Facebook yongeye kugira isura mbi mu bantu ndetse igiciro cyayo ku isoko kiragabanuka, nyuma y’uko ikigo Cambridge Analytica, cyakoranye cyane na Perezida Donald Trump, bitangajwe ko cyakoresheje mu buryo butemewe imyirondoro y’abantu barenga miliyoni 50 bakoresha uru rubuga.

Facebook mu bibazo bikomeye cyane bishobora no kuyiviramo gufungwa

Mu mpera z’icyumweru gishize nibwo ibitangazamakuru, New York Times na Guardian, byatangaje ko ikigo Cambridge Analytica, cyabashije kubona amakuru bwite y’abantu bakoresha Facebook, kikayakoresha mu gushishikariza abantu gutora binyuze mu matangazo yamamaza ndetse no mu nkuru, ubwo Abanyamerika batoraga Perezida mu 2016.

Ibi byagize ingaruka zikomeye kuri Facebook kuko ejo kuwa Mbere agaciro kayo ku isoko kagabanutseho miliyari 37 z’amadolari, mu gihe Mark Zuckerberg wayishinze akanayibera Umuyobozi Mukuru, umutungo we nyuma y’imisoro n’ibindi wagabanutseho miliyari 5.1 z’amadolari.

Zuckerberg ufite imigabane ingana na 16% bya Facebook, ikinyamakuru Forbes gitangaza ko umutungo we ubarirwa muri miliyari 69.5 z’amadolari, ubu akaba ari uwa karindwi mu bakire ku isi yose avuye ku mwanya wa Gatanu yari asanzweho.

Umwaka ushize Facebook yarezwe kugira uruhare mu gutanga amakuru atari yo, gucamo abantu ibice hashingiwe ku bitekerezo byabo mu bihugu nk’u Bwongereza, Autriche, u Butaliyani n’ahandi kandi igatuma bayikoresha bakivanga muri politiki z’ibihugu.

Byatumye benshi bavuga ko Facebook ishobora kuba ikoreshwa mu nyungu za politiki. Ku cyumweru abadepite muri Leta Zunze Ubumwe za Amerika n’u Bwongereza basabye uru rubuga gutanga ibisobanuro kuri icyo kibazo kandi hagakorwa n’iperereza ryimbitse.

Bivugwa ko Donald Trump yaba yarishyuye Cambridge Analytica miliyoni zirenga 6.2 z’amadolari, gusa yakunze guhakana ko atigeze akoresha Facebook mu bikorwa bye byo kwiyamamaza.

Umujyanama Mukuru wungirije Paul Grewal, yavuze ko ibyabaye ari forode kandi bazakora igikenewe cyose kugira ngo amakuru afite ikibazo asibwe kandi ababigizemo uruhare bakurikiranwe. Nyuma y’aho gato Cambridge Analytica, yahise ihagarikwa kuri uru rubuga.

Zuckerberg w’imyaka 33 yashinze uru rubuga mu mwaka wa 2004 afite imyaka 19 yiga muri Harvard, kugeza ubu  rukaba rukoreshwa n’abarenga miliyari ebyiri ku kwezi. Mu 2017 yinjije miliyari 40.7 z’amadolari. Google na Facebook byihariye 60% by’amatangazo yamamaza anyuzwa kuri internet.

TANGA IGITEKEREZO KURI IYI NKURU