Mohamed Salah yamaze amatsiko abiyumvishaga ko nyuma yo kuva mu kibuga yavunitse urutugu mu mukino wa nyuma wa Champions League, atazakina imikino y’igikombe cy’Isi izabera mu Burusiya izatangira mu byumweru bibiri gusa, maze abizeza ko azaba ameze neza kandi bazamwishimira.

Mohamed Salah yakomoje ku mvune ye avuga ko azitabira igikombe cy' Isi

Mohamed Salah yavuye mu kibuga ku munota wa 30 w’umukino nyuma yo kuvunwa na myugariro ari nawe kapiteni w’ikipe ya Real Madrid Sergio Ramos, aho yasohotse arira n’ububabare bwinshi, ibintu byatumye abanya-Misiri n’abafana ba Liverpool bavuga ko bigoranye ko uyu musore wataka aciye mu mpande yazagaragara mu gikombe cy’Isi.

Nyuma yo kubonana n’abaganga , Salah yatangaje ko azaba ameze neza mu gikombe cy’Isi ariko akaba asaba amasengesho ya buri wese.

Ikipe y’igihugu ya Misiri (Egypt) izakina umukino wa mbere mu gikombe cy’Isi tariki ya 15 Kamena ihure n’ikipe y’igihugu ya Urguay ikinamo Luis Alberto Suárez Díaz, umukino uzabera kuri Sitade ya Yekaterinburg.

Kuri iki cyumweru taliki ya 27 Gicurasi, mu magambo ye, Mohamed Salah yanditse kuri twitter ye avuga ko ryari ijoro ritoroshye na gato kuri we ariko ko ari indwanyi.

Yagize ati: “Ryari ijoro rikomeye cyane, ariko ndi indwanyi. Nubwo bitoroshye, mfite icyizere ko nzaba ndi mu Burusiya nkabashimisha. urukundo n’ubufasha bwanyu bizampa ingufu nkeneye.”

Mohamed Salah yakomoje ku mvune ye avuga ko azitabira igikombe cy' Isi

Uku kuvunika kwa Mohamed Salah kwateje impaka mu bantu kugeza no kuri Minisitiri wa Siporo muri Misiri, aho yavugiye kuri Televiziyo y’igihugu ko ari ibintu bibabaje ariko ko barakora ibishoboka byose kugira ngo uyu musore akire vuba.

Hari amakuru avuga ko ibyihebe byo muri Misiri ngo biri gushakisha Sergio Ramos ngo bamuzize ibyo yakoze avuna Mohamed Salah. Uretse muri Misiri ariko, no mu bwongereza Polisi iri gucungira umutekano ku buryo buhambaye umuzamu wa Liverpool Karius bashinja ko yatsindishije ikipe, aho abenshi bari kumutera ubwoba bamwifuriza gupfa.

TANGA IGITEKEREZO KURI IYI NKURU