Igiceri Program gahunda yo kurandura ubukene mu murenge wa Nduba

0
288

Gahunda ‘Igiceri Program’ ni imwe muri gahunda zatangijwe mu rwego rwo kwiteza imbere, ndetse no gusigasira umuco wo kuzigama mu baturage bo mu murenge  wa Nduba,  mu karere ka Gasabo.

Igiceri Program
Igiceri Program

Iyi gahunda yabashije kuvana bamwe mu bukene nubwo na none mu myaka igera muri itatu itangiye hari abatari bakayimenye.

Mu kagali ka Kigabiro mu murenge wa Nduba mu Karere ka Gasabo, abaturage  baganiriye na touchrwanda.com bavuga ko bamaze gutera imbere kubera guha agaciro gakwiye igiceri cy’amafaranga ijana.

MUKAMANA Odette aganira na touchrwanda yagize ati “Igiceri cy’ijana urakijyana ukagishyira mu gasanduka bakaguha ikarita ugenda ubitsaho cya giceri cy’ijana ijana, wamara kuyajyana akagenda agwira. Waba ukeneye kugura itungo runaka aragenda akagera no mu bihumbi myakumyabiri(20,000Rwf) ndetse na mirongo itanu ageramo(50,000Rwf).”

MUSONERA Theogene na we aganira na touchrwanda.com yagize, ati “Cya giceri porogarame!  Ukwezi kwashira nkagenda nkavuga nti ndashaka aya n’aya, nkagura nk’ipantalo yanjye nkajya gutemberana n’abasore bagenzi banjye. Ubwo rwose nari imbwa mbigaragaza ko ndi imbwa ariko ubu ndi umusore  ubu ndetse twiguriye imodoka izajya udutwara hariya hakurya.”

Nubwo kandi iyi gahunda imaze imyaka igera kuri itatu hari bamwe bavuga ko batari bigera bumva  iby’iyi gahunda ku buryo byatuma na bo bamenya ibyiza byayo.

Uyu ni umusaza Gasasira Silasi aganira na touchrwanda.com yagize ati “ Igiceri porogarame? Reka da! Babitsa amafaranga? Ntabwo nzi uko babitsa amafaranga! Uhuuu! Ntawurabimbwira, nta n’uwo ndabyumvana!”

Touchrwanda.com yavuganye n’umuyobozi wa sacco ishami rya Gasanze muri uyu murenge wa Nduba na we yemeza ko iyi gahunda y’igiceri porogarame(programme) imaze gufasha benshi.

SACCO ishami rya Gasanze
SACCO ishami rya Gasanze

NZAYISENGA Obedi, umuyobozi w’iyo SACCO yagize ati “Kwizigama ntibigombera ubutunzi bwinshi cyane bw’umurengera, ahubwo tubashishikaririza ko no guhera ku giceri cy’ijana gusa bazamuka bakabona ejo hazaza habo heza. Ariko ubu i Gasanze duhagaze kuri miliyoni mirongo ine n’eshatu n’ibihumbi ijana na myakumyabiri n’amafaranga magana cyenda na mirongo cyenda(43,120,990Rwf). Ayo ni amafaranga abaturage bose babikije muri gahunda y’igiceri porogarame. Igihe gishize ni imyaka itatu, kubona igiceri kimwe cy’ijana twagihaye agaciro. Turavuga ngo igiceri kimwe cy’ijana tugikusanyije mu gihe runaka cyazamura abaturage. Abatarabyumva rero icyo twabona ni ukubabera urugero rwiza kuko abamajije kutwumva bamaze kuzamuka, hari ababikije igiceri porogarame bakibonera imodoka, hari ababikije mu giceri porogarame bakibonera inzu, hari ababikije mu giceri porogarame babona icyo kurya. Dushishikariza ba bantu batarabimenya ko na bo bazamuka bakamenya ibyiza by’igiceri porogarame.”

Iyi gahunda yatangijwe n’abaturage bo mu murenge wa Nduba, igamije kurandura ubukene, kuri ubu ikaba yifuzwa no mu mirenge hirya no hino mu gihugu.

Yanditswe na Janvier Hakizimana     

Leave a Reply