Mu mpera z’icyumweru dushoje guhera kuwa Gatandatu no Kucyumweru 30 Nzeri-na 01 Ukwakira, nyuma y’umuganda nibwo hatangiraga imikino Kirehe vc na RRA y’irushanwa ngaruka mwaka rya Carre d’as 2017 ku makipe yaje muri 4 yambere muri Shampiyona y’uRwanda ya Volleyball mu bagabo no mu bagore.

Kirehe vc na RRA zegukenye igikombe cya Carre d'as 2017


Ikipe y’ akarere ka Kirehe ikaba yegukanye iki gikombe, itsinze APR amaseti 3-1 (21-25, 25-16, 25-23, 25-23) ku mukino wa nyuma, naho mu bagore ikipe ya Rwanda Revenue Authority (RRA) isezerera APR bigoranye ku maseti 3-2 (18-25, 25-19, 25-21, 20-25, 15-12) nayo yegukana igikombe yari isanzwe inabitse cy’ umwaka ushize.

Ikipe ya Kirehe ikaba yarageze ku mukino wa nyuma, imaze gutsinda umukino umwe muri ibiri yakinnye mu majonjora kuri uyu wa Gatandatu. Kirehe yari yabanje gutsinda APR amaseti 3-0, gusa iza gutsindwa umukino wa kabiri na Gisagara amaseti 3-2.

Naho ikipe ya APR yageze ku mukino wa nyuma imaze gutsindwa na Kirehe amaseti 3-0 mu mukino wa mbere, gusa iza gutsinda Gisagara mu mukino wa kabiri bakinnye amaseti 3-0.


Ibi byavugaga ko Kirehe isoje amajonjora ari iya mbere n’ amanita ane, ikurikiwe na APR n’ amanita atatu mu gihe Gisagara yari ifite amanita abiri kuko yatsinze Kirehe hitabajwe iseti ya gatanu. Amakipe atatu niyo yahuye hagati yayo nyuma yaho ikipe ya IPRC South isezeye mbere gato yuko irushanwa ritangira.

Ikipe ya mbere muri shampiyona yabonye igikombe n’ ibihumbi 500 mu bagabo n’abagore ,iya kabiri yabonye ibihumbi 300, n’iya gatatu ibona ibihumbi 200.

Ikipe ya mbere mu yegukanye igikombe cya Carre d’As mu bagabo n’abagore, yabonye igikombe ndetse n’amafaranga ibihumbi 350, iya kabiri ibona ibihumbi 250, iya gatatu ibona ibihumbi 200 n’iya kane ibona ibihumbi 100.

Umwaka ushize iri rushanwa ryegukanwe na UNIK VC mu bagabo naho mu bagore ritwarwa na RRA VC. Ishyirahamwe ry’ umukino wa volleyball rikaba rikomeje gutegura irushanwa ngarukamwaka rya Beach volleyball rizabera I Rubavu.


TANGA IGITEKEREZO KURI IYI NKURU