Bamwe mu bagabo bo mu murenge wa Jomba mu karere ka Nyabihu, bavuga ko gahunda yo gufungisha urubyaro burundu batari bayumva neza, ngo kuko bafite impungenge zo kuba basuzugurwa n’abagore babo.

Abagabo baracyafite ipfunwe ryo gufungisha urubyaro
Abagabo baracyafite ipfunwe ryo gufungisha urubyaro

Aba bagabo babitangarije mu muganda rusange wabaye mu kwezi gushize, aho bavuga ko umugabo wafungishije urubyaro umugore atamwumva neza ndetse ngo ashobora kumwita umupfakazi.Ikindi kandi aba bagabo bavuga ko abagore babo babaca inyuma bamaze kwifungisha.

Bati:”Kuko mu bijyanye no mu baturage  rwose ujya kwifungisha, wagira ngo utashye mu rugo ugasangamo undi mugabo wabaza umugore  ati mugore ko wazanye umugabo mu rugo? Ati nonese hari icyo ukimarira ntiwapfakaye kera rero  uko mbyumva njyewe ntabwo nabikozwa kabisa”.

Umwe mu baganga bakora ku kigo nderabuzima cya Jomba muri serivise yo kuboneza urubyaro, aramara impungenge abagabo bumva ko gufungisha urubyaro burundu bishobora kubaviramo kubura ubushake bwo gutera akabaro.

Hakuzimana alphonse umuforomo mu kigo nderabuzima cya Jomba avuga ko gahunda yo kuringanyiza urubyaro ku bagabo itaragenda neza nkuko byifuzwa, ariko ngo  ubukangurambaga burakomeje.

Yagize ati: ”Ibijyanye no kuringanyiza urubyaro ku buryo bwa burundu birakorwa, uretse ko  abaturage batari babyumva neza ari na cyo tumaze, guhora tubibakangurira tunabigisha, biragaragara ko rero abagabo batari babyumva neza,  ariko bagenda babyumva buhoro buhoro  bityo rero abagira impungenge ko wenda nyuma yo kwifungisha burundu batakomeza kugira imbaraga za kigabo niko nabyita, imibonano mpuzabitsina irakorwa kandi neza.”