Ikipe ya Gasogi United yo mu cyiciro cya kabiri yanganyije na Rayon Sports mu mukino wa gishuti Ku Cyumweru i tariki 7 Ukwakira 2018.

KNC yishimiye ko Gasogi United yanganyije na Rayon sports

Umukino wahuje ikipe ya Rayon sports na Gasogi fc, ni umukino wa 7 wa gishuti Gasogi United ikinnye idatsindwa. Undi umukino heruka kunganya n’ikipe ya Kiyovu SC 1-1. Mu mukipe yo mu cyiciro cya mbere, Gasogi fc yatsinze harimo umukino wa Police FC na AS Muhanga.

Nyuma y’umukino, umuyobozi w’ikipe ya Gasogi fc KNC yabwiye abanyamakuru ko bishimiye ibyavuye mu mukino. Yagize ati: Resultat (uko umukino urangiye) simbi. Twashoboraga kuba twatsinze ibitego birenze 1 kuko hari nk’igitego twahushije mu gice cya mbere, hari icyo duhushije mu gice cya kabiri , na penaliti yindi njyewe nabonye batwimye.”

“Rayon Sports ni ikipe nkuru, ibivuye mu mukino turabyakiriye. Icya ngombwa byari ukwereka abana ko bashobora gukina ku rwego urwo arirwo rwose kandi mwabibonye. Biragaragara ko igitutu cya Rayon Sports twavugaga cyari cyazamutse, wabonaga bafite igitutu kurusha icyo twari dufite.”

KNC yakomeje avuga ko anyuzwe n’uyu mukino. Yavuze ko ikipe ye yari ifite ibibazo mu bwugarizi kubera bamwe mu bakinnyi barwaye.

Abajijwe ibanga ritumye ikipe ye imara imikino 7 idatsindwa kandi yaranakinnye n’amakipe akomeye yo mu cyiciro cya mbere, yagize ati: “Ni mu mutwe, nabwiye abana ko mu Rwanda abakinnyi bose ari beza kandi bose bari ku rwego rumwe, Igitandukanye ni mu mutwe, wabonaga bafata umupira bagakina, Barabyumvise pe bakinaga umupira wabo.”

KNC yavuze ko bagiye gukomeza imyitozo ndetse no gushaka uko bakongera abakinnyi mu bwugarizi no mu busatirizi. Ikindi ngo bazakomeza gushakisha imikino ya gishuti bazakomeza gukina kugeza babonye imiterere y’icyiciro cya 2 cy’uyu mwaka.

Uyu mwaka niwo wa mbere bazaba bakinnye icyiciro cya kabiri nka Gasogi United. Baheruka kwakirwa nk’abanyamuryango bashya muri FERWAFA. Umwaka ushize bakinaga ikipe yitwa Unity Gasogi. KNC avuga ko icyifuzo cyabo ari ukuzamuka kw’ikipe. Umutoza Lomami Marcel na we umuhigo afite ni ukuyizamu mu cyiciro cya mbere.

KNC kandi yagize icyo avuga ku bakinnyi bashya Rayon Sports. Ati: “Rayon Sports ntekereza ko nta mukinnyi yaguze mubi muri bariya kuko niyo liste bazakinisha. Abakinnyi bose barimo ni abakinnyi beza pe, igisigaye ni ukuzabareba. Ntabwo bafite ikipe mbi ugereranyije nizindi twakinnye , Rayon Sports iri hejuru.”

Leave a Reply