Umutoza Kayiranga Baptiste watozaga ikipe ya Alliance Sport Club yo mu gihugu cya Tanzania yahagaritswe n’ubuyobozi bw’ikipe ya Alliance Sport bitunguranye.

Kayiranga Baptiste yatunguwe n'ibaruwa imuhagarika ku kazi

Umutoza Kayiranga Baptiste watozaga ikipe ya Alliance Sport Club yo mu gihugu cya Tanzania yahawe ibaruwa imusaba gusesa amasezerano y’imyaka itatu yari yaragiranye n’iyi kipe. Ni nyuma yo kwanga kugabanyirizwa umushahara no kuza gutoza Amavubi y’abagore muri CECAFA Women Challenge.

Uyu mutoza asanzwe ari mu batoza bafite ubunararibonye mu bijyanye n’imitoreze hano mu Rwanda dore ko anafite impamyabumenyi yo ku rwego rwa A itangwa na CAF, yari yasinyiye Alliance Sport Club kuyitoza imyaka itatu kuva mu kwezi Gicurasi uyu mwaka.

Kayiranga Baptiste yatunguwe n'ibaruwa imuhagarika ku kazi

Mu ntangiriro z’uku kwezi turimo kwa Kanama nibwo yagejejweho ubusabe n’ikipe ya Alliance Sport Club bw’uko hagira ibihinduka mu masezerano bari bagiranye birimo n’uko yakwemera kugabanyirizwa umushahara ndetse akaba yanakwemera gutoza Alliance Sport Club y’abagore ariko we akaza kubyanga kugeza aho iyi kipe inamuhereye ibaruwa isesa amasezerano.

Kayiranga aganira n’itangazamakuru ku mpamvu zaba zaratumye atandukana n’iyi kipe yagize ati: “Mbere yo kuza muri Cecafa y’abagore bambwiye ko bampaye uruhushya kubera batarabona amafaranga yo gusinyisha abakinnyi kandi ko nanjye batazampemba ukwezi kwa 7.”

“Kuva mvuye muri Cecafa banyingingiye kugabanya umushahara wanjye mo kabiri hanyuma nkabatoreza ikipe y’abakobwa mbabwira ko bitashoboka. Kuba hari ibyo nari nkibasaba biri mu masezerano nk’imodoka, inzu yo kubamo n’uruhushya rwo gutangira akazi (permit de travail) kandi bisaba amafaranga batiteguye kwishyura.”

“Kuba bari bizeye kuzabona abaterankunga bakababura. Hanyuma ibyo kuba naratoje u Rwanda (Amavubi y’abagore) tugatsinda Tanzaniya byaba impamvu cyangwa ntibibe yo kuko babiganira nk’abikinira.”

Kayiranga Baptiste yatunguwe n'ibaruwa imuhagarika ku kazi

Kayiranga Baptiste yari yagiye mu ikipe ya Alliance Sport Club mu rwego kuyifasha kwitwara neza muri shampiyona y’icyiciro cya mbere, nyuma y’aho izamuwe mu makipe ane yashyizwe muri shampiyona y’iki cyiciro muri Tanzania kugira ngo bagire umubare w’amakipe 20 akina shampiyona y’icyiciro cya mbere.

Leave a Reply