Mu bikorwa byo gukumira ibyaha bikorerwa mu mazi kuri uyu wa 29 Ukwakira 2018, Polisi y’u Rwanda mu karere ka Karongi yatanze ibiganiro bigamije gushishikariza abaturage kugira uruhare mu gukumira ibiyobyabwenge na magendu byinjira muri aka karere binyuze mu kiyaga cya Kivu.

Karongi: Abarobyi basabwe kurwanya ibiyobyabwenge na magendu binyuzwa mu kiyaga cya Kivu

Ni ibiganiro byahawe abakora umwuga w’uburobyi mu kiyaga cya Kivu ndetse n’abagize komite zo kwicungira umutekano bagera kuri 700 bakomoka mu mirenge ya Bwishyura, Mubuga na Gishyita.


Ibi biganiro byibanze ku ruhare umurobyi akwiye kugira mu kwicungira umutekano arwanya ibiyobyabwenge na magendu byambukira mu turere twose dukora ku kiyaga cya Kivu, aho byari biyobowe na Chief Inspector of Police (CIP) Elie Niyongabo uyobora Polisi mu karere ka Karongi ari kumwe na Nikuze Marceline ushinzwe iterambere ry’Amakoperative muri aka karere.

CIP Niyongabo yasabye abarobyi bakorera mu kiyaga cya Kivu kugira uruhare mu gukumira ibikorwa bihungabanya umutekano.

Yagize ati “Ikiyaga cya Kivu ni hamwe mu hafatwa nk’inzira yinjiriramo  ibiyobyabwenge ndetse na magendu  byose bikomeje  kugira uruhare mu bikorwa bihungabanya umutekano bikanadindiza iterambere ry’Igihugu.”

CIP Niyongabo yibukije aba barobyi ko imisoro n’amahoro  ari bimwe mubituma igihugu cyihaza mu bukungu iterambere rirambye rikabasha kugerwaho.

Yagize ati “Amafaranga ava mu misoro n’amahoro akoreshwa mu kubaka ibikorwaremezo nk’imihanda, amashuri, ibitaro, amasoko n’ibindi, ibi byose bikaba bigirira akamaro abaturage.kurwanya uwo ariwe wese ugerageza kunyereza imisoro bikaba bikwiye kuba inshingano za buri wese hatangwa amakuru kunzego z’umutekano.’’

CIP Niyongabo abarobyi ndetse n’abagize komite zo kwicungira umutekano kurushaho gukorana n’inzego z’ubuyobozi mu nzira yo kurwanya ibiyobyabwenge kuko bikomeje kwangiza urubyiruko, bikanaba intandaro y’ibyaha birimo amakimbirane mu miryango, urugomo ndetse n’ihohoterwa.

Nikuze Marceline ushinzwe amakoperative mu karere ka Karongi yasabye aba barobyi kunoza ibyo bakora barwanya uwasiga umwuga wabo icyasha.


Yagize ati “Mukwiye guharanira ko nta murobyi wagaragara mu bikorwa birimo ubufatanyacyaha mu kwinjiza magendu cyangwa ibiyobyabwenge kuko yaba ahesha isura mbi umwuga wanyu.’’

Nikuze asoza asaba aba barobyi kwibumbira mu makoperative kuko bizabafasha kugera ku iterambere kandi bikanabafasha gutahura ushobora kubihishamo agakora ibinyuranyije n’amategeko.

Uwimana Celestin uhagarariye abarobyi mu karere ka Karongi yijeje inzego z’umutekano ubufatanye mu gukumira abinjiza ibiyobyabwenge na magendu binyuze mu mahuriro  6 yo kurwanya ibyaha (Anti-crime clubs) agizwe n’abarobyi bakorera muri aka karere.

TANGA IGITEKEREZO KURI IYI NKURU