Rulindo: Ubworozi bw’ingurube bumaze guha imibereho myiza abatari bake

0
429

Uko bwije n’uko bukeye abanyarwanda batari bake bagenda basobanukirwa igikwiye kugira ngo babashe kwihaza mu biribwa, nkuko bigaragara mu karere ka Rulindo ubworozi bw’ingurube bwa kijyambere no gutunganya inyama zabwo bimaze kubaha imibereho myiza.

ubworozi bw'ingurube bumaze gufata indi ntera mu Rwanda
ubworozi bw’ingurube bumaze gufata indi ntera mu Rwanda

Mu gihe cyashize wasangaga abahinzi n’aborozi bakora uyu murimo ku buryo nta musaruro byatangaga, nyamara kuri ubu ubuhinzi n’ubworozi bimaze gutera imbere mu gutanga umusaruro mwiza kandi mwinshi uhagije ababukora.

Mugabo Theophile umwe mu bakora uyu mwuga aganira na touchrwanda.com yagize, ati“Urebye aka kazi kangiriye akamaro cyane! Nabashije kugira urugo rwiza, umuryango wanjye na wo ubasha kubaho neza ndetse nkabasha kubona amafaranga narihira umwana mu ishuri nyakomoje muri aka kazi nkora.”

Nkusi Emmanuel umwe mu batuganya izo nyama aganira na touchrwanda.com na we yagize ati “ Inganda nk’izi ni igikorwa cyiza cyane kuko gikura abantu mu bukene nk’ababashije kubona mo akazi. Urugero nka njye aka kazi kanteje imbere nkakoze igihe kinini, nabashije kwiyubakira inzu nziza yo kubamo n’umuryango wanjye. Mbere ntarabona aka kazi nari umuntu w’umukene urabyumva mpinga, nza kugira amahirwe mbona aka kazi ariko ubu kanteje imbere ku buryo numva byishimiye. Kuko ibi ni umwuga uri hano iyo washoboye kumenya uyu mwuga ushobora gukorera amafaranga ukiteza imbere n’imiryango yawe.”

BIZIMANA Prudence

BIZIMANA Prudence, umuhinzi mworozi ubikora by’umwuga mu kiganiro na touchrwzanda.com avuga ko byamugiriye akamaro ubwe ndetse n’abandi kuko aha akazi abatari bake, akanavuga ko yigeze gukora akazi ariko ntatange umusaruro.

Yagize, ati“Ubworozi bwanjye ni ubworozi bw’ingurube buvanze n’inkoko noneho nkaba naratangiye n’umushinga wo koroza abaturage kugira ngo ntazabura aho mvana ingurube kuko ubu nageze ku gihe cyo gukora uruganda. Mu bworozi bwanjye mfite abakozi barenga cumi na babiri bahoraho, nkagira na dogiteri viterineri( docteur veternaire) ubishinzwe, nkagira n’umwungirije.

Mfite abakozi bagera kuri cumi na bane bashinzwe ibintu by’ubworozi. Nkaba mfite abakozi bahinga bahoraho bagera kuri mirongo inani na batanu bahembwa ku kwezi. Na njye mfite icyo mariye igihugu kandi nkaba nkimariye n’abaturage bakaba babona icyo bankuraho, nanjye nkaba mbibonamo inyungu. Kuko cyera nkikora muri leta nari umukozi uhembwa gusa na njye ntatanga umusaruro.”

Jean Claude MUSABYIMANA, Guverineri w’intara y’amajyaruguru mu kiganiro na touchrwanda.com avuga ko bidahagije guha umuntu ibiryo ahubwo igikwiye ari uguhanga umurimo ugaha abandi akazi.

Yagize, ati “Gufasha umuturage neza atari kumuha ibiryo gusa! Na byo ni byo iyo ushaka kumuramira kugira ngo aticwa n’inzara, kugira ngo abashe gukora ,ariko si byo kampala(si byo bya ngombwa). Ubundi bya byiza uhaye umuntu umurimo, iyo uhaye umuntu umurimo bituma abasha kwitunga ndetse ntabwo aba ari na we wenyine uba ufashije kuko uba umufashije ariko unafashije n’abandi n’abazamukomokaho. Dusaba abafatanyabikorwa bacu ko badufasha gukora ibikorwa biha abaturage benshi akazi bahereye cyane cyane kuri bariya bafite ibibazo by’imibereho. Wize imyuga uri urubyiruko uraza bakakuguriza ibikoresho kandi ibyo bikoresho byo ntabwo bisaba ingwate kuko ibikoresho ubwa byo ni ingwate.”

Umusaruro w’ubuhinzi udahagije ugarukwaho kenshi mu bituma inzara irushaho kwiyongera. Gusa ubuhinzi n’ubworozi bwa kijyambere no gukoresha inyongeramusaruro n’imbuto z’indobanure ni byo leta y’u Rwanda yatangiye gushishikariza abahinzi hirya no hino mu gihugu, hagamijwe kwihaza mu biribwa ndetse no gusagurira amasoko.

Yanditswe na Janvier Hakizimana   

LEAVE A REPLY

Please enter your comment!
Please enter your name here