Kenya: Abatavuga rumwe na leta ngo nibo bashobora kurangiza imyigaragambyo y’abaganga

0
121

Abagize inteko ishinga amategeko mu gihugu cya Kenya basabye perezida Uhuru Kenyatta ko yatanga uburenganzira ku batavuga rumwe n’ubutegetsi bari muri iki gihugu, bakamufasha gushyira iherezo ku myigaragambyo y’abaganga imaze iminsi  itari mike muri iki gihugu.

Imyigaragambyo y'abaganga muri Kenya ngo yarangizwa n'abatavuga rumwe n'ubutegetsi
Imyigaragambyo y’abaganga muri Kenya ngo yarangizwa n’abatavuga rumwe n’ubutegetsi

Bamwe mu bagize inteko ishingamategeko barimo Opiyo Wandayi, Jakoyo Midiwo hamwe na Omondi Muluan batangaje ko biteye isoni kumva ko leta y’iki gihugu yananiwe kurangiza iki kibazo cy’imyigaragambyo, imaze iminsi isaga 90 yose.

Bakomeje bavuga ko bidakwiye ko leta yahamagarira amadini kwivanga muri iki kibazo nyuma yuko inaniwe kwishakamo igisubizo mu gihe cy’amezi atatu yose.

MP Wandayi yagize ati ” Ibi ni ukunanirwa n’inshingano guhamagara amadini kugira uruhare muri iki kibazo, perezida Uhuru Kenyatta agomba kureba kure  akubahiriza inshingano ze, agakemura ibibazo bibangamiye abaturage. Imyigaragambyo y’abaganga imaze amezi atatu yose ngio ni ikintu kitigeze kibaho n’ahandi hose ku isi, none kugeza ubu nta n’igisubizo gifatika kiraboneka’’

Wandayi yakomeje agira ati”  Perezida Uhuru Kenyatta aramutse agize ishyaka ryo  kwitabaza  abayobozi batavuga rumwe n’ubutegetsi, rwose ntibyarenga amasaha abiri gushyira iherezo kuri iyi myigaragambyo. Rwose abatavugarumwe n’ubutegetsi bariteguye gutanga ubufasha,gusa ikibura ni ubutumire”

Nkuko igitangazamakuru The Standard cyabigaragaje, aba baganga bamaze igihe cyingana n’iminsi 90 mu myigaragambyo, kuri ubu barasaba kongezwa umushahara wabo nkuko byari biteganyijwe ngo kuko batishimiye n’agato umushahara bari guhembwa.

Yanditswe na Schadrack MUKESHIMANA

Leave a Reply