Nyamasheke: Umuturage yubakiwe inzu n’ urubyiruko rw’ abakorerabushake mu kwicungira umutekano

0
394

Abagize ihuriro ry’urubyiruko rw’abakorerabushake mu kwicungira umutekano mu karere ka Nyamasheke, ku itariki ya 16 Ugushyingo rw’ubakiye inzu umuturage utishoboye wo mu kagari ka Gitwa Umurenge wa Bushenge.

Urubyiruko rw’abakorerabushake mu kwicungira umutekano rwubakiye inzu umuturage

Uwo muturage ni Mukahirwa Beatrice w’imyaka 38, umubyeyi w’abana 2 watawe n’umugabo we mu bukode, akaba yarashimiye uru rubyiruko kuko rwamufashije kubona aho kuba.

Yaravuze ati:”Umugabo wanjye yantaye mu bukode muri Werurwe uyu mwaka, nyuma y’aho nibwo ba nyir’inzu banyirukanye kuko ntari nkibona icyo nishyura. Kuva ubwo natangiye kujya nsaba icumbi abaturanyi banjye.”

Yakomeje avuga ati:”Muri aya mezi ashize uko ari 7, nahoraga nimuka, ubuzima bunkomereye ndetse n’abaturanyi banjye bari bamaze kunyinuba kuko nari mbabereye umutwaro.”



Nyuma yo kubakirwa inzu, yavuze ko yishimiye ko n’ubwo yari abayeho mu buzima bubabaje hari abanyarwanda bamutekereza bagashaka ko ubuzima bwe buhinduka bukaba bwiza, kuko nta cyizere yari afite ko azabona inzu yo kubamo we n’abana be

Yavuze ati:”Uyu mutima w’uru rubyiruko nta wundi bawukuraho uretse Perezida Paul Kagame, ni uwo gushimirwa kuko niwe bakuraho icyitegererezo, bakaba baje kunyubakira inzu.”

Umuhuzabikorwa w’ihuriro ry’urubyiruko rw’abakorerabushake mu kwicungira umutekano mu karere ka  Nyamasheke Fashwanayo Gerald, yashimiye urubyiruko bagenzi be by’umwihariko n’abaturage muri rusange kubera igikorwa bakoze.

Yavuze ati:”Twebwe nk’abanyamuryango b’ihuriro ry’urubyiruko rw’abakorerabushake mu kwicungira umutekano mu Rwanda hose, twiyemeje kuzamura imibereho myiza y’abanyarwanda cyane cyane imiryango itishoboye.”

Yanavuze ko iri huriro ryabo bafite intego yo kukemura ibibazo bimwe na bimwe igihugu gifite, bakagira uruhare mu guhindura imyumvire y’abo baturage mu kwicungira umutekano no kwirinda ibyaha, bakazajya babikora mu bukangurambaga butandukanye.

Ihuriro ry’urubyiruko rw’abakorerabushake mu kwicungira umutekano mu karere ka  Ngororero kandi, rwacukuye imyobo izaterwamo  inturusu ku buso bungana na hegitari 4.

Ibi bikaba biri muri gahunda y’ishyirwa mu bikorwa ry’amasezerano y’ubufatanye ku kwita ku bidukikije Polisi y’u Rwanda iherutse gusinyana na Minisiteri y’ubutaka n’amashyamba.



Leave a Reply