Minisitiri w’abagore n’abana muri Ethiopia ngo aravuga ko ibyo yigiye ku Isange bizamufasha mu kazi

0
248

Ku gicamunsi cy’ejo ku wa 22 Ugushyingo Minisitiri w’abagore n’abana muri  Ethiopia n’intumwa yari ayoboye basuye Isange One Stop Center ku Kacyiru aho nyuma yo gusobanurirwa imikorere y’iki kigo yavuze ko ibyo ahigiye agiye ku bishyira mu bikorwa mu gihugu cye.

aravuga ko ibyo yigiye ku Isange bizamufasha mu kazi

Minisitiri  Denizu Hambisa n’intumwa  8 yari ayoboye bakigera muri iki kigo cya Isange One Stop Center giherereye mu bitaro bya Kacyiru bakiriwe na Chief Superintendent of Police(CSP)  Lynder  Nkuranga  abasobanurira  amavu n’amavuko y’iki kigo,imikorere yacyo n’icyo kimaze kugeza ku banyarwanda mu rwego rwo kurwanya no gukumira ihohotera  rishingiye ku gitsina n’irikorerwa abana.



CSP Nkuranga yabatembereje mu byumba bitandukanye bigize iki kigo  nk’ahatangirwa inama kubahuye n’ihungabana, ahakorerwa amadosiye ku bakoze ihohotera,icyumba cyakirirwamo abana bari munsi y’imyaka 10 kirimo ibyangombwa bifasha abo bana mu gutanga amakuru bagaragaza uko bahohotewe ndetse n’icyumba gisuzumirwamo abakorerewe ihohotera.

Aba bashyitsi bagiye  batemberezwa banasobanurirwa imikorere y’iki kigo babaza ibibazo bigaragaza ko bafite amatsiko yo kumenya imikorere yacyo nko kumenya uko bagenza  uwahohoteye cyangwa uwahohotewe.

CSP Nkuranga yagize ati: “Twebwe ntabwo turi abacamanza, uwakoze ihohotera tumukorera dosiye tukayishyikiriza ubushinjacyaha,dufite itsinda rihoraho ry’abaganga  rikurikirana umunsi kuwundi uwahohotewe  tukamuha ubufasha  akeneye nk’ubuvuzi n’ inama kubagize ikibazo cy’ihungabana, dufite abaganga batandukanye,  abagore n’abagabo uwahohotewe nta kibazo agira icyo aricyo cyose”.

Yakomeje asobanura ko ikigo Isange One Stop Center kitari mu Mujyi wa Kigali gusa kuko amashami y’iki kigo amaze kugera mu bitaro 44 biri mu gihugu hose kandi bitanga serivisi zimeze nk’izitangirwa mu ishami rya Kacyiru.

Minisitiri Denizu Hambisa yavuze  ko iwabo  naho haba ihohotera rikorerwa abagore n’abana  ariko ibyo yigiye ku Rwanda agiye kugerageza kubyigana.



Yagize ati: Mu byukuri  uru ruzinduko ruradufashije cyane,tubonye ukuntu u Rwanda rumaze gutera imbere mu kwita ku bahuye n’ihohotera , batweretse uko babitaho ,uburyo bakoresha mu kwita kuwahungabanye ndetse n’ubukangurambaga mu baturage mu kurwanya ihohotera rishingiye ku gitsina ndetse n’uburenganzira bw’umwana”.

Minisitiri Hambisa yavuze ko ikiruta ibindi ari ukuntu  basobanuriwe ko kwigisha abaturage kwirinda ihohotera aribyo by’ibanze.

Aha yagize ati:”Uretse no kuba tubonye uko twakwita kuwahohotewe,twasobanuriwe ko iki kigo kinagira uruhare mu gukangurira abaturage kwirinda ihohotera , kumenya uburenganzira bw’abagore n’abana . Ni  ibintu byiza u Rwanda rumaze kugeraho natwe  tuzagerageza kubyigana mu gihugu cyacu”.

Ikigo Isange One Stop Center cyashinzwe mu mwaka w’2009 kikaba kita ku bahuye n’ihohotera rishingiye ku gitsina.Kugeza ubu  90% bagana iki kigo baba ari abagore bahohotewe, abana  baba bari hejuru ya 80% mugihe 10% baba ari abagabo. Aba bashyitsi  baturutse mu gihugu cya Ethiopia mu rugendo shuli rw’iminsi  itatu mu Rwanda.



Leave a Reply