Ku Muhima inkongi y’umuriro mu nzu y’umuturage ihitanye abana babiri

0
660

Mu mudugudu w’ Icyerekezo, akagari ka Nyabugogo mu murenge wa Muhima inzu y’umuturage ifashwe n’inkongi y’umuriro abana 2 bahita bahasiga ubuzima, ababyeyi babo barakomereka, ubu bakaba bajyanywe kwa muganga.

inzu y’umuturage ifashwe n’inkongi y’umuriro

Kuri iki cyumweru tariki ya 30 Mata 2017 mu karere ka Nyarugenge, umurenge wa Muhima akagari k’ Icyerekezo, ahegera mu masaha ya saa tanu (11h00), inzu y’umuturage yafashwe n’inkongi y’umuriro irashya irakongoka, abana babiri bahita bapfira muri iyi nzu naho ababyeyi babo barakomereka.

Umuvugizi wa Polisi y’u Rwanda mu mujyi wa Kigali SP Emmanuel Hitayezu yatangaje ko iyi nkongi y’umuriro yahitanye ubuzima bw’abana babiri, umwe uri mu kigero cy’imyaka 13 naho undi akaba ari mu kigero cy’umwaka umwe gusa. Ababyeyi b’abo bana bakomeretse ubu bakaba bajyanywe ku bitaro bya Muhima aho barimo gukurikiranwa n’abaganga.

SP Hitayezu avuga kandi ko ku makuru abaturage bagejeje ku nzego za polisi ahamya ko uyu muturage yacururizaga ibikomoka kuri Peterori iwe murugo, akaba ari nabyo bikekwa ko byaba byabaye intandaro y’iyi nkongi yahitanye ubuzima bw’aba bana babiri, ba nyirurugo bagakomereka.

2 bahitanywe n’inkongi y’umuriro
Abana 2 bahitanywe n’inkongi y’umuriro

Mu butumwa bwa Polisi y’igihugu nyuma y’iyi nkongi y’umuriro, SP Hitayezu avuga ko abaturage bagomba kwirinda gucuruza ibikomoka kuri peterori mu buryo bunyuranije n’amategeko, ababikoresha nabo baragirwa inama yo kubigurira ahantu hazwi, hemewe (kuri sitasiyo za Esanse).

Polisi y’u Rwanda irasaba kandi abaturage gufatanya mu gutanga amakuru mu gihe hari aho bazi hakorerwa ubucuruzi nk’ubu butemewe, kuko ngo kutayatanga ari uguhishira ibishobora gushyira ubuzima bw’abantu mukaga no guhishira abanyabyaha.

Leave a Reply