Abahanzi 10 bahatanye mu irushanwa rya Primus Guma Guma Super Star ya munani basuye Ingoro y’Amateka yo guhagarika Jenoside basobanurirwa uburyo yateguwe, uko yashyizwe mu bikorwa ndetse ikaza guhagarikwa.

Abahanzi bahatanye muri PGGSS8 basuye ingoro y'amateka
Abahanzi bahatanye muri PGGSS8 basuye ingoro y’amateka

N’igikorwa bakoze kuri uyu wa Gatanu Tariki ya 13 Mata 2018 aho bari baherekejwe n’abayobozi ba Bralirwa na EAP isanzwe itegura iri rushanwa.

Iyi Ngoro y’Amateka iherereye mu nyubako ikoreramo Inteko Ishinga Amategeko y’u Rwanda ku Kimihurura, ikaba igaragaramo urugendo rw’Ingabo za RPF rwaganishije ku ihagarikwa rya Jenoside mu 1994.

Mu gihe u Rwanda n’Isi yose bibuka Jenoside yakorewe Abatutsi mu 1994, abahanzi bahataniye irushanwa rya Primus Guma Guma Super Star uyu mwaka basuye Ingoro y’Amateka yo guhagarika Jenoside, berekwa amateka y’u Rwanda mu gihe cyo gusinya amasezerano ya Arusha, ibigaragaza abacurabwenge ba Jenoside n’abahezanguni batifuzaga ko amasezerano y’amahoro yagerwaho, ibigaragaza uko Jenoside yashyizwe mu bikorwa n’uko Ingabo zari iza RPF zayihagaritse.

Itsinda rya Just Family
Itsinda rya Just Family
Bahati wo muri Just Family na Queen Cha basobanurirwa amateka
Bahati wo muri Just Family na Queen Cha basobanurirwa amateka

By’umwihariko ubwo bari bageze ku gice kigaragaza uruhare rw’abanyamakuru n’abahanzi nka Simon Bikindi mu gukwirakwiza urwango no gutera ingabo mu bitugu umugambi wa Jenoside, abahanzi bahatanira PGGSS 8 bagaragaje ko umuyoboro bafite wo kugera ku bantu benshi wakoreshejwe nabi bityo bakeneye izindi mbaraga nyinshi kugira ngo batange ubutumwa bufitiye umuryango Nyarwanda akamaro.

Nyuma yo gusobanurirwa amateka, Abahanzi batangaje ko babonye byinshi batari bazi, bakaba biyemeje kubaka Umuryango Nyarwanda biciye mu butumwa batambutsa mu bihangano byabo, ndetse banaboneraho gushimira Ingabo za RPF kubw’umurava n’ubwitange bagaragaje.

Tubibutse ko irushanwa rya Primus Guma Guma Super Star ry’uyu mwaka rihatanyemo abahanzi bakurikira: Khalfan, Jay C, Bruce Melody, Christopher, Uncle Austin, Mico The Best, Active, Just Family, Queen Cha na Young Grace.

Khalifan
Khalifan
Umuraperi Jay C
Umuraperi Jay C

Ibitaramo bya Primus Guma Guma bizatangirira i Gicumbi ku wa 26 Gicurasi 2018, icya kabiri kizabera i Musanze ku wa 2 Kamena 2018, abahanzi bazataramira i Huye ku wa 16 Kamena 2018, bajye i Rubavu ku wa 30 Kamena hanyuma basoreze i Kigali ku wa 14 Nyakanga 2018 ari nabwo hazatorwa umuhanzi wegukana irushanwa.

Andika igitekerezo cyawe hano...