Umugore mwiza si inzobe bita ikizubazuba. Umugore mwiza si uw’igikara wikoraho rikaka. Abagore beza mu buzima ni abakunda urukundo rukomeza indahiro.

Dore ibintu 16 biranga abagore beza mu buzima bwabo bwa buri munsi


• Umugore mwiza akunda akomeza indahiro
• Mu bukire, mu bukene mbese igihe cyose
• Uko umuntu bashakanye yaba ameze kose
• Gusanga abamushuka we ntabikozwa rwose.
• Oroha nkubwire kandi nkungure ubwenge
• Rwose wemere gutuza ube mutima w’urugo
• Emera gukunda urukundo rukomeza indahoro
• Mubyo uzakora ugakomera uzarukomeze
• Wubahe wawundi warahiriye ya ndahiro
• Imana n’abantu bose nibwo bazagushima
• Zirikana izi nama zikungura ubwenge
• Amahoro iwawe azahatura atahava iteka


Muri iyi ndorerwamo ushobora kumenya ubwawe niba uri umugore mwiza cyangwa niba hari ibyo ukwiye gukosora ngo ube umugore mwiza.
Dore bimwe mu biranga umugore mwiza.

1. Umugore mwiza arangwa no kubaha Imana Imigani 31:30. 
Kubaha Uwiteka nibyo shingiro ry’ubwenge Yobu 28:28, niyo mpamvu n’umugore abantu bashima bavuga ko azi ubwenge bwo kubaka urugo akwiye kuba atari umuntu uzi ubucakura, amanyanga cyangwa n’ibindi, ahubwo agomba kuba ari umuntu wubaha Imana. Uhereye kera muri Edeni, Eva yatangiye umushinga ukorwa na benshi yubahuka ibyo Imana yari yababujije, arya kandi aha umugabo urubuto rwabuzwaga. Ni byiza ko ubu noneho umugore wese agira umwete wo kubaha Imana ngo asane ibyanginjwe n’abo twese dukomokaho (Adamu na Eva).


2. Umugore mwiza arangwa no kuganduka no kubahisha umugabo we Imigani 31:23.

Umugore mwiza ni uganduka nkuko bibiriya ibimusaba Abakolosayi 3:18. Ni uwubaha umugabo atabitewe n’ubwoba bw’umugabo we cyangwa bw’abandi nk’abo muryango cyangwa abo aho asengera, atabitewe no gutinya guharikwa, dore ko abahugura abubatse hari igihe bahatira abagore kugira uko bitwara, bagereranya imyitwarire yabo n’iyindaya, bityo bigatuma abagore bahora bageragerageza ngo batavaho baharikwa, ahubwo bagandukira abagabo bazirikana indahiro barahiriye mu byicaro bicaranagamo mu irambagiza, bazirikana kandi amasezerano bagiranye nabo mu buyobozi n’imbere y’abayobozi b’idini n’abo basangiye ukwemera.

Ariko cyane babigirira kubaha nk’ukwa Sara wubahaga Aburahamu maze akamwita umutware. Ibyo ntibyavanagaho gutanga inama yabonaga ko zaba ari izo kubagirira akamaro, yewe niyo yabaga atabanje kwibaza bihagije ku byo agiye gusaba umutware we, ariko kandi yanubahaga umugabo we no kubintu yabaga yiyemeje atabanje kumugisha impaka ngo izo gahunda batavuganye nta zemera. Umugore mwiza abera umugabo ikamba kandi (Imigani 12.4)

3. Umugore mwiza agira umwete ku murimo Imigani 31:13,17. 
Twavuze ko ubunebwe ari ikintu gikomeye cyane gitera amakimbirane mu ngo kandi nibyo rwose. Aha rero ndashaka kwibutsa abagore ko bakwiye kugira umwete mu mirimo yabo, bitabujije gukomeza kugira umuco mwiza wo gutunganya ibintu neza nkuko bigararaga mu migenzerereze yabo. Umugore mwiza ntaryamira ngo ategekere mu gitanga ibyo abakozi cyangwa abana bakora we yigonera, iyo turebye inyigisho umuhanga wanditse imigani atanga mu gice cya 31:15, tubona uko umugore mwiza abyuka kare butaracya, akabwira abakozi ibyo bakora akorana nabo. Niwe kandi utegura ameza, umugabo we ntagaburirwe n’abandi, kandi n’abana be niwe ubaha icyo gufungura cya mugitondo.

Igihe bidakunze byaba byumvikana biramutse bitewe n’indi mirimo ahamagarirwa, ariko atari ukuba mu gitanda. Ariko se koko umugore yaryama, umukozi akaba ariwe utegura amazi muri dushe, akaba ariwe utegura umugati n’icyayi kubabibona, maze yarangiza agatangira gutera amahane ngo umugabo yongeza umukozi ate ? Aramwongeza kuko amwitaho ! Uretse kandi no kumwongeza umushahara hari igihe hashobora kuvuka n’indi mishyikirano kuko aba yashyizemo umwete wo kumutegurira, uwari ubikwiye yigonera.

4. Umugore mwiza arangwa no kwihanganira ibihe uko bihindagurika. 
Hari ibintu bibi umugore mwiza akwiye kwirinda kandi bikunda kugaragara cyane ko iyo ubukene bubaye mu rugo, umugore ashobora gutererana umugabo, ibi bikaba bikunze kugaragara cyane kubize, cyangwa ku bakire ; Nyamara ubukene ntibwari bukwiye gutuma umugore ahinduka uwo yasezeraniye gukunda akaramata baba bakennye, cyangwa bakize. Umugore mwiza nta hindurwa n’ubukire ngo yumve yarenze umugabo n’abandi bo mu muryango.

Mu gihe abantu barimo bashyira mu bikorwa gahunda y’uburiganire bw’umugore n’umugabo, ntibikwiye ko umugore w’umutima abyitwaza ngo ashake gusuzugura umugabo. Ahubwo hakwiye kubaho ubwuzuzanye buzanywe n’ihinduka ry’ikintu runaka, niba ari ikizana inyungu, ikwiye kuba iyabo bose. Niba ari imodoka abonye kubera umwanya ahawe cyangwa kwa kugira umwete k’umurimo, nubwo yaba imwanditseho, ariko akwiye gutekereza ko afite umutware, maze akamenya kujya inama nawe uburyo babyitwaramo.

5. Umugore mwiza arangwa no kubana neza n’abandi Imigani 31:20. 
Gushobora kubana neza n’abandi no kubitwaraho neza, bifite akamaro kanini kandi ibyo bifasha abantu kumenya uko bakemura ibibazo bitabura mu bantu, baba ababana mu rugo cyangwa mu baturanyi. Gushobora gukora ku umuntu ku giti cye ni byiza, ariko birushaho kuba byiza kurushaho iyo umuntu abashije kubana neza n’bandi ndetse no gukorana nabandi mu matsinda y’imirimo atandukanye. Ni byiza rero ko umugore agira imyifatire itabangamira abandi, abana n’abandi neza atabicaho ngo arabasumba, ngo ni abatindi, ngo ntacyo bafite, n’ibindi byo kunegura abandi.

Aramburira amaboko abakene akabafasha, ntiyica ku bantu ngo abane n’abakize nkawe, ahubwo abera imfubyi umubyeyi, akabera inshuti abatagira shinge na rugero. Agaburira abashonji kandi agaha icumbi abatagira epfo na na rugu. Ubukire ntibumutera isumbwe ngo yumve arenze abantu yewe nta nishyira hejuru abitewe n’ibyo Imana yamuhaye nk’intizo. Bivugwa ko urugo rukize rumenyekanira ku mugore, akenshi iyo mvugo ikaba iba ishaka kuvuga ko iyo hari icyo urugo rwungutse, abagore babyerekana mu buryo butandukanye, kandi akenshi bikaba bitagaragara ari uko afasha abakene ahubwo ari uko yambara imyenda ibabwira (atakireshya nabo), imvugo ye n’ingendo bihinduka.

Ibyo ntibikwiriye umugore mwiza, ahubwo ibikwiye ni ugutekereza ko ibyo byose ari ibikomoka ku Mana kandi ko abiherewe kugirango abikoreshe neza, aho kumutera kubana nabi nabo aba yumva arenze, ahubwo bikamutera ku bafasha ngo nabo babashe kwirirwa no kuramuka. Umugore mwiza arangwa no kubana neza n’abo mu muryango yashatsemo, akabubaha kandi akabakira neza igihe ba musuye, akabakorera ibyo ashoboye, byaba byiza akabyumvikanaho n’umugabo we.

Yego hari ababyeyi bagorana, hari kandi abaramukazi bashaka ibidashoboka ku bagore ba basaza babo, ariko ni byiza ko ku ruhande rw’umugore we akora ibyo yumva ashoboye, akabanira neza abo yashatsemo, abo aturanye nabo, abo bakorana cyangwa basengana, ariko cyane cyane akabanira neza abakozi n’abandi baba mu rugo.

6. Umugore mwiza ni umenya kuvuga aziga Imigani 31:25. 
Burya ururimi n’ubwo ari urugingo ruto mu ngingo nto z’umubiri, ariko nirwo rukomeye haba mu mibanire y’umugabo n’umugore, cyangwa mu mibanire n’abandi baba mu rugo ndetse n’abaturanyi muri rusange. Ubucuti bwubakwa n’ururimi kandi busenywa n’urimi. Imvugo y’uyu mugore igaragaramo ubwenge, itarimo urusaku, gushira isoni, ntabe nk’abamwe bavuga ngo aravuga nk’inkotsa. Akwiye kumenya kuvugana ituza, kubazanya imvugo nziza irimo ubwitonzi, yoroheje idakomeretsa umutima, ahubwo arimo gushishoza, akamenya ijambo rikwiye mu gihe arimo.

Abenshi mu bagore bakunda gusakuza no kujya gusakuriza hanze ngo amenyeshe abandi ko yagowe, si byo byiza, ahubwo umugore uzi ubwenge yegera uwo bagomba kuvugana maze bakaganira ku bibazo mu mutuzo. Niba hari nibyo abona ko atabwiwe ho ukuri, akwiye kuvuga aziga, ashakisha uburyo yakemura ibibazo ariko adashize ishoni, adashakuje kandi atihaye rubanda. Uyu mugore atanga inama z’ingirakamaro kandi nibyiza kumenya uko azitanga n’igihe azitangira.

Umugore umwe w’ahantu hitwa i Shunemu yagiye inama n’umugabo we ngo bubake icyumba hejuru y’inzu yabo kugirango umuntu w’Imana ajye acumbika mo. Mu byukuri uyu mugore mubo nkunda abamo, kuko yabereye umujyanama mwiza umugabo we bituma babona icyo bifuza bose. Burya mu kuvuga neza no gutanga inama nziza bishobora gutuma musohoka mu ngorane murimo nta wubahaye urwamenyo. Bagore mwige kuvuga mu ziga mwe kuba abanyamagambo n’abanyamahane.

7. Umugore mwiza ni umenya gutegura ibiribwa byiza Imigani 31:14-15. 
Hari imvugo ivuga ngo amagara aramirwa nta merwa, bishatse kuvuga ko iyo umuntu arya indyo yuzuye, irimo ibyubaka umubiri ; ibirinda indwara ; ibitera imbaraga, aba afite amagara mazima kubera ibyo yamize kuko amagara meza atakwimeza nka kimari uko imera mu murima. Umugore mwiza rero amenya gutegura indyo nziza, ni ukuvuga ajya mu karima k’igikoni cyangwa mu mirima, cyangwa utabifite akajya mu isoko, no mazu acuruza ibiribwa maze agahaha ibiribwa birimo ibitunga umubiri, ib’irinda indwara n’ibitera imbaraga. Ibi rero bizatuma abana bitwa cya bitama, bafite igikuriro kiza kubera gufungura neza. Indyo yuzuye ntiterwa n’uko umuntu ari umukungu, ahubwo ni ukumenya gutegura indyo yujuje ibyo bintu umubiri ukeneye. Uyu mugore rero atuma abo mu rugo rwe bagira amagara meza, bitavuze kubyibuha, kuko hari n’abemeza ko burya umubyibuho atari cyo kiranga ubuzima bwiza, kuko mu bantu babana n’indwara zikomeye abenshi usanga ari ababyibushye bikabije.

Ahubwo ab’umuryango w’umugore umeze atyo, usanga bakomeye, batarwaragurika, ahubwo bafite imbaraga. Rwose ni byiza ko umugore amenya uburyo bategura indyo nziza kugirango atanagira ikibazo mu buzima bwe n’umugabo, kuko abagabo benshi banagira ingorane mu murimo bahamagarirwa kubera kurya nabi. Ibi bisaba rero ko umugore ashaka mu bitabo byigisha ibyo guteka, ajya se kukigo nderabuzima kimwegereye, maze akabaza neza, uko yajya ategurira abo murugo indyo yuzuye, ibagirira akamaro kandi nawe igahindukira ikamwubakira urugo neza.

Abagore bamwe bananirwa gutegurira neza abagabo babo, barangiza bakirirwa biruka inyuma y’abifashisha ibintu bitandukanye ngo barabapfubura cyangwa ngo barunganira. Ibyo ni ubujiji bukomeye bushobora ariko kushira niba umuntu ashishikariye kumenya ibimureba no kubikora neza kandi ibyo harimo n’ibijyanye no gutegura indyo nziza ifite ibyangombwa bihagije.

8. Umugore mwiza arangwa no kwita ku bashyitsi : 
Bivuga ko urugo ari uregendwa, kandi urwo rugo, rugira ubukungu rubonera ku imigisha ituruka ku bashyitsi barugendamo. Ingero nyinshi tubona muri Bibiliya, zitwereka abagore beza bagiye bagirira neza abashyitsi maze bikaza kubabera iby’umugisha. Duhereye kuri Sara twakomeje gutangaho urugero, yemeye kwakirana na Aburahamu umutware we, kandi nta ruhare yari yagize rwo gutumira abashyitsi, kuko Aburahamu yanabasanze mu nzira aba arabatumiye.

Biragaragara ko Sara atari umugore w’ingare, ko Aburahamu atamutinyaga ngo bitume atinya gufata ibyemezo nkuko abagabo benshi babitinya, bagirango abagore babo batabakuramo iyo kotsa. Tubona kandi umugore w’i Shunemu ukuntu yakiriye umushyitsi, nanone kandi kubwo kubaha umugabo no kuganduka, akabanza kubimuganiriza, ngo bajye bamucumbikira. Ibyakurikiyeho ni uko umuryango wabigiriyemo umugisha. Hari umugabo wigeze kumpa ubuhamya ko kwakira abashyitsi, ari byo byatumye abona akazi keza cyane yakoze imyaka myinshi cyane.

Burya umugore niwe ushinzwe iby’umubano, haba mu bavandimwe mu baturanyi ndetse no mu bakorana n’umugabo we. N’ubwo umugabo yaba umunyabuntu, ugira urugwiro akabibishimirwa n’abantu bose, n’ubwo yaba umuntu uzi kuganira agasetsa ate, kwita ku bashyitsi akabakira, ntacyo bimarira abagenda mu rugo, kuko aba agerageza gukora nk’umusigire mu kazi k’abandi adashobora gufataho ibyemezo. Imyifatire mibi y’umugore cyangwa kudakunda abashyitsi kwe byirukana ababagenderera. Ugasanga umuryango ni nyamwigendaho, kandi rutabuze ikintu na kimwe, kandi yewe banafite abavandimwe batari bake.

Pawulo yigeze gusaba abantu yandikiraga kwakira neza Foyibe kubera ko nawe ngo yajyaga yakira neza abashyitsi ndetse ngo nawe yigeze kumwakira. Abaroma 16:1-2. Ndibwira ko abagore bamwe bashobora kuzagira ikibazo, bifuza kwakirwa mu bwami bwo mu ijuru, maze bakabwirwa ko badakwiye kwakirwa ngo kuko batakiriye abashyitsi. Kwakira abantu neza ntibisaba kuba uri umukungu. Papa kera yambwiye inkuru njya mbwira abantu kenshi, y’umugore wakiriye umwami akamuha amazi kuko yari umworo, maze umwami ngo yagera ibwami akohereza imbyeyi 8 n’inyana zazo ngo uwo mubyeyi ajye abona amata yo kwakira abamugana.

9. Umugore mwiza arangwa n’isuku kuri byose. 
Isuku n’iyo soko y’ubuzima bwiza. Umuntu n’ubwo yategura indyo yujuje ibyo umubiri ukenera ariko bikaba nta suku bifite, ntacyo bimaze. Umuntu kandi n’ubwo yagira inzu abantu batangarira, ariko ikaba nta suku iyibamo, ndetse n’ubwo yagira imyenda ituruka hakurya y’amazi magari, izanwa n’indege, ariko nta suku ayigirira, byaba nta cyo bimaze. Umugore mwiza rero ni ugira isuku muri byose : Ku bikoresho : Umugore mwiza akurikirana isuku y’ibikoresho byo murugo, byaba ibigaragara mu ruganiriro, ntibe byarahindutse ikigina kubera umukungugu.

Ashobora kuba afite abantu baba murugo bashinzwe icyo gikorwa, icyo akora ni ukubigisha uko bakora isuku, kubakurikirana, kubibutsa. Akwiye kandi kumenya isuku y’ibikoresho bindi cyane cyane iy’ibikoresho byo mugikoni, n’ibyo ku meza. Umugore utagira isuku ku bikoresho iwe ntihasiba indwara cyane cyane ku bana. Bakunda kugira impiswi itewe n’uko akenshi uwo mwanda ubatera inzoka cyangwa ibibazo mu mara. Izo ndwara nazo zitera ibindi bibazo, nko guhora kwa muganga bavuza ubudasiba, urwikekwe mu baturanyi ngo babarogera abana, n’ibindi. Ku biribwa n’ibinyobwa : Umguore mwiza agira isuku ku biribwa, byaba mbere yo kubiteka, mu gihe cyo kubiteka, ndetse na nyuma yo kubiteka. Umugore ugirira isuku ibiribwa, agaburira abo murugo ibiryo bidashobora kubatera indwara, kandi iyo abantu bafite amagara mazima, babasha no gukora imirimo iteza urugo imbere, igihugu cyose muri rusange.

Iyo isuku y’ibiribwa ijyanye no kuba biteguye ari indyo yuzuye, birushaho kuba byiza, kandi ugasanga urugo ruhoramo akanyamuneza. Umugore mwiza kandi ni ugira isuku y’ibinyobwa cyane cyane amazi. Amazi akwiye gutekwa, akamininwa, akabikwa mu kintu kiza gisukuye kandi ahantu heza hataza kugira ibijyamo. Amazi meza ni ngombwa mu rugo, mu gihe afite isuku agirira akamaro abana n’abakuru. Abahanga mu by’ubuzima bemeza ko amazi meza anywewe umuntu akibyuka, na mbere y’iminota mirongo itatu buri gihe mbere yo gufungura agirira akamaro umubiri w’umuntu. Nibyiza ko ibyo bikorwa kandi bigakoranwa isuku.

Imyenda n’ibiryamirwa : Umugore mwiza ni uwita ku isuku y’imyenda ye, iy’umugabo we, ariko cyane k’uy’abana bakiri bato bataramenya kwiyitaho. Nubwo umuntu yaba afite abamufasha imirimo, ni byiza ko we ubwe agira umwete wo kugegenzura niba imyenda y’abo murugo imeze neza. Imyenda y’abana nubwo yaba afite abayimesa, nawe akwiye kubigenzura, byaba byiza akanareba niba iteye ipasi. Isuku nke mu byumba ishobora gutera imbeba, ibinyenzi, inshishi n’utundi dusimba kuko tuba twiboneye aho twororekera, ubundi tukajya twonona ibyo munzu bitaretse no gutera izindi ngaruka nyinshi zirimo n’indwara.

Umwanda hafi y’urugo nawo ushobora gutera imibu kandi hakororokeramo ishobora gutera abo mu rugo marariya, ishobora gutera ibindi bibazo bitari bike. Ibiryamirwa nabyo bikwiriye kugira isuku, cyane cyane iby’abana bakinyara ku buriri, ibyo baryamira bikameswa, bikanikwa, bigaterwa ipasi aho bishoboka. Burya imirasire y’izuba yica za mikorobe zimwe na zimwe zishobora gutera ingorane abantu. Ibindi umugore mwiza yitondeta ni isuku yo mu kiryamo cye n’umugabo we. Akwiye gusasa neza ibifite isuku, mu cyumba gifite isuku.

10. Umugore mwiza yirinda kuba Kazitereyemo akagira amakenga 1 Samweli 25.18-35. Nubwo gusobanura amakenga icyo aricyo bidashobora koroha, ariko twavuga ko ari ukwikinga ingorane zishobora guterwa n’imyifatire runaka cyangwa se igikorwa runaka. Bityo nawe umaze gutekereza no gusesengura neza ukagira icyo ukora ngo uzibire ikibi cyari kuzakurikiraho nyuma. Ubwo uba ubaye umunyamakenga. Umugore mwiza ni ugira amakenga ntabe Kazitereyeremo, ngo yirohe mu byadutse byose, ahururire ibintu byose. Ahubwo agira umwanya wo gutekereza ingaruka kuri buri kintu, yibaza inyungu zirimo cyangwa ingorane zishobora gukurikira ikintu runaka.

Amakenga ku bishya byaduka mu rugo, noneho agashakashaka impamvu zabyo, igituma hari ibintu runaka abana basigaye bakora, ibishya basigaye bavuga, impamvu abaturanyi basigaye bagaragaza ibintu runaka, ni kimwe mu byo umugore mwiza akoraho ubushakashakatsi kandi muri kwa gutuza Imana yamuremanye, akamenya uko abyitwaramo, n’uko ndetse abo mu rugo bandi nabo bashobora kubyitwaramo. Umugore wa Nabari ni urugero rwiza rw’umugore wagize amakenga akamenya ko Dawidi ashobora kubagirira nabi kubera kwanga kumuha ibyo guha ingabo ze mu gihe zari zibabariye mu buhungiro.

11. Umugore mwiza ni uzi gucunga neza umutungo w’urugo Imigani 31:1. 
Umugore mwiza, umugore bita mutima w’urugo, ni ucunga neza umutungo warwo akamenya kubyaza umusaruro ibyo bafite, adasesagura ibyo batunze. Ku bahinzi amenya gukoresha abakozi mu mirima akorana nabo, akamenya imbuto zikwiye umurima, igihe cyo kuzihinga, igihe cyo gusarura no guhunika neza umusaruro basaruye. Nta sesagura umusaruro cyangwa ngo awumarire ku isoko ku mpamvu zitumvikana. Yirinda gucundira Nyakanga.

Uko nabibwiwe n’umwe mu babyeyi bakuru, iyi mvugo yavuye ku mugore utari uzi gucunga neza umutungo, mugihe abanyabwenge bacundaga bakabika amavuta yo kuzakoresha muri Nyakanga, we yabitse amavuta aza kuyihera umutekamutwe waje akamubwira ko ariwe Nyakanga, maze wa mwasama akamuhereza rwa rweso rw’amavuta, undi akigendera. Umugore mwiza agomba kumenya igihe cyo gutanga n’ukwiye guhabwa ntacundire Nyakanga. Afasha abita ku matungo ababa hafi kugirango arusheho gutanga umusaruro mwiza.

Ubundi gucunga neza umutungo no gutanga inama zituma urugo rutera imbere niho umugabo ashobora kubona ko yashatse neza. Bityo umugore wese akwiye kwihatira kumenya gucunga neza iby’urugo gushakisha uburyo bwose urugo rutera imbere, maze mu nama ze akabasha guhesha agaciro urugo rwe.

12. Umugore mwiza ntaca inyuma umugabo we Imigani 31:12. 
Abagore baca inyuma abagabo baba bakoze ibintu bibi cyane kuko uretse no gusuzuguza abagabo babo ; abana babo ndetse n’imiryango yabo ; nabo ubwabo baba bikoza isoni cyane. Bamwe mu bagore baca inyuma abagabo babo n’ubwo bagira impamvu nyinshi batanga ariko nta nimwe yumvikana, nubwo baba bashaka impamvu zo kwirengera, ariko ni kwakundi umunyarwanda yavuze ngo ntirubura icyo ruvuga.

Nubwo umugabo yaba aca inyuma umugore we, akora kure, cyangwa se afunzwe. Iyo hagize inkuru yumvikana ko umugore nyirakanaka aca inyuma umugabo we, usanga bagenzi be bababaye cyane bavuga ko akojeje isoni ababyeyi. Si byo gusa kandi Imana nayo irababara kandi koko aba anyuranyije n’itegeko ryayo kandi aba anatatiye igihango yagiranye n’uwo bashakanye igihe amusezeranya ko ntawundi azakunda, ntawundi azamurutisha, nta wundi azifuza. Burya umugore uca inyuma umugabo we, aba agize nabi cyane. Hari abana babuze umunezero mu buzima bwabo bwose kubera kumenya ko ababyeyi babo bacaga inyuma ba se.

13. Umugore mwiza atoza abo murugo isuku n’umuco mwiza Imigani 31:27. Umugore nubwo yaba ari umunyakazi abana n’abo mu rugo kurusha umugabo. Bityo imico y’abo murugo akenshi niwe uyibatoza. Iyo abana batagira imico myiza babigaya cyane umugore kuko aba ariwe utarabatoje umuco mwiza n’indangagaciro zikwiriye umuntu warezwe. Abantu basesengura ibintu n’ibindi bemeza ko abana benshi bagiye bagiye bagira ubutwari mu mibireho yabo babaga babitojwe n’ababyeyi babo.

Iyo tunarebye umurongo wa 1 muri iki gice cy’imigani twakoresheje cyane dusanga umwami Lemuweli yarigishijwe na nyina maze akamugire inama z’uburyo akwiye kwitwara. Muri make ni nyina wamutoje imico yagaragaje. Umugore ni umuntu ufite umwanya ukomeye mu mireho y’abantu, ntabwo rero umurimo we ari ukubyara gusa, ahubwo ukomeye ni ukurera aha umurongo ubuzima bw’abana. Mu bihe byinshi nabonye abana banakunda gukurikira imyizerere ya banyina kurusha iy’abase.

Ni byiza rero kubimenya ko umugore mwiza aha umuco mwiza abo mu rugo, abana bakamenya uko bitwara bitewe n’aho bari. Burya iyo umuntu yasuye ahantu ashobora kumenya ko umugore ari biri hanze kubera uko yabonye abana. Abana bagaragaza imico ya banyina cyane kurusha uko bagaragaza imico ya base. Twibuke ko kora ndebe iruta vuga numve.

14. Umugore mwiza arababarira kandi akihangana Ebanyefezi 4.32. 
Mu mibereho y’abantu babiri cyangwa barenga, buri gihe si ko bumvikana ku bintu byose, kandi hari igihe kigera hakababo no kutavugana neza cyangwa gukoserezanya. Umugore mwiza kandi uzi ubwenge rero, yihanganira igitekerezo kitamunyuze, kandi agashakisha izindi nzira ashobora kongera gutanga icye, ariko akabikora atuje atimyoza, atagaragaza umubabaro mu maso. Ikinini gikomeye kandi, ni uguha imbabazi buri wese mu bagize umuryango imbabazi mu gihe hagize ukora ikosa ; uko ryaba ringana kose. Ibyo bigakorwa atari ukugirango bucye kabiri, ahubwo bivuye ku mutima kandi bivuye ku rukundo, kuko rubabarira byose.

15. Umugore mwiza amara umubabaro umugabo we. Itangiriro 24.67. 
Umusore ashobora kuba yaranyuze mu mibereho imutera umubabaro cyangwa ibikomere. Ndanibwira kandi ko muri iyi myaka nandikamo iki gitabo, abasore benshi bafite ibikomere kubera amateka n’ibyababayeho by’umwihariko. Si bo gusa kandi n’abagabo benshi niba atari bose ni uko. Kandi burya mu mibereho yacu kuri iyi isi nta narimwe umuntu ataba afite ibimurushya buri munsi, ndetse muri Yobu ho hatubwira ko iminsi yose umuntu ari mu isi aba afashe igihe mu ntambara Yobu 7:1.

Umugore mwiza ategerejweho kumara umubabaro umugabo. Uko niko Lebeka yagiriye Isaka maze ngo kubera umugore mwiza amwibagiza umubabaro wa nyina yapfushije. Burya urupfu sirwo rutera umubabaro gusa, ahubwo n’ibyo umuntu ahura nabyo mu kazi, mu murimo w’idini cyangwa Itorero, habamo ibimubabaza. Umugore mwiza rero amenya ko umugabo yababaye bitewe n’uko asa mu maso, uko avuga cyangwa uko atuje, maze akamwegera akamuganiriza, bityo urwo rugwiro rugatuma amubwira ikimubabaje niba ari ngombwa, maze undi nawe akamenya kumumarisha umubabaro kumwurura, yifashishije ibintu byinshi bitandukanye.

Ashobora gukoresha ingero z’abandi bavuye mu bihe nk’ibyo barimo, ashobora kumuririmbira cyangwa akamutegurira ikintu runaka cyo kunywa cyangwa cyo kurya, ariko cyane cyane umugore mwiza afashisha umugabo we ibyanditswe byera kuko nibyo bihumuriza birusha ibindi kuba byiza. Umugore mwiza ntamera nka Yezebeli woheje umugabo kwimarisha umubabaro ibikorwa bibi byo kwicisha Naboti, nyamuneka wowe usoma iki gitabo, ndakwinginze witondere inama ugira umugabo wawe, kuko zishobora gusigira umuryango wanyu kugeza kubuzukuruza ibibazo bikomeye. Soma muri Bibiliya mu 1 Abami 21.7-25 wumve uko byagendekeye Ahabu kubera inambi za Yezebeli.

Umugore mwiza kandi nta mera nk’umugore Hamani wamugiriye inama yo gushinga igiti ngo aze kumanikaho Moridikayi, nyama Hamani akaza kwisanga ariwe ukimanitsweho. Tubona kandi abandi bagore bagiriye abagabo babo inama nziza, zikababera izizanira umugisha imiryango yabo ; twavuga nk’umugore w’I Shunemu wagiriye inama umugabo ngo bategurire Elisa aho azajya aruhukira kandi ibyo bikaza gutuma babonona umwana bari barabuze. 2 Abami 4.8-37.

16. Umugore mwiza ntaba Nyirandabizi. 
Bavuga Nyirandabizi ku muntu wese yaba umugore cyangwa umugabo ugaragaza mu kwirarira ko azi ibintu byose. Mbese ni umuntu kuri buri kintu atanguranwa mu magambo avuga ngo ibyo ndabizi ntacyo wambeshya. Uwo rero ntashobora kwemera ko muganira ngo mujye inama, umwereke aho ashobora kuba yibeshya mu bitekerezo bye, aho ashobora kuba afite intege nke mu migambi ye. Ntashobora guhugurika, kugirwa inama, cyangwa gukosoreka. Umugore mwiza rero ntiyigira nyirandabizi, kuko aramutse ameze atyo ashobora kugira umuryango uhora mu bibazo bikomeye.

Uwo ushobora kumugira inama yo kujyana umwana kwa muganga ; agahita akubwira ko icyo umwana we arwaye akizi kandi ko umunti awuzi ko ahubwo yabuze umwanya wo kujya kuwureba. Ushobora kumugira inama yo kugira aho mujya ngo muze gukora ibindi nyuma akakubwira ko abizi neza ko bitagenda neza muramutse muhinduye gahunda.


TANGA IGITEKEREZO KURI IYI NKURU