Nyuma y’imyaka 10 Minani Rwema amaze atabarutse hateganijwe igitaramo cyo kumwibuka

924

Itsinda ry’urubyiruko ritegura ibitaramo byiswe ‘Umurage Nyawo’ bigamije kwibuka abahanzi babaye indashyirwa, uyu mwaka ryahisemo kwibuka umuhanzi Minani Rwema witabye Imana muri 2008.

Nyuma y’imyaka 10 Minani Rwema amaze atabarutse hateganijwe igitaramo cyo kumwibuka

Imyaka 10 irashize umuhanzi wamamaye mu Rwanda Minani Rwema yitabye Imana.  Yaguye mu gihugu cy’Ubuhinde aho yari kwivuriza indwara y’umwijima. Iyi nkuru icyumvikana yababaje benshi mu bari bazi uyu mugabo.

Yari akunzwe mu ndirimbo zitandukanye cyane cyane iyitwa ‘Sur La Terre’ yuje impanuro nyinshi ariko ikoze mu buryo bwo gushyenga. Kugeza n’ubu indirimbo ze zitandukanye zirakoreshwa mu mihango y’ubukwe bwa Kinyarwanda.

Umuryango w’ urubyiruko witwa Critical Thinking For Peace uyobowe na Murekezi Derrick bafatanyije na Ifashabayo Sylvain Dejoie wiga muri Kaminuza ya Ashesi yo muri Ghana, bateguye igitaramo cyo kwibuka Minani Rwema, kikaba giteganyijwe kuba kuwa 24 Kanama 2018 muri Kigali Serena Hotel.

Iki gitaramo cyizitabirwa n’abahanzi batandukanye barimo Mariya Yohana, Masamba Intore, Jules Sentore, Cyusa (murumuna wa Stromae) Audia Intore, Angel na Pamela, Andy Bumuntu na Mani Martin bakiri mu biganiro.

Ifabashabayo Sylivain Dejoie yavuze ko igitaramo nk’iki cyo kwibuka Minani Rwema bagiteguye mu rwego rwo gusigasira umurage yasize no gufasha abakiri bato kumenya ibigwi by’intwari zataburutse kugira ngo bazabyigane.

Amafaranga azava muri iki gitaramo  amwe azashyirwa mu muryango wa Critical Thinking For Peace andi ahabwe umuryango wa Minani Rwema uhagarariwe n’umufasha we Umulisa Jackie.

Nyuma y’imyaka 10 Minani Rwema amaze atabarutse hateganijwe igitaramo cyo kumwibuka

Umugore wa Minani Rwema amufata nk’intwari…

Umugore wa Minani Rwema, Umulisa Jackie avuga umugabo we nk’umugabo w’intwari waranzwe no gukunda igihugu kuva mu bwana bwe, aho yaretse kujya mu ishuri nk’abandi ahubwo akifatanya n’abandi mu rugamba rwo kubohora igihugu.

Yagize ati: “Minani Rwema ntabwo yinjiye mu gihugu nk’abandi babwiye ngo muze mutahe igihugu cyabonetse. Yahagurutse ari umwana muto ukeneye kwiga, ajya gufasha abandi kugira ngo igihugu kibe nk’uko kimeze uyu munsi. Ubuto bwe yabukoresheje mu gukunda igihugu no kwitangira benshi.”

Urugamba rurangiye Minani Rwema yagiye akora mu nzego zitandukanye nk’aho yabaye Umuyobozi w’Akarere Wungirije Ushinzwe Urubyiruko, aba mu batangiranye n’Itorero ry’Igihugu n’indi mirimo itandukanye.

Umulisa Jackie avuga ko mu ngazo ya Minani habaga higanjemo urukundo no kwitangira igihugu.

Ni ku nshuro ya kabiri hategurwa igikorwa cyo kwibuka abahanzi babaye indashyikirwa. Mu mwaka ushize habaye igitaramo cyo kwibuka umuhanzikazi Kamaliza. Umuryango we wahawe amafaranga agera kuri miliyoni yo gukomeza kwita ku bana yareraga.

Si abitabye Imana gusa bazajya bibukwa, kuko abategura ibi bitaramo bateganya no kwizihiza ibigwi by’abahanzi bakiriho babaye indashyikirwa.

TANGA IGITEKEREZO KURI IYI NKURU