Kimisagara: Haravugwa ubwumvikane buke mu ishyirahamwe ry’abazunguzayi

0
494

Bamwe mu bahoze bakora ubucuruzi butemewe bwo mu muhanda mu Murenge wa Kimisagara, bazwi ku izina ry’abazunguzayi batangiye gusubira muri ubu bucuruzi kubera amakimbirane ari hagati muri bo.

ubucuruzi butemewe
ubucuruzi butemewe

Hafi ya ruhura hejuru y’ikiraro mu muhanda ni ho usanga abantu batandukanye, bari gucuruza imboga. Abahacururiza  bavuga ko bahoze mu ishyirahamwe aho bari bibumbiye hamwe mu bucuruzi bwabo, ariko kuri ubu bakaba barongeye gusubira mu muhanda. Abacururiza muri uyu muhanda bavuga ko amakimbirane yagaraye hagati muri bo ko ari yo ntandaro yo kuwujyamo.

Kantengwa Immacule umwe mu bazunguzayi aganira na touchrwanda.com yagize ati “Ubwo nyine nta bwumvikane bwari mo nk’uko twahakoreraga bakirirwa batongana, bashwana ndetse barwana. Ibyo rero nkabyanga bituma dushwana ni ko kugaruka hano mu muhanda.”

Nyiramariza Peace na we aganira na touchrwanda.com yagize, ati “Naranguraga ibintu bakabyiba, nashyira hasi ikintu na cyo bakakiba,ibyo byose bigakorwa n’abo tubana mu ishyirahamwe.”

Mu mpamvu nyinshi zabateye amakimbirane hari abadaca ku ruhande amafaranga y’inguzanyo bahabwa n’ubuyobozi kugira ngo babashe kwiteza imbewe, bakavuga ko ari yo nyirabayazana.

Nyinawumuntu Clementine umwe mu bazunguzayi aganira na touchrwanda yagize, ati “Nk’ubu bajya gufata amafaranga leta iduha ngo twiteze imbere n’abasigaye inyuma bakabibahisha bo bakagenda bihishe ntibabwire bagenzi babo bamara kuyafata bagatangira kuryana bagashwana.”

Mujawayezu Claudine, umunyamabanga nshingwabikorwa w’akagali ka Katabaro yavuze ko ayo makimbirane ntayo bari bazi, gusa yongeraho ko bagiye kubikurikirana bakareba umuti wabyo.

Yagize ati“Ayo makimbirane ntayo twari tuzi gusa twajyaga tubasanga tukabaganiriza bakatubwira ibibazo bafite hagati yabo ariko icyo ntabari bakakitubwiye, ubwo turaza kongera kubegera tuvugane na bo kandi turabafasha tugikemure. Ubundi ubucuruzi bw’akajagari ntabwo bwemewe, ni yo mpamvu twahisemo kubashakira ahantu bakorera kandi heza hatateza ikibazo. Ni yo mpamvu iyo tubasanze ku mihanda tuhabakura tukababwira ko bitemewe ko bagomba gusubira aho bemerewe gukorera, ibyo rero bakoze biba binyuranyije n’amategeko. Ingamba ya mbere twari twafashe ni iyo kubanza kubashakira aho gukorera kandi hafi y’aho batuye. Icyo twagendeyeho ni uko buri wese wakoreraga mu muhanda twakoze urutonde tubasaba kujya mu matsinda bamajije kwishyira hamwe ni bwo bagiye bahabwa inguzanyo. Ntawigeze atoranya ngo ni runaka ahubwo twanditse dukurikije uko bakoreraga mu muhanda kandi uko banaziranye. Turanabengera tubaganirize tubanze tumenye ikibazo icyo ari cyo noneho tubafashe no kugikemura. Icyangombwa ni ukugira ubwo bushake, tukaba dusobanutse nk’abanyamujyi, gusobanuka mvuga akaba ari ugusobanuka mu mutwe, ukumvira inama abayobozi bakugira kugira ngo noneho nawe uzabashe kwiteza imbere.”

Ubuyobozi bw’umujyi wa Kigali bwahagurukiye ubu bucuruzi abenshi bita ubw’akajagari kubera ko bwakunze kugaragaramo ibibazo byinshi birimo kwica ndetse no gukomeretsa n’imirwano hagati y’abakora ubu bucuruzi.

Yanditswe na Janvier Hakizimana         

Leave a Reply