Marsabit muri Kenya inzara yugarije abanyagihugu

0
96

Mu gihugu cya Kenya mu gace kazwi nka Kalacha, Marsabit abantu babiri bamaze kwemezwa ko bitabye Imana bazira ikibazo cy’amapfa, ari nako abandi batari bake bafite impungenge ko umubare w’abapfa ushobora kwiyongera mu gihe iki cyiza cy’amapfa kigikomeje.

si abantu gusa n'amatungo ari kuhasiga ubuzima
si abantu gusa n’amatungo ari kuhasiga ubuzima

Bwana Gumato Ballo, umuturage ucururiza mu isoko rya Kalacha yatangaje ko bahawe imfashanyo na leta ariko ngo ibyo kurya bikomeje kuba intica ntikize, kuko ngo ntibihagije.

Yagize ati: “ibiro bine by’ibigori n’ibiro bibiri by’ibyishyimbo ntibishobora kumara nibura iminsi ibiri ku muryango nibura muto .

Ingo zirenga 140 nta nubwo iyi mfashanyo bo baranayibonaho ubu ubuzima bwabo bukaba buri mu mazi abira”

Ubwo yaganiraga na Daily Nation umuyobozi uhagarariye aka gace ka Kalacha, Denge Gorai yagize ati:“Abantu benshi bamaze gutakaza ubuzima bwabo kubera ikibazo cy’amapfa, kuri ubu ubuzima burahenze cyane. Gusa abaturage ntabwo batangaza yuko hari abapfuye cyane cyane ku bageze mu za bukuru, gusa tubasha kumenya abahafi duteraniye.”

Si abantu gusa bari gupfa kubera inzara ahubwo n’amatungo muri iki gihugu mu duce twibasiwe n’ibi byago ngo ari  kubura ubuzima ku bwinshi  nkuko Boru Roba umuturage wo muri aka gace yabitangaje. Shibo Boru  w’imyaka 70 ukomoka mu gace ka Elgade we yavuze ko bimusaba  gukora urugendo rurerure cyane ajya gushakisha aho yaronka icyo kurya.

Nkuko byatangajwe muri Mutarama perezida Uhuru Kenyatta, yari yasezeranyije ko leta y’iki gihugu izakuba kabiri ibiryo byo gufasha abaturage muri aka gace kibasiwe n’amapfa. Kenyatta ubwo yari mu bikorwa byo gukangurira abaturage kwitabira amatora nibwo yasezeranyije abaturage bo mu gace ka Marsabit ko leta igiye gutegura ingengo y’imari ihagije igomba gufasha aba banyagihugu mu kibazo k’imirire.

Yagize ati:“turi kwiga ku kibazo cy’ingingo y’imari igomba gufasha uduce twugarijwe n’ikibazo cy’inzara”

Iki kibazo cy’amapfa kandi cyagize ingaruka ku myigire y’abanyeshuri  mu bigo bitandukanye ngo kuko babuze icyo kurya,Kalacha Primary School ni ikigo  giherereye mu gace k’amajyepfo kuri ubu ntikikibona amafaranga y’ishuri yakagombye guhahiramo abanyeshuri ibyo kurya, kandi na none ngo ntibyoroshye ko abanyeshuri boherezwa mu rugo kuko naho nta gihari.Gusa na none Umuyobozi w’iki kigo Ibrae Koke  yatangaje ko bikomeje kugorana cyane kugumana abanyeshuri bagera kuri 327 ku ishuri kandi ntabyo kurya Bihari.

Yagize ati “Nta byo kurya biri ku bigo by’amashuri kimwe no mu rugo, mu cyumweru gishize twendaga gufunga ikigo ariko ku bw’imfashanyo twahise duhabwa na PACIDA ubu nibura dushobora gukomeza nk’ibyumweru bibiri mu gihe tugitekereza ubundi buryo twakwitabaza”.

Gusa nubwo leta y’iki gihugu ndetse n’imiryango itegamiye kuri leta bigerageza gutanga ubufasha, abaturage benshi baracyafite ikibazo gikomeye cyo kubura ibyo kurya, amazi ndetse n’ubuvuzi.

Yanditswe na Schadrack MUKESHIMANA

Leave a Reply