Zimbabwe: umwuzure ukomeje guhekura abaturage

0
131

Mu gihugu cya Zimbabwe mu karere ka Tsholoto, bamwe mu baturage bakomeje kubura ibyabo Kubera umwuzure wibasiye agace k’amajyepfo y’iki gihugu.

umwuzure ukomeje guhekura abaturage
umwuzure ukomeje guhekura abaturage

ASSA Mkwananzi umwe mu baturage baturiye aka gace k’amajyepfo mu karere ka Tsholoto wagizweho ingaruka n’imvura y’amahindu yaguye, maze igateza umwuzure .

Ubwo yaganiraga n’itangazamakuru yagize ati: “Nabuze byose  yaba  inzu yanjye amatungo yose, harimo ihene  ndetse n’inkoko kubera umwuzure watewe n’imvura y’amahindu yaguye”

Nkuko Ministri w’ubutegetsi bw’igihugu muri Zimbabwe Savio KASUKUWERE yabitangaje muri iki cyumweru gishize, kuva mu kwezi k’Ukuboza umwuzure umaze kwica abaturage basaga 246, inkomere 128 ndetse n’inyubako z’abanyagihugu zisaga 2000 zimaze gusenyuka burundu. Savio yakomeje avuga ko n’ababashije kurokora ubuzima bwabo batagize amahirwe yo kugira na kimwe mu byabo basigarana.

Joice Ncube, ni undi muturage muri aka gace, na we aragira ati: “Icyo twabashije kurokora ni iriya mali (suitcase) na bwo irimo imyenda mike cyane ” biravugwa  kandi ko abaturage babashije kurokora amagara yabo, kuri ubu bubakiwe amahema ya plastike akaba ariyo bikinzemo, nubwo bavuga ko ari kubaho ku mahirwe.

Sibongile Nyoni, umukozi muri Ministeri w’Uburinganire n’iterambere ry’umuryango Ubwo yari hafi y’inkambi yacumbikiwemo, aba baturage babashije kurokoka yagize ati: “Muri iriya nkambi dufitemo abantu bari hagati ya 850 na 900, bafashijwe n’indege yo mu bwoko bwa helicopter ubwo batabashaga kwikura aho bari bazitiwe n’umwuzure.”

Igitangazamakuru the News24 cyo muri iki gihugu kiravuga ko iyi mvura y’amahindu imaze ibyumweru bigera kuri bine muri iki gihugu cya Zimbabwe, cyane cyane mu duce tw’amajyepfo y’igihugu.

Iyi mvura kandi yaje nyuma  y’amapfa na yo yamaze igihe kirekire muri iki gihugu.

Ubwo perezida Robert Mugabe mu minsi ishize yatangazaga ko umwuzure wabaye ikiza gikomeye mu gihugu mu cyumweru gishize, Zimbabwe yahawe n’abagiraneza ku rwego mpuzamahanga miliyoni zigera ku 100 Z’amafranga y’Amerika yo gufasha abahekuwe n’umwuzure.

Mu mwaka ushize amapfa yibasiye aka karere yatumye amatungo atabarika apfa ndetse n’abaturage benshi muri iki gihugu bahungira mu mashyamba gushakisha aho bakura ibyo kurya n’amazi yo kunywa, mu migezi imwe n’imwe mu gihugu.

Ibi biza bimaze iminsi muri Zimbabwe byagize ingaruka kandi ku bitaro n’amavuriro menshi  kuko Ibihumbi by’abaganga muri iki gihugu  mu cyumweru gishize barigaragambije, kubera kubura agahimazamutsyi bagombaga kubona mu mpera z’umwaka ushize.

Ibi biraterwa nuko ibitaro bakorera bimaze igihe nta kintu byinjiza, kubera ko abarwayi ntacyo bafite cyo kwishyura. Aba baganga bakaba bari gusaba leta ko yakohereza abaganga baturutse mu ngabo na polisi y’igihugu akaba aribo bavura abarwayi.

Amapfa yarashize none igitangaje kuri ubu imvura y’amahindu itava ku muryango, niyo iri guhekura abaturage ku rwego rwo hejuru. Biravugwa ko abaturage bamwe na bamwe mu duce tw’icyaro twa Matabeleland intara  y’amajyepfo,  abaturage ubu ntibabasha kugera kwa muganga ndetse n’abanyeshuri ntibashobora kujya ku mashuri yabo ngo kuko imihanda yose n’inzira muri utu duce byasenyutse bihebuje, ntawubasha kubona aho aca.

Yanditwe na Schadrack MUKESHIMANA

LEAVE A REPLY

Please enter your comment!
Please enter your name here