Humble Jizzo yagize icyo avuga kuri bagezi be Safi na Nizzo bahuriye mu itsinda rya Urban Boys

0
5340

Mu kiganiro kirambuye yagiranye na KT Radio, Humble Jizzo wa Urban Boys yasobanuye birambuye ibyaranze itsinda rya Urban Boys kuva mu myaka irenga icumi bamaranye, ndetse no kumwiryane hagati ya Nizzo Kaboss na Safi Madiba uherutse kurushinga na Niyonizera Judithe.

Humble Jizzo yagize icyo avuga kuri bagezi be Safi na Nizzo bahuriye mu itsinda rya Urban Boys



Abantu bakwiye gusesengura neza ibibazo byaranze Urban Boys kuva batangira gukora muzika; kuki Urban Boys yumvikanagamo ibibazo nyuma bakongera gusubirana, ese byabaga byaturutse he? Byaturukaga kuri inde?

Urban Boys iri mu bihe bya nyuma, itangazamakuru ryarabose kuko ibyabo byose biri hanze, byatunguye benshi mu bakunzi b’iri tsinda kumva Nizzo ashobora gushyira hanze amabanga ya mugenzi, Safi ayanyujije ku mbuga nkoranyambaga.

Mu bimenyetso byagaragaje gutandukana kweruye kwa Urban Boys, ni ubukwe bwa Safi aho Nizzo yanze kwitabira ubukwe bwa mugenzi.Nizzo yakoresheje imbuga nkoranyambaga mu kwamagana ibyavugwaga ko yabanje gutereta umugore wa Safi, anasobanura ko atashoboraga kwitabira ubukwe bwa mugenzi we nk’umuvumbyi.

Humble Jizzo yavuze ko gushinga urugo ntaho bihuriye n’isenyuka rya Urban Boys

Humble yagaragaje ko gushaka abagore ntaho bihuriye n’isenyuka rya Urban Boys



Nizzo Kaboss yumvikanye avuga ko atatumiwe, ndetse ko ari uburenganzira bwe kuba yaranze kubwitabira ubukwe bwa mugenzi we Safi. Ijwi rya Nizzo ryaramamaye cyane binyuze ku mbuga nkoranyambaga, nyuma yaryo abantu bose baracecetse buri wese atifuza kugira icyo avuga.

Ubwo yateguraga umunsi wo kwizihiza isabukuru y’imyaka itatu amaranye n’umukunzi we, Humble kuri ubu usigaye aggerageza uko ashoboye kutigaragaza mu itangazamakuru cyane ko atari ishema kuvuga uburyo itsinda rye rikomeje gusenyuka.

Nizzo yumvikanye avuga ko atatumiwe, ndetse ko ari uburenganzira bwe kuba yaranze kubwitabira ubukwe bwa mugenzi we Safi

Yaganiriye na KT Radio asobanura uko itsinda ayoboye rimeze kuri ubu ndetse n’ibyo ateganya gukora kugirango badasubira inyuma.

Uko itangazamakuru ritamenyega ko hari ubukwe bwa Safi ni nako na bagenzi be batamenyaga ibiri kuba. Ni ukuvuga ngo ubukwe bwarahishwe cyane ku buryo Humble ubwe yamenye ko hari ubukwe bwa Safi ari uko yinjiye mu modoka ya Safi agasangamo impapuro nkeya z’ubutumire.

Kutavugwa cyane mu itangazamakuru, Safi ashobora kuba yarangaga ko bivugwa cyane agatangira kubazwa ibibazo bitandukanye ariko nanone umuntu yakwibaza uwo yahishaga cyane ko bagenzi be bahujwe n’umuziki nabo ntacyo bari babiziho.



Humble yahamije ko mu myaka irenga 10 yamaranye na bagenzi be muri urban Boys, muzika yabubatse kuburyo bwose bushoboka ndetse byarenze gukorana baba  n’inshuti magara.

Yagize ati: “Turarimbana, turaziranye, twubatse ubuzima twese….Umuzki waraduhuje nk’uko wumva abantu bavukana bagakurana so muzika twakoze niyo yatureze mu myaka icumi ishize.”

Yavuze kandi ko kuba Safi yarafashe umwanzuro wo kudatumira Nizzo mu bukwe bwe , Nizzo nawe agaterera iyo ntabashe kwirengagiza ibyo bapfa ngo yitabire ubwo bukwe agakomeza gushikama kuri iyo ngingo, bigaragara ko bombi biyumva ntawe ushaka kuva ku izima.

Yatanze urugero rwo kuba muzika yarabahuje n’inshuti zitandukanye kandi buri wese akaba afite uko yisanga kuri izo nshuti. Ngo mu itsinda usanga abantu rimwe na rimwe buri wese afite umuryango we ndetse n’inshuti ze kandi afite n’uko abitaho.

Yagize ati: “Nanjye ubwanjye byarantunguye kuko iyo ushaka ko ikintu cyawe kivugwa ukibwira Safi, nkunze no kumwita Radio, kuko n’umuntu wiganirira cyane ariko ubukwe bwe yabugize ibanga kuburyo bukomeye. Namenye ko afite ubukwe ari uko ninjiye mu modoka akimara kubona ko nabibonye yahise ambwira ngo ‘man urabibonye kuri Surprise’…naramubwiye ngo ntabwo akiri Surprise.”



Humble avuga ko impapuro z’ubutumire zitari nyinshi, uwo mwanya ni naho bumvikaniye y’uko azamwambarira mu bukwe. Bagiye aho bafatira imyenda, Humble yabajije Safi niba abantu bose yarabatumiye amubwira ko hari n’abavandimwe be atabwiye.

Nyuma ngo Humble yaje guhamagara Nizzo kuri Telefone amubaza niba koko yaratumiwe undi amubwira ko nta invitation yakiriye, amusabye kuza kuko adahejwe yamubwiye ko bitakunda kuko adashobora kuhagera ngo yari kuba ameze nk’umuvumbyi.

Yakomeje avuga ko we atameze nkabo kuburyo adashobora guhinduka, mu magambo yakoresheje yumvikanishije ko Safi na Nizzo bafite imitwe ikomeye mu mvugo z’ubu ashaka gusobanura ko bigoye ko bahinduka.

Ngo we kuba Humble akuze mu myaka nibyo bituma hari ibyo yirengagiza kugirango amahoro akomeze asagambe muri Urban Boys. Agira ati: “ushobora kutumvikana n’umuntu ariko aho dutandukaniye nk’uko nakubwiye kandi sinzi ngirango n’imyaka ibifite uruhare kuko nabwo byari bimeze gutyo mbere ariko uko abantu bagenda bakura ni nako bakomeza imitwe ntibashaka guhinduka, bariyumva bidasanzwe.”

Humble akomeza agira ati: “Nyuma y’akazi buri wese afite amahitamo ye.”  Nyuma y’ubukwe yarabavugishije bose Safi na Nizzo, ariko avuga ko atishimiye kuba Nizzo atari mu bukwe, yabasabye guca bugufi no kumva ko byose bishoboka; ngo kuba wavuga Yes uri hagati ntibisobanuye ko wemeye no kuba wavuga No utahakanye neza ntacyo bivuze.

Humble icyo yifuza kuri we n’uko Urban Boys yakomeza gukora kandi neza, avuga ko kuba Nizzo yaravuze ku karubanda mugenzi we atari byiza ahubwo ko bagakwiriye kuba barabiganiriyeho hagati yabo.

Ngo ibibazo biri mu Urban Boys agiye kubyitaho kuburyo mu minsi ya vuba bikemuka, avuga ko yagiye abaho akemura ibibazo byabaga biri hagati ya Safi na Nizzo.

Avuga ko bazicara bagakemura ibibazo bihari; ngo kuba itangazamakuru ryarabatatse muri ibi bihe ngo nta kibazo abibonaho ahubwo ngo bituma n’uwakosheje asoma akareba n’ibitekerezo batanze agaheraho yisubiraho.



Leave a Reply