Umuhanzi Saidi Brazza yongeye gufatirwa mu cyuho

0
1968

Binyuze mu mukwabu Polisi y’igihugu yataye muri yombi abacuruza ndetse n’abanywa urumogi aho havumbuwe ibiro bigera kuri 300 by’urumogi, bifite agaciro ka Miliyoni 6 z’amafaranga y’u Rwanda, Saidi Brazza wari warajyanwe kugororwa akaba ari umwe muri 18 bafashwe.

Polisi yafashe ibiyobyabwenge

Saidi Brazza umuhanzi nyarwanda ukora injyana ya Reggae wamamaye mu ndirimbo zigiye zitandukanye nka Isi yameze amenyo, Twiganirira n’izindi zitandukanye.

Nyuma yo kuva kugororwa mu kigo ngororamuco Iwawa, Saidi Brazza akaba yarazanye ingamba zidasanzwe  zo kurwanya ibiyobyabwenge binyuze mu muryango yashinze  Talented Artist Against Drugs (TAAD).

Brazza uvuga ko kubwe ariwe wisabiye minisitere y’urubyiruko ko yamufasha ikamujyana Iwawa kubera ko nawe ubwe yari amaze kurambirwa gukoresha ibiyobyabwenge, nyuma yaho aviriyeyo apfunyikiwe impamba y’amasomo anyuranye akigera hanze yisunze urundi rubyiruko rw’abahanzi bashinga umuryango wo kurwanya ikoreshwa ry’ibiyobyabwenge ku banyempano.

Mu kiganiro yahaye itangazamakuru ubwo polisi y’u Rwanda yongeraga ku muta muri yombi nkumwe mu bakurikiranweho gukoresha ikiyobyabwenge cy’urumogi yagize ati: “Urubyiruko rwose twavanye Iwawa rwasubiye mu itabi nsigara ndi njyenyine kandi ntibabafate… kwakundi ukurura ikigukurura imbaraga zo kwisubiraho mbibona mu maso yanjye ntibyankundiye.”

Polisi yafashe ibiyobyabwenge
Abategarugori bakaba basigaye bakoreshwa ari benshi mu icuruzwa ry’ibiyobyabwenge

Muri uyu mukwabu wa polisi ukaba warafashwemo abategarugori barindwi nabo batawe muri yombi bazira gucuruza ibiyobyabwenge, Uwamahoro Marie Ange umubyeyi waje guhabwa akazi n’umukecuru ko kugemurira umunyururu akazajya amuha amafaranga yaje nawe kugwa muri uyu mutego biza kurangira acuruje ibiyobyabwenge.

Umuvugizi wa Polisi y’u Rwanda ACP Theos Badege yavuze ko ikigamijwe ari ukongera gushimangira ingufu dusabwa twese mu gukumira iyinjizwa ndetse n’icuruzwa ry’icyorezo cy’ibiyobyabwenge bituruka hanze y’igihugu mu bihugu by’abaturanyi. ACP Badege yagize ati: “Turasaba abantu bose kudakingira ikibaba aba bagizi ba nabi… dufatanyirize hamwe mu kubirwanya kuko ni icyorezo.”

 ACP Theos Badege umuvugizi wa Polisi y'u Rwanda
ACP Theos Badege umuvugizi wa Polisi y’u Rwanda

Ku kibazo cy’abavanwa kugororwa bakongera bagasubira mu biyobyabwenge umuvugizi wa polisi ACP Badege asanga uretse bacye batamenya gufata ibyemezo ngo bajye mu murongo muzima abandi bo bari gukora ibikorwa bigaragara, biteza imbere nta mwanya wo gusubira mu bibatesha ubwenge.

Uru rumogi rwafashwe rukaba rwavumbuwe mu mirenge ya Rwezamenyo, Nyarugenge, Gitega yo mu karere ka Nyarugenge ndetse no mu murenge wa Kigarama ho muri Kicukiro.

Polisi yafashe ibiyobyabwenge
Uyu mukwabu wa polisi ukaba wasize utahuye ibiro 300 by’urumogi
Polisi yafashe ibiyobyabwenge
Uwamahoro Marie Ange winjijwe mu mwuga n’umukecuru ngo ajye agemurira umugororwa
Polisi yafashe ibiyobyabwenge
uru rumogi rwangijwe rufite agaciro ka Miliyoni 6 z’amafaranga y’u Rwanda
 ACP Theos Badege umuvugizi wa Polisi y'u Rwanda
iyi tank ikaba yavumbuwe mu cyumba munsi y’igitanda aho bari baragicukuriye

Leave a Reply