NGOMA: Ibura ry’amashanyarazi ryasigaje inyuma abaturage ba Mutenderi

0
316

Abaturage batuye mu murenge wa Mutenderi bo mu tukagari twa Muzingi kimwe na Nyagasozi mu karere ka Ngoma,  baravuga ko basigaye mu bwingunge kuberako ngo basigaye muri bake  bataregerezwa umuriro w’amashanyarazi  muri uyu murenge, mu gihe mu tundi duce iki kibazo cyakemutse kera.

Mutenderi baracyari mu bwigunge?photo internet
photo internet

Mu kiganiro bagiranye na Radio Izuba ubwo bagaragazaga agahinda batewe n’iki kibazo, umwe mu baturage yagize ati:“amashanyarazi ubu twe ntayo dufite, telefoni ntitubona uko tuzicaginga ubu tugombera kuzicaginga ku mabateri na yo aturutse ikibungo ahari umuriro. Televiziyo yo ni ibindi bindi kuko  ntituyibona yewe ntitunayizi  tubyumva kuri radio gusa.Twebwe mu bigaragara turi inyuma kuko ahandi imiriro yageze bareba amakuru ku mateleviziyo, imikino n’ibindi biganiro bitandukanye”.

Aba baturage bakomeje bagira bati: “Twasigaye mu bwigunge kuko nk’iyo hari igikorwa runaka yenda hari nk’abashyitsi baje gusura igihugu cyacu ntitunabimenya, yenda niyo tubyumvise nyine ni ku maradiyo gusa kuko amashusho yo ntitwayabona. Amamashini ubu na yo ntawabona uko ayakoresha kimwe n’ama smart phone kuko murabizi uburyo zirya umuriro”

Aba baturage kandi ngo hari ibikorwa bifuza gukora ariko umuriro ukababera ikibuza

“Dushobora nko gusudira cyangwa se nk’ibi byuma bisya ahenshi ntibiboneka kubera ikibazo cy’umuriro w’amashanyarazi,rero turifuza ko na twe ibikorwa remezo byatugeraho”

Umunyamabanga nshingwabikorwa w’umurenge wa Mutenderi, Muragijemungu Alcade yijeje aba baturageko iki kibazo kiri mu nzira yo gukemuka

Bwana Alcade yagize ati:“Ngira ngo iki kibazo cy’amashanyarazi bakikubwiye bazi yuko kiri mu nzira kuko kugeza ubu bamaze gupima aho amapoto azajya  na bo barahabonye, za Taransifo aho zizajya harahari, ndumva turi mu mirenge itandatu akarere ka Ngoma gafatanyije n’umushinga BTC na IRB muri LEG bagomba gukonekita(connect) umuriro w’amashanyarazi muri turiya tugari twose harimo n’utwa Murama n’iwacu Nyagasozi ndetse na Muzindira ,ntabwo bigomba kurenza uyu mwaka wa 2017/2018 batabonye umuriro w’amashanyarazi kandi na bo barabizi ko batangiye gupima ahazaca amapoto.”

Gusa aba baturage nubwo bijejwe gukemurirwa ikibazo mu bigaragara ngo ntibanyuzwe100% n’iki cyizere bahawe n’umuyobozi w’umurenge ngo kuko atari ubwa mbere bizezwa ko bagiye guhabwa amashanyarazi bikarangira amaso aheze mu kirere.

Ministeri y’ibikorwaremezo mu Rwanda (MININFRA) ivugako intego leta y’u Rwanda yihaye ari uko muri uriya mwaka utaha wa 2018 abanyarwanda bagera kuri 70% bazaba bafite amashanyarazi.

Gahunda ya guverinoma y’U Rwanda y’imyaka 7 (EDPRS 2) yatangiye mu mwaka wa 2010 ubu ivuga ko umubare w’abanyarwanda bakoresha umuriro w’amashanyarazi bagomba kugera kuri icyo kigereranyo nkuko biteganyijwe mu ngingo y’imari y’umwaka wa 2017/2018.

Leave a Reply