Sudani y’Epfo: Inzara ikabije yatumye barya indabo zera mu mazi

0
102

Muri sudani y’Epfo haravugwa inzara ikabije ,ku buryo abaturage bagiye gutura mu bishanga  aho barya indabo zera ku byatsi byo  mu mazi bakunze kwita amarebe .

Daily Monitor itangaza ko ibibazo bimaze imyaka igera kuri itatu biri hagati ya Perezida Salva kiir wa Sudani y’Epfo na Riek Machar wo mu ishyaka ritavuga rumwe na leta ngo nibyo byabaye nyirabayazana y’ ikibazo cy’inzara ndetse n’umutekano muke.

Kugeza ubu abarenga ibihumbi 100 by ‘abaturage barembejwe no kubura ibyo kurya, ndetse ngo bahunze ingo zabo bamwe bajya mu nkambi aho bari bizeye ubufasha ,abandi bajya kwibera mu bishanga kuko ingo zabo bazikuwemo n’umutekano muke .

Aba baturage bavuga ko ubuzima butabamereye neza, aho bari mu bishanga ngo kuko batunzwe n’indabo z’amarebe cyangwa guhiga, bavuga ko  harya umugabo hagasiba undi, Bol Mol umugabo wari ushinzwe umutekano mu ruganda rw’amavuta akaba yarahungiye mu gishanga n’abagore be batatu.  Yagize ati’’Ubuzima hano ntacyo bumaze ‘’

Muri iki cyumweru gishize nibwo Umuryango w’Abibumbye watangaje ko muri iki gihugu hari inzara, imiryango ifasha ikaba yaragiranye ibiganiro na leta ya Sudani y’Epfo  ndetse n’imitwe y’abatavuga rumwe na leta,   kugira ngo hashyirweho ikigo bahurizamo abaturage bakababarura kugira ngo babone uko babaha imfashanyo .

Nyuma y’amasezerano y’amahoro  yasinywe muri Kanama 2015 atarashyizwe mu bikorwa, amacakubiri yakomeje kwiyongera muri iki gihugu, abarenga ibihumbi 56 by’abaturage bakurwa mu ngo zabo bajya kuba mu bishanga ibyo bituma batabasha gusarura ibyo bahinze, amasambu yabo akaba yarigaruriwe n’inyeshyamba nkuko bitangazwa kandi n’umugabo w’imyaka  32 Ray Ngwen Chek

Ati‘’Guhera mu 2013 nta gihingwa na kimwe twigeze duhinga ,nta na kimwe ,twiberaho gutya ,ntuba uzi ngo ejo nzatungwa n’iki’’.

Amashuri n’amavuriro byarafunzwe ku buryo abana bo muri sudani y’epfo bigishwa gukoresha imbunda aho kwiga ibyakubaka ejo hazaza habo,

Ibi kandi birashimangirwa na Ray agira ati‘’Abanyeshuri bugarijwe n’amacakubiri babura andi mahitamo bakiga gukoresha imbunda aho kwiga ku by’ejo hazaza’’

Ku bw’imibereho yabo itameze neza , aba baturage batunzwe no guhiga ndetse n’ibihingwa byimeza, ngo  bahora bategereje inkunga bahabwa akenshi iba itanabahagije ndetse ntizire n’igihe .

Yakozwe na Ntakirutimana Domina

Leave a Reply