Adam Abubakar uzwi ku izina rya Dj Adams uzwi cyane mu gushungura ibikorwa by’abanyamuziki mu Rwanda, avuga ko ubu abanyarwanda bamaze guhumuka mu bya muzika bari kugenda bamenya gutandukanya abahanzi n’abahashyi.

Dj Adams aratangaza ko Abanyarwanda bitiranya abahanzi n’abahashyi

Dj Adams azwi cyane ubwo kuva ahagana 2010 yamenyekanishaga kuri radio ijambo ‘gushishura’ (gukopera) indirimbo bigakorwa n’umuhanzi wiganye iy’abandi.

Avuga ko icyo gihe bamwe bamufashe nk’umuntu urwanya ibikorwa by’abandi n’iterambere rya muzika mu Rwanda, nubwo hari ababonaga ukuri kwabyo.


Avuga ko byageze aho bamwe bamwamagana ku mugaragaro ariko ntiyacika intege kujora abakora abahanzi bakora ibi bikorwa, n’ubu bamwe bakomeje.

Dj Adams ati: “ukuri guhora ari ukuri kabone nubwo kwaba gukoreshwa n’umuntu umwe, ikinyoma kikaba ari ikinyoma kabone nubwo cyaba gikoreshwa na buri muntu wese.”

Muri uyu mwaka ibyo kwigana bikabije indirimbo z’abandi (gushishura) byarongeye, zimwe mu ndirimbo zisohoka hagaragazwa izo biganye zakozwe n’abo mu mahanga ntizimenyekane mu Rwanda.

Bamwe mu bahanzi babikoze barabyemeye basaba imbabazi Abo barimo Allioni na Bruce Melody ku ndirimbo baheruka gukorana yitwa Tuza bavuze ko babikoze batabizi babishinja Dj Zizou ngo wayibagurishije.Dream Boys, Social Mula, Tom Close, King James n’abandi nabo bavuzweho ibi byo ‘gushishura’ indirimbo z’abandi. Bose bagiye babitangaho ibisobanuro binyuranye.


Adams avuga ko indirimbo ‘zishishuye’ na mbere zari nyinshi ahubwo akaba ari we ubasha kubyamagana wenyine abandi bagaceceka.

Ati: “Ndashima abamaze kubona ko gucurika ibintu ntacyo bimariye umuziki ahubwo nabasaba gufatanya kugirango ugere kure tunamagana abagenda baduha ibikatsi kandi dufite n’ abandi beza bo kuduha umutobe.”

Adams avuga ko Abanyarwanda ndetse n’itangazamakuru bamaze guhumuka bagenda babona banatandukanye abahanzi n’abahashyi.

TANGA IGITEKEREZO KURI IYI NKURU