Mu karere ka Musanze mu murenge wa Nyange abaturajye bahatuye bakomeje gutabariza ubuyobozi kureba uko bakizwa amazi aturuka mu birunga ariguterwa n’imvura iri kugwa.

Musanze bakomeje guterwa n'ibiza by'imvura ituruka mu birunga



Nk’uko abaturage bo mu midugudu itandukanye y’akagari ka Ninda mu murenge wa Nyange ngo imvura ivanze n’umuyaga yaguye muri aka gace ku gicamunsi cyo ku cyumweru tariki 11 Gashyantare 2018, uretse gutembana imyaka y’abaturage yari ikiri mu mirima n’iyari mu mazu, yanasenye amazu abiri imwe muri yo igwira abana batandatu barakomereka.

Ikiza cyaje gusubirizwa n’indi mvura ivanze n’amahindu yongeye kugwa muri aka gaca ku gicamunsi cyo ku wa mbere, iyi nayo igateza inkangu itoroshye nayo abaturage bemeza ko yongeye kubasonga itembana imyaka mu mirima ndetse hamwe na hamwe imivu ikapfumura inzu z’abaturage ikabangiriza.

Uretse inzu ebyiri bigaragara ko zaguye burundu, bamwe mu batuye muri aka kagari bavuga ko n’inzu barimo nazo inyinshi zatobaguwe n’amahindu, bagahera aho batabaza inzego zishinzwe gukumira ibiza ngo zibagoboke mu maguru mashya, cyane ko banagaragaza impungenge ko ibi biza bishobora kwiyongera mu buryo butunguranye kuko n’ubundi ngo ari ubwa mbere aka gace kahura n’ibiza nk’ibi.

Ku ruhande rw’ubuyobozi bw’akagari ka Ninda ngo ku bufatanye n’inzego z’ibanze zibakuriye bagerageje gukora ubutabazi bwihuse ariko kandi nabo bakavuga ko bakeneye ubufasha bwo kubasha kugoboka abasizwe iheruheru n’iki kiza harimo ubwo kubabonera ibyo kurya ndetse n’isakaro, nk’uko ISHIMWE Justin umunyamabanga nshingwabikorwa w’aka kagari yabitangaje.

Uretse muri uyu murenge wa Nyange ikiza nk’iki cyanibasiye umurenge wa Cyuve, imirenge yombi ije yiyongera kuwa Shingiro, Busogo na Gataraga yari izwi ko ariyo ikunze kwibasirwa n’amazi aturuka mu ishyamba ry’ibirunga muri aka karere ka Musanze, ikibazo ariko nanone kitihariwe n’aka karere gusa kuko kanagisangiye n’utundi turere twose dukora kuri parike y’ibirunga.

Aya mazi aturuka mu birunga akomeje kugaragaza kongera ubukana mu gihe inzego zibishinzwe zitahwemye kuvuga ko harimo gukorwa inyigo y’uburyo aya mazi yakwitabwaho ntakomeze kwangiriza abaturage nyamara bamwe bakaba babibona nk’ibirimo gutinda.



Leave a Reply