Mu mudugudu wa Kamugaru akagali ka Bunyogombe mu murenge wa Ruhango Akarere ka Ruhango, hari akazu gato  gasakajwe amategura kubatswe nk’umwobo, hashize igihe kinini kigera ku myaka isaga icumi kabamo umuntu urwaye mu mutwe.

Amaze imyaka 10 aba mu mwobo kubera uburwayi bwo mu mutwe

Umugabo witwa Bayiramye Jean Pierre amaze imyaka igera ku icumi aba mu nzu imeze nk’umwobo, yubatse ku buryo butangaje, igice kinini cyayo kiri mu butaka, igice cyo hejuru gisakajwe amategura.

Uyu Bayiramye Jean Pierre ntibyoroshye ku musanga iwe nk’uko bishimangirwa n’abaturanyi be, gusa nk’abantu babana na we umunsi ku wundi bavuga ko ubuzima babona abayemo atari bwiza na gato nubwo bakeka ko afite uburwayi bwo mu mutwe. Abaturanyi be bifuza ko yavuzwa kuko ngo hari igihe ajya anafata abakobwa n’abagore ku ngufu, kandi akanashakirwa aho kuba hazima.

Ubuyobozi bw’Umurenge wa Ruhango bwemeza ko Bayiramye afite uburwayi bwo mu mutwe bukanashimangira ko bukora uko bushoboye kose bukamuha ubuvuzi buhoraho ndetse bukanamwimura muri uyu mwobo, ariko imiti yatewe yamara kumushiramo akawugarukamo.

Amaze imyaka 10 aba mu mwobo kubera uburwayi bwo mu mutwe

Nubwo ubuyobozi bw’Umurenge wa Ruhango bwemeza ko iyo uburwayi bwo mu mutwe bwa Bayiramye bwageze ku ntera yo hejuru ari na byo bimutera kuba muri uyu mwobo bwemeza ko ngo bumusubiza kwa muganga ndetse bukanamujyana kubana n’umugore n’abana be ariko abaturanyi be bo bavuga ko ahora muri uyu mwobo.

Gusa nyuma gato y’uko umunyamakuru avuye gusura aka kazu kameze nk’umwobo bivugwa ko Bayiramye Jean Pierre amaze igihe kitari gito abamo no kuganiriza abaturanyi be karashenywe na we arajyanwa.

Leave a Reply