Nyarugenge: Abaturage ba Rwezamenyo barasabwa kwirinda ibiyobyabwenge

Nyarugenge: Abaturage ba Rwezamenyo barasabwa kwirinda ibiyobyabwenge

| | Yasomwe inshuro 102 | Ibitekerezo byatanzwe
0
SHARE

Umuyobozi w’ishami rishinzwe kurwanya ibiyobyabwenge muri Polisi  y’u Rwanda, Chief Superintendent Urbain Mwiseneza atangaza ko 80 ku ijana ry’ibyaha bigaragara muri rusange biba bifitanye isano  cyangwa bifite  inkomoko ku biyobyabwenge.

Rwezamenyo

Ku isonga haza icyo gucuruza, gutunda no kunywa ibiyobyabwenge n’ibijyanye nabyo, gukubita no gukomeretsa, ubujura buciye icyuho, gufata ku ngufu no gusambanya abana ariko nk’uko abivuga, akenshi bikaba bifite inkomoko ku biyobyabwenge.

Ibi yabivugiye mu nama yagiranye n’abaturage bagera kuri 300 bo mu mirenge ya Rwezamenyo na Gitega mu karere ka Nyarugenge,  ikaba yarabereye mu mudugudu w’Ubumwe, akagari ka Rwezamenyo, umurenge wa Rwezamenyo , aho bigishijwe ubwoko bw’ibiyobyabwenge, ingaruka mbi zabyo, kandi abakangurira kubyirinda no guha Polisi y’u Rwanda amakuru y’ababinywa, ababitunda, n’ababicuruza.

Iyi nama yitabiriwe kandi na Superintendent of Police(SP) Beline Mukamana ushinzwe ishami rirwanya icuruzwa ry’abantu mu bugenzacyaha bwa Polisi y’u Rwanda, Inspector of Police(IP) Viviane Umulisa , Stella Mbabazi, umunyamabanga nshingwabikorwa w’umurenge wa Rwezamenyo ndetse na Sheik Mashaka Ali, umuyobozi w’umusigiti wa Majengo, agace inama yabereyemo.

 Agace iyi nama yabereyemo kazwi ku mazina ya Majengo na Californiya,  ni hamwe mu hatungwa urutoki nk’indiri y’ibiyobyabwenge  nk’urumogi, mugo cyangwa heroyine kubera umubare w’abakunze kuhafatirwa babicuruza cyangwa babinywa.

CSP Mwiseneza yagaragaje byinshi mu biranga ababaye imbata z’ibiyobyabwenge, haba mu myitwarire n’ibikorwa bakora, maze abasaba kubagaragaza batanga amakuru kuri Polisi ibegereye  kandi bakabyirinda nabo bakabigendera kure.

Mu bindi yababwiye, harimo kwirinda no kurinda abana babo amashuri yo mu ngo azwi ku izina rya “Madarasa” kuko byamenyekanye ko akenshi atangirwamo inyigisho zikururira abana babo mu butagondwa no  kujya mu mitwe y’iterabwoba, akaba yabasabye kubyamagana no guha Polisi amakuru y’abashobora kubyitabira.

SP Mukamana mu ijambo rye, yibanze ku icuruzwa ry’abantu,  ribangamiye umutekano muri iki gihe, aho yerekanye ko abibandwaho mu gucuruzwa ari urubyiruko rufite ibibazo bitandukanye ndetse n’abashaka kugera ku bintu vuba batavunitse.

Aha  yagize ati:” Mu kutamenya, bamwe mu rubyiruko bahorana ibyifuzo n’intego zo kugera ku bintu bikomeye nta n’imbaraga bakoresheje bashobora kwisanga bacurujwe. Biragoye ngo ukemange ibyiza wizezwa mu gihugu cyangwa hanze yacyo n’undi muntu, umuvandimwe cyangwa inshuti kuko icuruzwa ry’abantu rishobora gukorerwa mu gihugu no hanze y’inkiko zacyo.”

Nk’uko SP Mukamana  abitangaza, ikinyoma ni intwaro ikomeye ikoreshwa n’abakora icuruzwa ry’abantu, babizeza ibitangaza kandi babahuma ubwenge ngo batazagira uwo babwira ibitangaza babonye.

Arangiza yagize ati:” Mukwiye kumenya ko n’ubwo atari ryinshi mu gihugu cyacu, ariko rirahari kuko mu kwezi twakira ibirego 5-10 by’ababa barahuye n’iki kibazo.”

Yarangije abasaba gutanga amakuru y’umuntu wese wazaza atanga amasezerano nk’ayo, cyangwa ayaha undi muntu kugirango akurikiranwe.

Inspector of Police (IP) Viviane Umulisa, ukorera mu gashami karwanya ihohoterwa rishingiye ku gitsina, yibanze ku burenganzira bw’umwana n’ingorane ahura nazo.

Aha IP Umulisa yagize ati:”Abana bafite uburenganzira bwo kubaho, kwigishwa, kwambikwa no kurindwa ibyabahungabanya harimo imirimo ivunanye, n’ibindi,..”

Yabibukije ko itegeko rihana abaha abana ibihano biremereye bibwira ko babigisha kugira ikinyabupfura, kumuhana umubabaza, kumutoteza n’ibindi biremereye kuri we bihanishwa igifungo gishobora kugera ku myaka ibiri mu ngingo ya 218 mu gitabo cy’amategeko ahana.

Sheikh Mashaka Ali, uyobora umusigiti wa Majengo mu ijambo rye, yasabye abari aho biganjemo abayisilamu, ko bagomba gufatanya n’ubuyobozi bagaca za “Madarasa” kuko intego yazo atari nziza, aho yagize ati:” Idini nyayo ni iy’amahoro kandi  isaba kubaha ubuyobozi, ntiyigisha kwigomeka n’ubutagondwa.”

Yahamagariye ababyeyi kumenya ibyo abana babo birirwamo n’aho bagiye kuko ariho bigira imico mibi no kwishora mu biyobyabwenge ari nabyo ntandaro y’umutekano muke, akaba yavuze ko urwego ahagarariye rwamagana ikoreshwa ry’ibiyobyabwenge, ihohoterwa n’ibindi byaha.

NO COMMENTS

Leave a Reply