Minisitiri w’Imari n’Igenamigambi, Claver Gatete yamurikiye Inteko Ishinga Amategeko imitwe yombi umushinga w’ingengo y’imari ya Leta y’umwaka wa 2017-2018 izaba ingana na miliyari 2 094.9 z’amafaranga y’u Rwanda muri yo angana na 83% yose akaba azava imbere mu gihugu.

Ingengo y’Imari y’igihugu y’umwaka ushize wa 2016-2017 ikaba yarageraga kuri miliyari 1949.4 z’amafaranga y’u Rwanda muri yo 62.4% by’Ingengo y’Imari yose bikaba byari byitezwe ko bizava imbere mu gihugu.

Amafaranga azinjizwa n’igihugu kuri iyi ngengo y’imari ni miliyari 1,316.8, hiyongereyeho miliyari 130,5 ugereranyije na miliyari  1,186.3 yavuye imbere mu gihugu ku ngengo y’imari ya 2016/17.

Inguzanyo zizava mu mahanga ziteganyijwe ni miliyari 362.8 y’u Rwanda  zizagabanukaho miliyari 12.3 ugereranyije n’ingengo y’imari y’ubushize.

Amb Claver Gatete yavuze ko  mu mwaka w’imari wa 2017-2018, biteganyijwe ko ibikorwa bisanzwe bya Guverinoma bizashorwamo miliyari 1 139.7 frw naho ibikorwa by’iterambere bigashorwamo miliyari 774 Frw.

Aya mafaranga azashorwa mu bikorwa bisanzwe bya Guverinoma ngo yiyongereyeho miliyari 111.7 ugereranyije n’ayakoreshejwe umwaka ushize (Miliyari 1,028Frw) kuko imishahara y’abarimu yiyongereye.

Mu mwaka wa 2017, yavuze ko ubukungu bw’u  Rwanda buzazamukaho 6.7%, naho mu mwaka wa 2018 bukazamukaho 6.8%.

Muri uyu mwaka kandi ngo ibiciro ku masoko bizazamukaho 7%, ariko ngo bizamuke kuri 5% muri 2018.

Ibyoherezwa hanze bizazamuka kuri 21.6%, naho ibikomoka hanze biziyongeraho 0.7% nk’uko abisobanura.

Muri macye ngo ingengo y’imari yiyongereyo miliyari 140.7 ugereranyije n’umwaka w’imari wa 2016/17.

 

 

 

 

 

 

 

TANGA IGITEKEREZO KURI IYI NKURU