamaswa muri parike y’ibirunga, kandi uru rukuta rukaba rwaragize akamaro  ndumva noneho hubatswe urundi rukuta rurerure rushobora kuzagira akamaro mu kubungabunga umutekano w’igihugu  noneho abasirikare benshi bakaba bari ku mipaka izwi, ariko cyane cyane ahantu batashobora kuba bagera  hakaba hari urukuta harimo n’izo za kamera zishobora kuba zafasha gukontorora”.

Dr Frank Habineza akomeza avuga ko nta wundi mukandida biteguye guhangana na we mu matora, uretse Perezida Kagame uzahagararira umuryango FPR Inkotanyi mu matora y’umukuru w’igihugu ategerejwe n’abanyarwanda.

Ati:”Twebwe umukandinda tuzi twibandaho ni umukandi w’ishyaka rya FPR Inkotanyi uyoboye igihugu, kubera ko n’ubundi twebwe niryo shyaka twatangiye duhangana na ryo, niryo twiyopoza ku bitekerezo byabo. Ni ukuvuyga ngo abandi bakandida ntacyo tubatekerezaho gusa ibyiwe turabizi yuko afite ubushobozi bwinshi kubera ko amaze imyaka 20 ayoboye igihugu, ariko ibyo ntabwo bidukanga kuko natwe dufite ubunararibonye kandi dufite ubushobozi ndetse dufite na benshi batangije ishyaka rye turi kumwe na bo  ari experience natwe turayifite,  kandi ubwo turi kumwe na bo natwe batugira inama uburyo dushobora gutsinda aya matora kandi tuzayatsinda”.

Ishyaka Riharanira Demukarasi n’Ibidukikije riri gutegura amatora, aho ngo riteganya gutakaza amafaranga agera kuri miliyoni ebyiri z’amadorali y’Amerika. Iri shyaka ngo rikaba ryiteguye kuzemera ibizava mu matora naba yagaragayemo umucyo n’ubwisanzure.

Nkurunziza Pacifique/touchrwanda.com

Leave a Reply