Nyuma yo kujurira icyemezo cyo gufungwa iminsi 30 yagateganyo y’urubanza rwa Gacinya Chance Denis cyafashwe n’Urukiko rw’ibanze rwa Nyarugunga, Gacinya yagaragarije Urukiko rwisumbuye rwa Nyarugenge ko urukiko rw’ibanze rwa Nyarugunga hari ibyo rwirengagije.

Urukiko rwisumbuye rwa Nyarugenge rwa tesheje agaciro ubujurire bwa Gacinya Chance Denis



Mu gihe Urukiko rw’ibanze rwa Nyarugunga rwamaze gukatira rwiyemezamirimo akaba na Visi Perezida wa Rayon Sports, Gacinya Chance Denis, igifungo cy’iminsi 30 y’agateganyo, kuri uyu wa kane tariki 11 Mutarama 2018, ubwo yajuririraga iki cyemezo, uyu Gacinya yagaragarije Urukiko rwisumbuye rwa Nyarugenge ko urukiko rw’ibanze rwa Nyarugunga hari ibyo rwirengagije ndetse bigaragara ko Akarere ka Rusizi kakimurimo amafaranga menshi kagombaga kumwishyura.

Gacinya yagejejwe ku rukiko saa yine z’igitondo uyu munsi asanga ari ku mwanya wa munani w’abari buburanire muri uru rukiko aricara arategereza, urubanza rwe rwatangira saa munani zirengaho iminota.

Yaje yambaye ikabutura n’ishati bigoroye neza, amataratara n’inkweto ntoya z’umutuku Gacinya niwe watangiye avuga ku mpamvu ajuririra icyemezo cy’Urukiko rw’ibanze rwa Nyarugunga rwategetse ko afungwa by’agateganyo.

Gacinya yavuze ko ibyo urukiko rw’ibanze rwagendeyeho ari ibimenyetso we atemera agaragaza inenge zabyo. Gacinya Chance Denis mu mwambaro w’abagororwa imbere y’Urukiko. Avuga ko urukiko rwirengagije ko raporo yakozwe hagati ya REG n’Akarere ka Rusizi irimo amakosa ndetse agerageza kugenda agaragaza amwe n’amwe.

Muri ayo makossa yagaragaje, Gacinya ashinja Akarere ka Rusizi kuba karateguye isoko ridafite inyigo, ibi ngo byatumye atumiza amapoto 830 mu gihe amapoto yari akenewe yari 685 agomba gushyirwa ku mihanda 11. Avuga ko Urukiko rw’ubucuruzi rwari rwavuze ko Akarere ka Rusizi kazishyura Gacinya Denis akarangiza imirimo yari isigaye kuko umugenzuzi w’imari we yari yavuze ko imirimo yakozwe na Gacinya yari 87%.

Isoko muri rusange ryari rifite agaciro ka miliyoni 636 we akavuga ko yakagombye kuba yarishyuwe miliyoni 554 ngo nizo zaba zingana na 87% by’imirimo bavuga ko yakoze. Ariko nyamara ngo yishyuwe miliyoni 460 gusa. Yavuze ko abakoze Raporo bo birengeraga kugira ngo bagushemo we (Gacinya) ubu akaba afunzwe, akibaza impamvu ari we gusa ufunzwe mu gihe hari abandi Ubushinjacyaha buvuga ko bafatanyije nawe.



Gacinya we avuga ko raporo z’umugenzuzi mukuru na REG zakozwe mu mpapuro gusa, ko bamanuka bakajyana nawe kuri ‘terrain’ kuko bagenzuye basanga ahubwo Akarere ariko kamufitiye amafranga. Yavuze kandi ko atumva uburyo yambuwe isoko rigahabwa abandi, ngo ni akarengane yakorewe kuko Urukiko rw’Ubucuruzi rwari rwanzuye ko agomba kujya gukora imirimo akayirangiza.

Umwunganira mu mategeko nawe ntiyemera raporo yakozwe n’Akarere na REG ndetse akavuga ko icyemezo cy’Urukiko rw’ibanze cyateshwa agaciro, Avuga ko Gacinya ari umuntu ku giti cye atari akwiye kuba aryozwa ibyaha byakozwe na Kompanyi (ni Gacinya uyihagarariye) hagendewe kuri ‘Principe’ ya ‘Personne morale na Personne civique’

Uyu mwunganizi we avuga ko nta buryo REG itavugwa mu masezerano n’Akarere ka Rusizi gafitanye ikibazo na Gacinya bari kwiherera bagakora raporo Gacinya atabizi.

Bityo agasaba ko umukiriya we arekurwa kubera ko hari abantu babiri bemera kumwishingira, kandi Gacinya Chance Denis ari umuntu w’inyangamugayo wemeye kwitaba urukiko ntacyo yikanga, ari umuntu ufite umuryango yitaho n’umwana muto w’ibyumweru bitandatu. Avuga ko kandi umukiriya we afite indwara zidakira bityo Urukiko rukwiye kubigenderaho akarekurwa akaburana ari hanze.

Gacinya we kuri iki cy’uburwayi bwe yavuze ko arwara igifu bikaba bimusaba indyo yihariye atabona aho afungiye. Umushinjacyaha we yasabye Urukiko rwisumbuye kugumishaho icyemezo cy’Urukiko rw’ibanze agendeye ku kuba ibyo Gacinya avuga nta shingiro bifite. Ngo ntiyakwemererwa iriya ngwate atanga (y’abamwishingiye) kuko amategeko y’u Rwanda atemera ingwate mu gihe umuntu aregwa ibyaha bihanishwa igifungo kiri hejuru y’imyaka itanu (5).



Umushinjacyaha avuga kandi ko ari ibyaha bifitanye isano no kumunga ubukungu n’imari y’igihugu no guteza igihombo Leta kandi bifite uburemere bwagize ingaruka ku baturage benshi. We avuga ko umugenzuzi w’imari yagaragaje ko 50% by’amatara Gacinya yashyize ku mihanda atakaga.

Umushinjacyaha avuga kandi ko Gacinya ari we wasinyaga ku mpapuro nk’uhagarariye Kompanyi bityo amategeko yemera ko uhagarariye Kompanyi mu gihe akoze ibyaha abikurikiranwaho. Avuga kandi ko Gacinya yishyuwe miliyoni 495, kuko atarangije isoko riraseswa hiyongeraho miliyoni 338 zatanzwe mu rindi soko (iri nyine ritarangijwe). Baziha Reserve Force ngo irishyire mu bikorwa. Isoko ryagombaga gutangira mu kwa 11/2012 rikarangira nyuma y’amezi atandatu ariko hajemo ubukerererwe burebure cyane n’isoko ntiryarangizwa na Gacinya.

Ayo mafaranga yose ngo arenga miliyoni 400 Gacinya yateje igihombo Leta bityo agomba kuyakurikiranwaho nk’Umushinjacyaha abivuga. Amushinja kandi ko hari imirimo yishyuje n’ibikoresho bitujuje ubuziranenge bifite agaciro ka miliyoni 242. Ku cy’uburwayi bwa Gacinya, Umushinjacyaha we yavuze ko umugororwa uri mu maboko ya RCS ifite inshingano zo kumuvuza.

Gacinya Chance Denis azasomerwa umwanzuro kuri iri buranishwa i tariki 17 Mutarama2017.



TANGA IGITEKEREZO KURI IYI NKURU