Abana b’abakobwa basabwe guhaguruka bagafata iya mbere mu gufatanya n’ibindi byiciro by’abanyarwanda mu gukumira no kurwanya abahohotera n’ abasambanya abana.

Ibi byagarutsweho kuri uyu wa 11 Ukwakira, mu Ngoro y’Inteko Ishinga Amategeko y’u Rwanda, ubwo urubyiruko rw’abakobwa bagera kuri 300 baturutse mu mashuri yisumbuye, kaminuza n’ay’ubumenyi ngiro, bitabiraga ibirori byo kwizihiza Umunsi Mpuzamahanga wahariwe umwana w’umukobwa.

Byahuriranye no gutangiza ubukangurambaga bwa ‘Girl2Leader’ bwatangijwe n’Ihuriro ry’Abagore b’Abayobozi ku Isi, rigamije gutoza abakobwa bakiri bato gutinyuka kujya mu buyobozi no mu zindi nzego za Politiki.

Minisitiri y’Uburinganire n’Iterambere ry’Umuryango, Nyirasafari Esperance yavuze ko hakwiye kuzirikanwa ibyo igihugu cyagezeho ariko hakibukwa n’imbogamizi zigihari.

Abasambanya abana basabiwe kwamaganwa

Yagize ati: “Umwana w’umukobwa nta na hamwe ahejwe, bose bariga, mu nzego zose barimo haba no mu nzego z’umutekano abakobwa barimo.”

Kuri uyu munsi kandi hatangijwe ubukangurambaga bw’imiyoborere mu muryango bufite insanganyamatsiko igira iti “Twubake umuryango twifuza turwanya gusambyanya abana.”

Ibikorwa biteganyijwe muri ubu bukangurambaga buzamara amezi abiri bizibanda ku gukumira no kurwanya ikibazo giteye inkeke cyo gusambanya abana b’abakobwa.

Minisitiri Nyirasafari yagize ati “Intego yacu ni ugukangurira ibyiciro bitandukanye birimo ababyeyi, abarezi, abana, urubyiruko, duhereye ku bari hano mu kugaragaza abasambanya abana, kubarwanya no guhangana n’ingaruka zabyo hagamijwe kurengera abana, gukumira no guhangana n’ikibazo cyo gutwita kw’abangavu.”

Ihuriro ry’Abagore b’Abayobozi ku Isi ryashinzwe muri 2013 rifite intego yo gukangurira abana b’abakobwa kujya muri politiki n’izindi nzego zifata ibyemezo, mu Rwanda akaba ariho hari icyicaro cy’iri huriro ku rwego rwa Afurika kuva muri Mata uyu mwaka.

U Rwanda ruza imbere ku Isi mu guha rugari abagore, aho mu Mutwe w’abadepite bangana na 61.2% naho muri Guverinoma ni 41.5%.

Leave a Reply