Ntakiyimana Emmanuel ukinira ikipe ya APR Athletics Club mu mikino ngororamubiri arembeye mu bitaro by ’i Kampala muri Uganda nyuma yo kubagwa “Appendix”, hakabura amafaranga yo kwishyura ibitaro.





Amakuru dukesha ikinyamakuru izubarirashe ni uko uyu musore usanzwe yiga ibijyanye n’ingendo z’indege muri Kenya, yari amaze iminsi mu Rwanda yimenyereza umwuga (stage) aho nyuma yo kubirangiza yarembeye mu nzira ubwo yari asubiye muri iki gihugu biba ngombwa ko yerekeza mu bitaro byo mu mugi wa Kampala bya Sambya Hostel ari naho arwariye kugeza magingo aya.

Ntakiyimana yabwiye ikinyamakuru izubarirashe.rw ko akeneye inkunga yo kwishyura ibi bitaro cyane ko yamaze kubagwa, nubwo ngo ataramenya neza umubare w’amafaranda agomba kwishyuraibi bitaro.

Ntakiyimana kandi avuga ko mu bantu bo mu Rwanda yasuwe na Rukundo Johnson, Umunyamabanga Mukuru w’Ishyirahamwe ry’Imikino Ngororamubiri mu Rwanda (FRA) akaba n’umuyobozi w’ikipe ya Mountain Classic Athletics Club.

Bamwe mu bakinnyi b’imikino ngororamubiri n’ab akunzi b’iyi siporo b’Abanyarwanda bakimara kumenya ko Ntakiyimana arembeye i Kampala,  bishyize hamwe bamwoherereza amafaranga y’u Rwanda angana n’ibihumbi mirongo inani (80,000Frw), gusa iyi nkunga ntiyashoboye kuba nyinshi kuko ubu burwayi bwahuriranye n’uko hari na gahunda yo kwifatanya n’abandi bakinnyi bagize ibyago mu miryango yabo barimo Myasiro Jeam Marie Vianney uherutse gupfusha Papa we ndetse n’undi witwa Vivine nawe ukinira APR Athletics Club.


TANGA IGITEKEREZO KURI IYI NKURU