Ubuvuzi gakondo bukomeje gutungwa agatoki n’abatari bake

0
115

Mu ntara zitandukanye no mu mujyi wa Kigali, ni henshi unyura  hari ibyp biranga ahari ubuvuzi gakondo ariko serivise zihatangirwa usanga zikemangwa n’abakunda kuhagana.

abantu ntibavuga rumwe ku buvuzi gakondo
abantu ntibavuga rumwe ku buvuzi gakondo muri iyi minsi

Aba bavuzi usanga basobanura ko bavura indwara hafi ya zose kandi ko batanga n’umuti w’amahirwe ukaba n’ ukuraho inyatsi. Bamwe mu bahura n’abo biyita ko ari abavuzi ba gakondo, bavuga ko babigereranya n’ubutekamitwe. Ibi bakabishingira ku byo aba bavuzi bizeza ababagana kandi akenshi ugasanga atari ukuri.

Gatesi Jacqueline umwe mu baganiriye na touchrwanda.com yagize ati “Icyo nshingiraho ni uko baba biba abantu ntabwo bavura kubera ko nk’iyo umuntu agiye kwivurizayo ntakire wumva…nta kigenda. Ntabwo bavugisha ukuri baba bashaka kwirira amafaranga y’abaturage” .

Muhawenimana Clementine na we aganira na touchrwanda.com yagize ati“ Usanga ibyapa henshi bavuga ngo bavura umwaku, bavura inyatsi ndetse ngo batanga umuti w’amahirwe kandi nzi neza ko amahirwe atangwa n’Imana. Gusa njye mbona ari abatekamutwe kuko arakubwira ko agukiza kandi na we atikijije kandi ubona ari umukene nk’abandi bose.”

Bashingiye ku byo aba bavuzi bizeza ababagana kandi atari ukuri, ndetse n’uko bagaragara muri ubu buvuzi,niho bahera basaba inzego zifite aho zihuriye n’ubuzima kwita kuri iyi mivurire.

Josiane aganira na touchrwanda.com yagize ati “Umuntu ashobora kurwara nk’igifu akagana ubwo buvuzi gakondo bakamuha umuti ariko kuko batazi uburwayi cya gifu gifite bikaba byamutera izindi ndwara kubera kunywa imiti idapimye. Nkaba nasaba inzego z’ubuzima ko bajya basuzuma bakareba ko iyo miti gakondo yujuje ubuziranenge.”

Ibi bibazo hamwe n’ibindi bishamikiye kuri ubu buvuzi bukomeje kugaragara mu bice bitandukanye by’u Rwanda, Minisiteri y’ubuzima ivuga ko bidakwiye ko umuntu umwe abeshya ko akavura indwara nyinshi, ko abanyarwanda bakwiye kugana ibigo nderabuzima bakizera ko bivuje neza.

Mark KAYUMBA umuvugizi w’iyi Minisiteri aganira na touchrwanda.com ku murongo wa telefone(telephone) yagize, ati“Umuntu uvuga ko avura indwara mirongo itandatu atari umuganga, adafite ibintu byaciye muri za laboratwari(laboratoires)  kugira ngo bemeze ko bishobora kuvura iyo ndwara! Hari abavura bakoresheje amagambo gusa, hari abavura bakoresheje ibintu bitandukanye, ibyo twebwe ntabwo tubyemera. Ibyo twemera, hari amavuriro azwi yemewe kandi dukomeza gushishikariza abantu kugana igihe cyose yumva afite ikibazo aho kugira ngo ajye ahantu hatazwi. Ntabwo twabuza umuntu gukora ubucuruzi ariko na none ntabwo twamwerera gukora ubucuruzi buganisha mu kugirira abanyarwanda nabi kandi dushinzwe ubuzima bwabo. Amatangazo nk’aya ngaya iyo uzi neza.

ko ari ay’abantu bakora ku buryo butemewe n’amategeko, icyo gihe uba uyashyigikiye, uba ushyira umunyarwanda mu kaga. Iyo akuganye ashaka ko umuvura, aba yifuza ko nyine umuvura ntabwo aba yifuza ngo umutere n’ibindi bibazo. Ibigo nderabuzima, ibitaro byemewe birahari bihagije. Birinde kujya mu buvuzi batizeye.”

Minisiteri y’ubuzima kandi yihanangiriza abatangaza amatangazo ko bavura indwara nyinshi, ibyo ivuga ko nta munyarwanda ukwiriye kubyizera,mu gihe nta byemezo bigaragara byatanzwe n’inzego zibishinzwe ko abakora ibyo bikorwa byaba bifite ubuziranenge.

Yanditse na Janvier Hakizimana   

Leave a Reply