Kuri uyu wa mbere tariki ya 14 Gicurasi nibwo  ishyirahamwe ry’umupira w’amaguru mu Rwanda FERWAFA ryakiriye ibaruwa iyemerera kuzakomeza imikino ya shampiyona mu gihe igikombe cy’Isi kizaba kiri kuba.

FIFA yagize icyo yemerera FERWAFA mugihe igikombe cy'isi kizaba kiri kuba

Nkuko itangazo ryashyizwe hanze n’ishyirahamwe ry’umupira w’amaguru mu Rwanda ribivuga, iyi baruwa yaturutse muri FIFA yasubizaga ibaruwa FERWAFA yandikiye FIFA iyisaba ko mu gihe igikombe cy’Isi kizaba kiba, imikino ya shampiyona y’u Rwanda nayo izakomeza igakinwa ahanini kuko amakipe yo mu Rwanda nta bakinnyi bazakina igikombe cy’Isi cyangwa bazaba barimo ku buryo byabangamira ayo makipe y’ibihugu.

Mu ibaruwa ya FIFA yasinyweho n’umunyamabanga Mukuru wungirije Zvonimir Boban yagize iti : ” Twishimiye kubamenyesha ko twasomye ubutumwa bwanyu butumenyesha ko mwifuza gukomeza imikino y’amarushanwa igihe imikino y’igikombe cy’Isi izaba iba,FIFA nta kibazo ifite ku marushanwa y’umupira w’amaguru mu Rwanda, mu gihe cyose amazina y’abakinnyi bazaserukira ibihugu byabo mu mikino y’igikombe cy’Isi azaba yamaze gutangwa tariki ya 21 Gicurasi, batarimo.”

Iyi baruwa yahise iha uburenganzira FERWAFA bwo gukomeza amarushanwa y’imbere mu gihugu arimo Shampiyona y’icyiciro cya mbere ya Azam Rwanda Premier League, Icyiciro cya kabiri ndetse n’imikino y’amarushanwa y’igikombe cy’amahoro. Muri aya marushanwa kandi hararebwa abahungu n’abakobwa.

Igikombe cy’Isi biteganyijwe ko kizatangira tariki 14 Kamena kirangire Tariki 15 Nyakanga kikazabera mu Burusiya.

TANGA IGITEKEREZO KURI IYI NKURU