Umutoza Cassa Mbungo Andre uyoboye urutonde rwa Shampiyona rwa gateganyo akomeje kwemeza ko bakiri gushakisha abakinnyi bazamufasha ku gumana umwanya wa mbere wa shampiyona y’umupira w’amaguru mu Rwanda(Azam Rwanda Premier league) igeze ku munsi wa cumi wayo.



Ikipe ya Kiyovu sports iyoboye urutonde rwa shampiyona rwa gateganyo n’amanota 20, irusha As kigali amanota abiri, ikarusha kandi ikipe ya APR FC amanota 3, APR iri ku mwanya wa gatatu nyuma yo gusubikwa kwa shampiyona yarigeze ku munsi wa cumi.

Tubibutse ko Shampiyona yasubitswe kubera ikipe y’igihugu Amavubi irikwitera CHAN 2018 iteganyijwe gutangira taliki 13 z’ukwezi kwa mutarama 2018 izageza taliki 4 gashyantare 2018, aribwo shampiyona izahita isubukurwa taliki 6 gashyantare 2018.

Ikipe ya Rayons Sports ifite iki gikombe iri kuwanya wa kane ku rutonde rwa gateganyo rwa shampiyona, irushwa amanota atanu n’ikipe ya mbere ariko yo ikaba ifite umukino umwe w’ikirarane, mugihe Miroplast na Espoir arizo ziri kumyanya ibiri yanyuma n’amanota 8 ku rutonde rwa gateganyo.

Umutoza Cassa Mbungo aganira n’itangazamakuru yagira ati: ” iyi Shampiyona itoroshye nagato, muri uyu mwaka w’imikino bitazorohera ikipe iyariyo yose izatwara igikombe, kuko izagitwara izaba yarabikoreye, rero ntabwo akazi koroshye, natwe turakomeza guhatana cyane duharanira kwitwara neza muri buri mukino kuko hariho guhangana hagati y’amakipe atanu yambere, ariko nidukomeza gutsinda imikino yacu n’abakeba bakagira iyo batakaza kugeza shampiyona irangiye ntakabuza isura ya shampiyona izahinduka, ni nayo mpamvu tuzakora cyane kugeza kumusozo”.

Shampiyona nisubikurwa, ikipe ya kiyovu sports izakira ikipe ya Bugesera FC, umukino uzabera kuri stade Mumena, aho umutoza ashimangira ko nubwo ikipe yitwaye neza ariko hakenewe kongerwamo ingufu, ku bakinnyi bashya bazazanwa kugirango bagumane umwanya wabo.

Umutoza Cassa mbungo  yemeje ko barigushaka abakinnyi bokongera mu ikipe agira ati: “nibyo koko turi gushakisha abakinnyi nka babiri twasinyisha  muri uku kwezi, harimo n’umwataka mwiza ariko kuri ubu, sinatangaza amazina ye kuko turacyari mu biganiro”.



TANGA IGITEKEREZO KURI IYI NKURU