Abahanzi b’imideli batandukanye b’Abanyarwanda bari mu bazerekana imideli y’umwihariko bakoze mu birori bya Kigali Fashion International Week (KIFW ), bigiye kuba ku nshuro ya mbere i Burayi.

Abahanzi b’imideli batandukanye b’Abanyarwanda bari mu bazerekana imideli y’umwihariko i Burayi

Iki gikorwa ni ku nshuro ya mbere kigiye gukorerwa hanze y’u Rwanda mu mwihariko wo gufasha abahanzi b’imideli b’Abanyarwanda kugeza ibyo bakora ku isoko mpuzamahanga ndetse no kugirana imikoranire n’abateye imbere bo hanze muri uyu mwuga.

Munguzi Martin uri mu itsinda riri gutegura ibirori bya KIFW yavuze ko imyiteguro yose isa n’igana ku musozo igisigaye akaba ari iminsi nyirizina y’amamurika akomeye azakorwa mu Buholandi no mu Bubiligi nk’ibihugu byatoranyijwe kwakira iki gikorwa.

Yavuze ko ikigamijwe ari ukuzamura urwego rw’abanyarwanda bakora mu ruganda rw’imideli; abazaturuka mu Rwanda bazahurira i Burayi n’abo mu bindi bihugu bitandukanye barimo abazava muri Amerika, u Buyapani, u Bubiligi, u Bwongereza n’ahandi.

Yagize ati “Mu mitegurire icyo tuzibandaho cyane ni uguhuza abakora mu ruganda rw’imideli hano mu Rwanda n’abo hanze babikora ku rwego mpuzamahanga. Ubu hari n’abo twatangiye kuvugana bashaka kwirebera ibyo Abanyarwanda bakora kugira ngo barebe niba bakorana na bo mu buryo buhoraho.”

Abahanzi nyarwanda bazerekana imideli muri Kigali International Fashion Week igiye kubera i Burayi ku nshuro ya mbere ni Patrick Muhire, uzaba ahagaraririye Inkanda Fashion House; Cyntia Rupari; Delphine House; Hakym Reagan; Umulisa Sandrine; na Doreen Umwari [D’ZOYAH Kreations].

Yavuze ko kuri iyi nshuro ya mbere bazabanza gukorana n’abamurika imideli b’Abanyarwanda ariko bakorera i Burayi ariko nyuma mu bindi bikorwa bazategura bazajya bajyana n’abo mu Rwanda.

Ibirori bya mbere muri uyu mwaka bitegerejwe mu Buholandi, hazabera imbanzirizamurika ya mbere ku itariki 24 Werurwe 2018, ibindi birori bibe ku munsi ukurikiyeho. Byose bizajya bibera muri Hilton Hotel ikomeye i La Haye. 

Bazava muri icyo gihugu berekeza mu Bubiligi ari naho hazabera ibirori bikomeye bya Kigali International Fashion Week bizakirwa na Thon Hotel. Umunsi wa mbere ku wa 30 Werurwe 2018 abashyitsi bazakirwa mu busabane no gusangira ku mugoroba wa ’Reception Cocktail’ ndetse hagaragazwe n’indyo za kinyarwanda hanyuma ibirori bya Kigali International Fashion Week nyamukuru bibe ku wa 31 Werurwe 2018.

Abahanzi b’imideli batandukanye b’Abanyarwanda bari mu bazerekana imideli y’umwihariko i Burayi

Munguzi yavuze ko mu bindi bintu bifite umwihariko bizamurikwa hazaba harimo imyambarire ishushe mu buryo gakondo bugaragaza u Rwanda, ndetse n’ibindi bizerekanwa n’abafatanyabikorwa barimo NAEB nk’Ikawa z’ubwoko butandukanye n’indabo.

Abakunze imyambaro n’ibindi bizaba byaramuritswe ku minsi yose izaberaho KIFW bazahabwa amahirwe yo kubigura ku itariki ya 1 Mata 2018 mu gikorwa kizakirwa na Thon Hotel mu Bubiligi.

Abateguye Kigali International Fashion Week batangaje ko iki gikorwa batangije cyo kugeza hanze y’u Rwanda ibi birori, nibigenda neza i Burayi, hazarebwa uko byagezwa no ku yindi migabane nka Amerika, Aziya n’ahandi hatandukanye ku Isi.

TANGA IGITEKEREZO KURI IYI NKURU