“Kuki tutafatanya dushyize hamwe tugakura abana ku muhanda?”-Belinda

2
205

Ni Rwanda rw’ejo, nibo ahazaza h’igihugu u Rwanda twifuza hubakiyeho uko turi kuri ubu byaba bibabaje biteye inkeke icyerekezo igihugu nku Rwanda dufite hatazaboneka urundi rungano ruzakomeza gutera ikirenge mu cy’abazaba bageze mu zabukuru ngo babakorere mu ngata.

Kimwe mu bibazo bigiteye inkeke muri iki gihugu cy’u Rwanda ni ubuzima bw’abana bo ku muhanda aba bazwi ku izina rya mayibobo, ni ubuzima buhangayikishije iki gihugu akenshi na kenshi imvano ya byose ikaba ituruka ku makimbirane ya hato na hato mu miryango.

Iyo utembereye hirya no hino mu mihanda igize umujyi Kigali uhasanga urubyiruko rubayeho mu buzima buteye inkeke bwo ku muhanda, rimwe na rimwe hari abo uzasangana agacupa karimo colle (kore) agenda akurura n’itabi ku munwa, mu bo n’abashije kuganira n’abo benshi bambwiye ko impamvu yo gufata ibi biyobyabwenge bita ibikoresho ari ugushaka kwirengagiza amateka y’ubuzima bwabo baba baranyuzemo bikababera imvano yo kujya ku muhanda. Bamwe muri bo banyizezaga ko babonye icyabakura ku muhanda nta kabuza bawuvaho.

Irakiza Jean d’Amour w’imyaka 11 y’amavuko uvuka mu muryango w’abana icumi  ni umwe mu bana babarizwa ku muhanda baganiriye na Touchrwanda. Mu kiganiro twagiranye yagarutse ku ntandaro yo kujya ku muhanda ko imvano yabyo ari urupfu rw’umubyeyi we (mama) watabarutse maze se ntiyabitaho ahubwo akazajya aza iteka yasinze akabakubita ahitamo kumuhunga.

Akenshi na kenshi ubuzima bwo kwerekeza ku muhanda buturuka ku kuba hari bamwe mu basore n’inkumi bishora mu ngeso z’ubusambanyi budakingiye bikabakururira gutwara inda zitateguwe ari ho uzasanga mu kuvuka ku mwana haba umugore cyangwa umugabo muri bose nta wabiteguye.

Nubwo hari abana bajyanwa mu bigo ngororamuco buri mwaka gusa umubare wabo ntubura kwiyongera ubutitsa bw’abinjira mu muhanda biturutse ku bibazo byo mu miryango aho benshi muri bo bashinja ababyeyi babo kuba banyirabayazana bo kuyijyamo.

Leta y’u Rwanda binyuze muri minisiteri y’ubutabera, Minisitiri Johnson Busingye Asoza umwiherero wa gatanu w’inzego zifite aho zihuriye n’ubutabera ku wa 1 Mata 2016  yatangaje ko ababyeyi bareka abana bakajya kuba ku mihanda bagiye kuzajya bakurikiranwa mu mategeko.

Umutoniwase Belinda ni izina ryamenyekanye mu marushanwa yo gushakisha uzambikwa ikamba rya nyampinga w’u Rwanda 2017 mu mushinga we yahaye izina rya ‘Garuka Kibondo’ yagize nyuma yaho mubyara we yaje gufata ibiyobyabwenge ntacyo yari abuze mu muryango akaza kujyanwa mu kigo ngorora muco Iwawa nyuma yaho akazumva inkuru ya kababaro ko mubyara we yishwe n’amazi agerageza gutoroka, kuva ubwo Belinda agira igitekerezo cyo kuzashinga umuryango ugamije guhumuriza abana bo ku muhanda byashoboka akabafasha kuva muri ubwo buzima bubi.

Belinda yabashije kwiyegereza bamwe mu bana babaga muri ubu buzima nyuma y’urupfu rwa mubyara we maze yumvise ko bamwe babitewe n’amakimbirane ya hato na hato mu miryango baturukamo akaba ariyo mvano yo kwerekeza ku muhanda.

Belinda mu kiganiro yahaye Touchrwanda yagize ati: “… Naje gusanga buri mwana uri ku muhanda afite impamvu ze bwite zatumye awujyaho, urugero ni umwana twaganiriye ambwira uburyo atabasha kwihanganira uburyo nyina yinjiza abagabo uko yishakiye mu rugo, hari n’abandi ba nyina babirukana ngo babone uko binjiza abandi bagabo.”

Belinda akaba asaba abanyarwanda bose ko bahuriza hamwe imbaraga bagafatanya ku rwanya icyatera umwana kujya ku muhanda, ndetse akaba ari gukora igenamigambi ku mushinga we wa ‘Garuka kibondo’ aho azarushaho kwiyegereza bamwe muri abo bana akabereka ububi bwo kuba bari ku muhanda kuri bo ndetse no ku gihugu cyabo.

Belinda Umutoniwase
Belinda hamwe na Ronaldinho umwe mu bana yafashije kuva ku muhanda

 

2 COMMENTS

  1. Bélinda, Uwiteka azakwiture Ineza yose ugirira abandi biratangaje kwiyibagirwa ukarazwa ishinga no gukura ibiremwa bya nyagasani mubuzima busuzuguritse….Ndibutse ijambo wavuze ko wakuze Umubyeyi wawe akubwira ko ” Umuntu ari nkundi” nibyo koko nanjye nakongera nkavuga nti” Ineza ntawe itabera….Courage…Umuremyi azakomeze kuvufasha kuri projets zose ufitiye inzirakarengane…Be blessed

Leave a Reply