Isange One Stop Center yashimwe na Komisiyo y’imiyoborere myiza muri Sena y’u Rwanda

0
207

Kuri uyu wa gatatu taliki ya 22 Ugushyingo, komisiyo  ishinzwe politiki n’imiyoborere myiza muri Sena y’u Rwanda yagiriye uruzinduko kuri Isange One Stop Centre ku Kacyiru, mu rwego rwo kumenya no kugenzura ibikorwa bya Guverinoma ku bijyanye no kurwanya ihohoterwa rikorerwa abana n’abagore ndetse n’irikorerwa mu ngo.

Komisiyo y’imiyoborere myiza muri Sena y’u Rwanda

Ni muri uru ruzinduko iyi komisiyo yasuye  iki kigo mu rwego rwo kungurana ibitekerezo  n’ubuyobozi bw’iki kigo by’umwihariko ngo harebwe uko iki kigo cyarushaho gukomeza gufasha abanyarwanda cyane cyane abakorerwe ihohoterwa iryo ari ryo ryose.

Iyi komisiyo yari iyobowe na Dr. Jean Nepomuscene Sindikubwabo, ari kumwe n’umwungirije Gertrude Kazarwa ndetse na Marie Claire Mukasine, yakiriwe kandi ihabwa ikiganiro na Commissioner of Police(CP) Daniel Nyamwasa.



Mubyo yababwiye, CP Nyamwasa yavuze ko ikigo Isange n’ibindi bigishamikiyeho bitanga ubufasha mu buvuzi, mu bujyanama ku isanamitima ndetse no mu mategeko ku buntu ku bakorewe ihohoterwa cyane cyane abadafite ubushobozi bwo kwivuza no gusobanukirwa uko babona ubutabera.

Komisiyo y’imiyoborere myiza muri Sena y’u Rwanda yashimye ibikorwa bya Isange

CP Nyamwasa yagize ati:” Ibigo nk’iki byashyizwe mu bitaro by’uturere 44 mu gihugu hose kandi bitanga serivisi zimwe: bifite abaganga, abagenzacyaha, abajyanama ..bose bakorera hamwe kugirango uwahohotewe abone ubufasha bukwiye.”

Yongeyeho ati:” Iyo uwahohotewe aje, ayoborwa ku mugenzacyaha umufasha mu bimureba  nawe akamwohereza ku muganga ; uyu nawe nyuma yo kumuha ubufasha bwe akora raporo izifashishwa mu rugendo rwose rw’ubutabera buzahabwa uyu wahohotewe. Aha umugenzacyaha anakorana na sitasiyo za Polisi muri ako karere kugirango abahohotewe bamenyekane kandi bakurikiranirwe hafi.”

Guhera mu mawaka wa 2009, Isange yo ku Kacyiru yakiriye abantu 16,900 ; 71 ku ijana muri bo bari abakorewe ihohoterwa rishingiye ku gitsina cyane cyane gufatwa ku ngufu no gusambanywa ku bana; 29 ku ijana ni abakorewe ihohoterwa ryo mu ngo.

Nk’uko imibare ibyerekana, 81 ku ijana y’abakorewe ihohoterwa rishingiye ku gitsina bari munsi y’imyaka 18, abari munsi y’imyaka 5 bagera kuri 17 ku ijana mu gihe ab’igitsinagabo ari babiri ku ijana; bivuze ko 98 ku ijana ari igitsinagore.

Muri rusange, igitsinagabo cyakorewe ihohoterwa ryo mu ngo ni 19 ku ijana mu gihe igitsinagore ari 81 ku ijana.

Hagati ya Mutarama na Kanama uyu mwaka, ibigo bya Isange byose uko ari 44 mu gihugu byakiriye abahohotewe 3,378  mu gihe kimwe cya kane cyabo cyacyiriwe na Isange ikorera mu bitaro bya Kacyiru.

Komisiyo y’imiyoborere myiza muri Sena y’u Rwanda yashimye ibikorwa bya Isange



Mu byo Isange ifasha uwasambanyijwe cyangwa uwafashwe ku ngufu kandi harimo kumufasha kudatwita, kutandura virusi itera sida n’izindi ndwara zandurira mu mibonano mpuzabitsina, itanga n’ubundi buvuzi bwihariye muby’imyororokere, mu mutwe, mu bugenzacyaha, isanamitima n’ubujyanama ndetse no gusubiza umuntu mu buzima bwo mu muryango.

Iki kigo gifashwa kandi kigakurikiranirwa hafi na Minisiteri y’Umuryango n’Ubujringanire ku bufatanye na Polisi y’u Rwanda.

CP Nyamwasa yabagejejeho kandi ko, hari gahunda yo kwagura iki kigo ndetse no kumanura serivisi zacyo kugeza ku rwego rw’ibigo nderabuzima mu gihugu hose nk’uburyo bwo bwo kwegera abashobora guhohoterwa no kwigisha abaturage hagamijwe gukumira ihohoterwa.

Mu kiganiro Dr Sindikubwabo yatanze we, yashimye akamaro ka Isange n’uruhare Polisi y’u Rwanda ifite mu kwigisha abaturage ibijyanye no kwirinda ihohoterwa rishingiye ku gitsina maze agira ati:” Iyo wize neza ku nshingano zayo, ugirango inshingano za Polisi ni ukwakira no gufasha abahohotewe byonyine; ibikorwa biri aha bikwiye guterwa inkunga na buri wese  mu bigo byose.”

Asoza, yagize  ati:” Twasanze Isange ifite abakozi bahagije kandi babyize, igitekerezo cyo kuyagura na serivisi zayo kugeza ku bigo nderabuzima izaba ari intambwe ikomeye izanatanga igisubizo mu gukumira no kugabanya iterwa inda ry’abana ryeze no guca burundu umuco wo kuriceceka.”



Leave a Reply