Kuri uyu wa Kane tariki 25 Ukwakira 2018 nibwo Rayon Sports izamurika ku mugaragaro imyenda mishya izakoresha muri ’Saison’ ya 2018/2019, Queen Cha na King James bazasusurutsa abafana.

King James na Queen cha bazatarmira abarayon ku munsi wo kwerekana ku mugaragaro imyambaro mishya ya Rayon Sport

Ni umuhango uzabera muri Petit Stade i Remera guhera saa kumi n’imwe z’umugoroba. Kwinjira bizaba ari 2000 FRW na 5000 FRW. Biteganyijwe ko ariho hazanerekanirwa ku mugaragaro abakinnyi bashya b’iyi kipe ndetse na numero buri mukinnyi azajya bambara.

Queen Cha na King James nibo bahanzi bazasusurutsa ibyo birori. Ibyo kurya no kunywa bizaba biteganyijwe ndetse n’utundi dushya tunyuranye nkuko ubuyobozi bwa Rayon Sports bwabitangaje

Tariki 20 Ukwakira 2018 nibwo Rayon Sports yatsinze umukino wa mbere wa Shampiyona itsinze Etincelles 1-0 i Rubavu. Rayon Sports yakinnye itambaye imyambaro yayo mishya kuko yari itaragera mu Rwanda. Imyambaro mishya yayo izayambara ikina umukino wa 2 wa Shampiyona na Mukura VS kuri Stade ya Kigali ku Cyumweru tariki 28 Ukwakira 2018.

Queen Cha, umwe mu bahanzi bazaririmba muri uyu muhango aheruka gusubiramo indirimbo ye yise Winner’ ayitura abafana ba Rayon Sports. Ni umukobwa wa Mugemana Charles, umuganga wa Rayon Sports umaze imyaka igera kuri 20 avura abakinnyi ba Rayon Sports.

King James na we ni umwe mu bahanzi bakunda gukurikirana umupira wo mu Rwanda by’umwihariko akaba umwe mu bahanzi bafana Rayon Sports.

TANGA IGITEKEREZO KURI IYI NKURU