Kenya: Umubare w’abava mu ishuri ukomeje kwiyongera kubera amavunja

0
156

Mu gihugu cya Kenya mu majyepfo ya Teso mu gace ka Busia, umubare w’abanyeshuri uva mu ishuri ukomeje kwiyongera kubera ikibazo cy’amavunja kibugarije.

Amavunja ari kwirukana abatari bake
Amavunja ari kwirukana abatari bake

Ingo zigera kuri 3O mu gace ka Angorom, ubu zamaze kwibasirwa n’ubu burwayi bw’amavunja ku rwego rwo hejuru.

Umuryango wa Laurence Omerekek muri aka gace ni umwe mu bakubititse  bikabije  kubera iki kibazo, aho bivugwa ko abana b’uyu mubyeyi bagera ku munani bose bataye ishuri kubera kurwara amavunja.

Aba bana bataye ishuri kubera ikimwaro baba bafite mu bandi cyane ko baba basekwa cyane bakanafatwa nk’abaciriritse kubera iki kibazo cy’amavunja.

Bwana Omerekek kuri ubu ari ku rutonde rw’abari guhabwa imfashanyo kugira ngo abana be bavurwe ubu burwayi maze bakomeze amasomo yabo.

Ubwo yaganiraga n’itangazamakuru yagize ati”Tumaze igihe kitari gito tubavuza. barakira ariko nyuma y’igihe gito ubu burwayi bukagaruka. Ubu byamaze kuba ikibazo gikomeye ku bana banjye kugira ngo babe bajya ku ishuri.”

Uyu mugabo yakomeje agira ati: “Imyigire y’abana banjye irandeba  niyo mpamvu ndiguhabwa ubufasha bugendanye n’ubuvuzi.”

Nkuko igitangazamakuru the Standard dukesha iyi nkuru cyabitangaje, Ku bufatanye n’umuryango NGO, umuryango  Omuse Foundation wagerageje kujya muri iki kibazo utanga inkunga ngo nibura barebeko cyakoroha  ariko kugeza ubu ntibarabasha guhangana na cyo bikwiye kuko umubare w’abanyagihugu bakomeje kwibasirwa na cyo ukomeje kwiyongera ku buryo bukomeye.

Christne Apadet umwe mu banyamuryango ba Omuse Foundation yagize ati: “Tumeze nk’abari gutsindwa gukemura iki kibazo kuko muri aka gace uburwayi bw’amavunja bwarenze urugero, urebye hejuru y’ingo 30 ubu zibasiwe n’iki kibazo ku buryo  ubu ushobora gusanga abantu bagera kuri 13 bakomoka mu rugo rumwe bose barwaye amavunja.”

Abaturage b’aka gace bo kuri ubu bari kwiyambaza leta y’iki gihugu ngo ibicishije muri Ministeri y’Ubuzima ifatanye n’izindi nzego bashyire iherezo ku kibazo cy’amavunja mu gace ka Angorom.

Apadet yagize ati” Nubwo turimo kubavura yenda bazakira ariko kubera kuba ahantu habi n’ubundi ubu burwayi bw’amavunja buzongera bugaruke.

Yanditswe na Schadrack MUKESHIMANA

Leave a Reply