Nkuko byakunze kuvugwa ko amwe mu madini adakozwa ibyo kuringaniza urubyaro hakoreshejwe uburyo bwa kizungu, ndetse amwe muri yo akaba atanemera uburyo ubwo aribwo bwose bwo kuboneza urubyaro, ibi akabikora avuga ko  Bibiliya ivuga ko bagomba  kororoka bakangana n’umusenyi wo ku Nyanja bityo kuboneza urubyaro bikaba bihabanye nibyo bibiliya yigisha.

Onesphore RWAJE

Kuri ubu umwepisikopi w’itorero ry’abangirikani mu Rwanda Onesphore RWAJE aravuga ko abavuga ko kororoka ari ukubyara benshi udashobora kurera,  ari abasobanura Bibiliya uko itari ko ahubwo kororoka kwa nyako ari ukubyara abo ubasha kurera kugira ngo unabashe kubaho uko Imana ishaka. Ati”Kororoka rero no kubyara benshi biratandukanye, uko kuzura isi ntabwo ari ukuvuga ngo mbyare benshi ni ukororoka kandi kororoka ni uruhererekane, kuva ku muntu umwe ugeza ku buvivi, kandi tubaho nk’uko Imana ishaka,kuko umuntu ugiye kwiba kuko yabuze ibyo arya nta mibereho afite, umuntu ubuze icyo yambara nta mibereho afite ntabwo ariko uko Imana ishaka”.

Dr. Anicet NZABONIMPADr. Anicet NZABONIMPA, impuguke mu by’ubuzima bw’imyororokere mu kigo cy’igihugu cy’ubuzima RBC avuga imbogamizi ikibazo cy’imyumvire n’ubujiji aricyo gituma usanga abantu babyara abo badashoboye kurera kuko usanga abagize amahirwe yo kwiga  aribo bafite umubare munini w’abitabira kuboneza urubyaro, naho abatarize ndetse n’abatishoboye cyane abo mu cyiciro cya 1 n’icya 2 cy’ubudehe aribo bafite abana benshi.

Ati”iyo urebye abageze mu ishuri usanga aribo babyara abana bake ugasanga abatarageze mu ishuri aribo bari kubyara abana benshi cyane cyane kubera imyumvire mike cyangwa ubujiji,ugasanga muri make abafite abana benshi bagaragara muri bya byiciro by’ubudehe cya 1 nicya 2”.

Imibare y’ubushakashatsi bw’ikigo cy’ibarurishamibare mu Rwanda mu mwaka wa 2015 igaragaza ko 48% y’abantu bageze mu kigero cyo kororoka, ni ukuvuga abari hagati y’imyaka 15 na 49 bakoresha uburyo bwa kizungu mu kuboneza urubyaro naho 6% bakoresha uburyo bwa kamere.

Yakozwe na Vestine Umurerwa

TANGA IGITEKEREZO KURI IYI NKURU