Impinduka mu ikoreshwa ry’amashyuza muri Rusizi

0
285

Mu nama y’umutekano yaguye y’Akarere ka Rusizi hafatiwemo icyemezo cy’uko ibikorwa byo kwicara no kwibira mu mashyuza mu masaha ya nijoro bihagarikwa mu gihe kitazwi mu gihe bakirimo kubyigaho, ibi bikorwa ngo bikaba bizasubukurwa hamaze kwigwa imicungire inoze yayo mazi.

Meya-wa-Rusizi

Ubuyobozi bw’akarere ka Rusizi, buvuga ko bwahagaritse ibikorwa byo gusura no kwibira  mu mashyuza aherereye mu murenge wa Nyakabuye mu masaha ya nijoro  n’aya mu gitondo, kubera ko mu gihe cy’umwaka, muri aya mazi hamaze gupfira abantu 4, nk’uko bitangazwa n’umuyobozi w’akarere ka Rusizi, Harerimana Frederick.

Harerimana Frederick yagize ati: “twasanze gufunga amashyuza burundu atari cyo gisubizo, mu gihe tutarafata ingamba z’uko twareka abantu bakajya mu mashyuza ariko umutekano wabo wizewe, twashyizeho uko abaturage bajya hariya bamenya amasaha bagirayo  ntibajyeyo nijoro, kuko nko mu gihe cy’umwaka gusa, abantu bane bose bapfiriye mu mashyuza, babaga bagiyeyo mu masaha ya nijoro”

Uyu muyobozi akomeza avuga ko impamvu batafunze amashyuza burundu ahubwo hagashyirwaho uburyo bwo kuyakoresha ari uko abenshi mu bayagana bemeza ko aya mazi avura amavunane n’indwara z’umugongo.

Yagize ati: “abaturage baturanye n’amashyuza n’abava kure yayo bavuga ko amashyuza ari umuti w’umugongo, akaba ariyo mpamvu  aho kuyafunga ahubwo tubaye dushyizeho imicungire yayo mu gihe tutaremeranya n’abashinzwe kuyacunga imikoresherezo yayo”.

Harerimana Frederick

Ubuyobozi bw’akarere ka Rusizi buvuga ko aya mashyuza azongera gukoreshwa nk’uko byari bisanzwe bamaze kwemeranya ku micungire yayo n’uruganda rukora sima (CIMERWA) rusanzwe rufite inshingano zo gucunga aya mazi.

Kuri ubu abasura amashyuza n’abajya kuyinezezamo bakaba bagomba kujyayo hagti ya saa moya za mu gitondo na saa kumi n’imwe za nimugoroba.

Leave a Reply